Sambilisheni Abana Benu Ukulashimikila
1. Bushe Amalumbo 148:12, 13 yakoselesha abafyashi Abena Kristu ukucita cinshi?
1 Yehova aleita abaice ukwisa mu kumulumbanya. (Amalu. 148:12, 13) E mulandu wine abafyashi Abena Kristu tabapelela fye pa kusambilisha abana babo icine ca mu Baibolo na pa mafunde ayalanda pa mibele isuma, lelo balabasambilisha no kulashimikila imbila nsuma. Bushe kuti batwalilila shani ukucite fi?
2. Bushe ica kumwenako cisuma ica mufyashi kuti cayafwa shani abana?
2 Ica Kumwenako Cisuma: Umupingushi Gideone aebele abaume 300 ati: “Musambilile pa kumona ifyo ndecita.” (Abapi. 7:17) Mu cifyalilwa fye, abana balamona ificita abafyashi babo kabili balabapashanya. Kwaliba umufyashi umo umwaume uubomba incito ya bushiku. Nomba nga afika pa ng’anda pa Cibelushi ulucelo, tafikilila fye ukusendama lelo alasenda abana bakwe mu kushimikila nangu ca kuti nanaka. Ukwabula no kusosa icebo icili conse, alabafunda ukuti ukushimikila eko balingile ukubika pa ntanshi ya fyonse ifyo bacita. (Mat. 6:33) Bushe abana benu balamumona mulebomba ne nsansa imilimo yalekanalekana iya kwa Lesa, pamo nga ukupepa, ukubelenga Baibolo, ukwasukapo, e lyo no kushimikila? Kwena te kuti mufikepo muli fyonse fye. Lelo abana benu bakulakonkamo bwino bwino ilyo mulebasambilisha ukupepa Yehova nga bamona namucincila ukumubombela.—Amala. 6:6, 7; Rom. 2:21, 22.
3. Milimo nshi iya kwa Lesa iyo abafyashi bengafwilisha abana babo ukutontonkanyapo no kubomba?
3 Bafweni Ukuba no Buyo: Abafyashi tabanaka ukukansha abana ukwenda, ukulanda, ukufwala ifya kufwala, e lyo ne fintu fimbi. Ilyo abana baya balekula no kwishiba ifintu, abafyashi balabalanga ifintu na fimbi ifyo bengacita. Nga ca kuti abafyashi Bena Kristu, balafwilisha abana babo ukusala imilimo ya kwa Lesa iyo bengabomba no kubafwa ukufika pali ubo buyo ukulingana no mushinku e lyo na maka bakwete. (1 Kor. 9:26) Bushe mulasambilisha abana benu ukula-asukapo mu mashiwi yabo abene no kulaipekanishisha amalyashi yabo mwi Sukulu lya Butumikishi Ilya Bulesa? (Amalu. 35:18) Bushe mulebasambilisha inshila shalekanalekana isha kushimikililamo? Bushe mulebafwa ukuba no buyo bwa kubatishiwa no kubomba umulimo wa nshita yonse? Bushe mulabafwa ukulasangwa na Bena Kristu ba nsansa, abacincila mu kushimikila abengabakoselesha?—Amapi. 13:20.
4. Bushe abana banonkelamo shani nga ca kuti abafyashi babo babakansha ukushimikila ilyo bacili fye abanono sana?
4 Uwaimbile amalumbo atile: “Mwe Lesa, mwalinsambilisha ukufuma ku bwaice bwandi, kabili ukufika na nomba nanda pa fipesha amano fyenu.” (Amalu. 71:17) Tendekeni ukukansha abana benu ukulashimikila ilyo bacili fye abanono sana. Ifya kwa Lesa ifyo mubasambilisha ilyo bacili abanono fikabafwa sana ilyo bakakula!—Amapi. 22:6.