Kalata Ukufuma kwi Bumba Litungulula

Ku Nte sha kwa Yehova Shinensu,

Umutumwa Paulo aleti fye ishuko nga lyamoneka, alanga abasumina banankwe ukuti alibatemwa no kubatasha abatasha. Muli kalata iyo alembele ku Bena Kristu ba ku Roma, atile: “Ndetootela Lesa wandi muli Yesu Kristu pali imwe bonse, pantu icitetekelo cenu cilelandwapo pano calo ponse.” (Rom. 1:8) E ico kanshi mu Bufumu fye bonse ubwa calo ca Roma, balya Bena Kristu ba kubalilapo baishibikwe ukuti baali bantu ba citetekelo cakosa, kabili baali abacincila mu mulimo wa kushimikila. (1 Tes. 1:8) E calengele ukuti Paulo atemwe nga nshi aba bwananyina!

Na ifwe bene, lyonse nga twatontonkanya pali imwe tulatasha Yehova nga filya fine Paulo alemutasha. Ala twalimutemwa icine cine! E lyo kabili mwalishiba no kuti Yehova na o wine alimutemwa bonse umo umo. Bamo pali imwe, abantu balamulwisha nga nshi, lelo mulatwalilila ukulashimikila. Ala kwena umutima mwakwata uwabula umwenso e lyo no kushipa mwashipa fifwile filaletela Yehova insansa!—Amapi. 27:11.

Ilyo mulebelenga no kutontonkanya pa milimo ya Nte sha kwa Yehova iya muno nshiku iilembelwe muli 2008 Yearbook, muli no kumona ukuti Shikulu Yesu Kristu ‘alecimfya no kupwisha ukucimfya kwakwe,’ muli no kumona no kutila icanso conse ico bapangila abakonshi ba kwa Kristu tacakatunguluke iyo.—Ukus. 6:2; Esa. 54:17.

Umutumwa Paulo alembeele kalata abena Filipi ati: “Ntootela Lesa wandi lyonse ilyo naibukisha imwe . . . pa mulandu wa fyo mwayafwilishako imbila nsuma.” (Fil. 1:3-5) Na ifwe bene fwe baba mwi Bumba Litungulula e fyo tuumfwa mu mitima yesu pali imwe. Mu mwaka wa mulimo uwa 2007, bakasabankanya 6,691,790 babombele amaawala 1,431,761,554 ukubila imbila nsuma mu fyalo 236 ifyaba pano calo conse. Ala kwena mulebombesha mu kutwala pa ntanshi imbila nsuma! Tontonkanyeni pa myanda ya makana ya bantu abo mwaafwa pa mulandu wa kubombela pamo, kabili ico mucitila fyonse ifi kufwaya ukuleta ilumbo kuli Yehova!

Inshita na imbi Paulo alilangile ukuti aali ne cililishi kuli bamunyina. Alembeele ku baali ku Tesalonika ukuti: “Twibukisha pe umulimo wenu . . . no kushipikisha kwenu pa mulandu wa kusubila muli Shikulwifwe Yesu Kristu pa cinso ca kwa Lesa wesu kabili Shifwe.” (1 Tes. 1:2, 3) Ca cine ukuti mu bumi mwalifula amafya. Kwena amafya yena yalesa, nomba icacindama ico tulingile ukucita, kushipikisha. Mafya nshi ayo mukwete? Bushe mwalifuupuka pa mulandu wa kuti ubulwele mwalwala bwalilenga ukuti mwilabombesha mu mulimo wa kwa Yehova? Bushe umwina mwenu muyashi, aliya ku mbo ukushiikuta? (Amapi. 30:15, 16) Bushe cimoneka kwati mwalifilwa ukusanga umuntu mwingopana nankwe uwatemwa Yehova nga imwe, nomba nangu cibe fyo, bushe mwalitwalilila ukukonka ukufunda kwa mu Malembo ukwa kuti mufwile ukuupila fye muli Shikulu epela? (1 Kor. 7:39) Bushe mulebombesha apapela amaka yenu ukukusha abana benu pali ino nshita ilyo ubwikalo bwafishe nga nshi? Ubwafya fye bonse ubo mwingakwata, nga ca kuti mwatangisha ifya Bufumu, ninshi Yehova “takalabe umulimo wenu, no kutemwa uko mwalangile kwi shina lyakwe.” Bamunyinefwe na bankashi yesu mukwai, shi ‘mwinenuka mu kucite cawama’!—Heb. 6:10; Gal. 6:9.

Cinshi icikamwafwa ukushipikisha? Icikamwafwa “kusubila muli Shikulwifwe Yesu Kristu” nga filya abena Tesalonika bacitile. E mulandu wine Paulo alinganishishe ‘isubilo’ ku cisote cakosa ica kucingilila Umwina Kristu ku matontonkanyo yabipa na ku mutima wa kutwishika.—1 Tes. 5:8.

Mukwai nga ca kuti muleshipikisha fye ukwabula no kuilishanya, ninshi muleshinina Satana pa museebanya wakwe uo atuulika pa ulingile ukuteka mu muulu na pano calo. Satana atila abantu ba kwa Lesa bafyalwa fye no mutima wa kuitemwa kabili atila nangu ca kuti kuti baitemenwa fye abene ukubombela Lesa pa nshita imo, umuye nshiku kuti banaka mu kupepa kwabo nga ca kuti amesho yakula nangu nga ca kuti icalo catwalilila imyaka na imbi ukwabula ukuti cipwe. Mwalikwata ishuko lya kulangilila ukuti ifyo Kaseebanya aalanda bufi bwafiita fititi! Ubushiku bumo nga bwapita ninshi twile tulepalama ku bushiku ubo tukalambulwa.

Nga filya fine Paulo aletasha bamunyina pa mulandu wa citetekelo cabo icakosa, na pa mulandu wa bupe ubo balepeela ubwa kutwala pa ntanshi umulimo wa kushimikila, no kushipikisha kwabo, na ifwe tulemutasha pali ino nshita kabili tulemweba no kuti twalimutemwa nga nshi. Mutwalilile ukulabomba bwino ifi fine!

Shi na uno mwaka naube na mapaalo ayengi ukufuma kuli Lesa. Tulemulombela amapaalo ya kwa Lesa

Ni fwe bamunyinenwe,

Ibumba Litungulula Ilya Nte sha kwa Yehova