Bushe Mwaliipekanya Ukulondolola Ifyo Mwasuminamo?

BUSHE kwalicitikepo fimo ifyalengele mumfwe ukuti mufwile fye ukulondolola ifyo mwasuminamo? Moneni icacitike kuli Susana, Inte ya kwa Yehova uuli ne myaka 16. Susana ekala mu calo ca Paraguay, kabili bushiku bumo ilyo balesambilila mu kalasi, umwana we sukulu umo atile Inte sha kwa Yehova tabasumina mu “Cipingo ca Kale,” muli Yesu Kristu, na muli Maria. Alandile no kuti Inte sha kwa Yehova balicilamo mu fyo basuminamo, balasalapo ukufwa ukucila ukubondapa. Bushe amuba ni mwe, nga mwacitile shani?

Susana alipepele kuli Yehova kabili aimishe ukuboko pa kuti alandepo. Apo inshita yalipwile, Susana aebele kafundisha ukuti amusuminishe akeselondolola ifyo asuminamo apo ni Nte ya kwa Yehova. Kafundisha alisumine. Mu milungu ibili iyakonkelepo, Susana alipekenye bwino ifyo ali no kwisalondolola, kabili pa kupekanya abomfeshe broshuwa itila Inte sha kwa Yehova—Ni bani? Finshi Basuminamo?

Awe ubushiku bwalifikile ubwa kulondolwela aba mu kalasi ifyo asuminamo. Susana alilondolwele ico twitilwa ukuti Inte sha kwa Yehova. Alilondolwele ne subilo twakwata ilya ku ntanshi no mulandu tukaanina ukubikwamo umulopa. Lyena aebele aba mu kalasi ukumwipusha amepusho. Abana be sukulu abengi balimwipwishe amepusho. Kafundisha alitemenwe ukumona umwaice alebelenga Amalembo pa kwasuka amepusho.

Umwana we sukulu umo atile, “Nalingilapo mu Ng’anda ya Bufumu umuku umo, kabili nshamwenemo akalubi nangu kamo.” Kafundisha alipwishe umulandu mu Ng’anda ya Bufumu mushabela utulubi. Susana abelengele Amalumbo 115:4-8 no Ukufuma 20:4. Kafundisha alipapile kabili atile, “Nomba mulandu nshi mu macalici yesu mwabela utulubi ilintu Baibolo yalikaanya?”

Pa maminiti 40, balemwipusha fye amepusho na o aleyasuka. Ilyo Susana aipwishe aba mu kalasi nga kuti batemwa ukutamba vidio ilanda pa mulopa iya No Blood—Medicine Meets the Challenge, bonse balisumine. E co kafundisha alipekenye ukuti bakatambe vidio ubushiku bwakonkelepo. Pa numa ya kutambisha vidio, Susana alilondolwele ukuti kwaliba imyundapile imo iyo bashibomfyamo umulopa kabili baNte bamo basumina ukubondapa muli uyu musango. Ilyo kafundisha aumfwile ifi, atile: “Nshaishibe ukuti kwaliba inshila ishingi isho bengondapilamo umulwele ukwabula ukubomfya umulopa; kabili nshaishibe no busuma bwaba mu kundapwa ukwabula ukubomfya umulopa. Bushe ni kuli baNte fye beka e ko babomfya iyi myundapile?” Ilyo bamwebele ukuti no ushili Nte kuti bamundapa ukwabula ukubomfya umulopa, kafundisha atile, “Ilyo baNte bakantandalila, nkalanshanya nabo.”

Ilyashi ilyo Susana apekenye ukuti bakalanshanya mu maminiti 20, lyapwile pa maawala yatatu. Ilyo papitile umulungu umo, abana be sukulu bambi nabo balondolwelele abana be sukulu banabo ifyo basuminamo. Ilyo bapwishishe ukulondolola, balibepwishe amepusho ayengi lelo balifililwe ukulondolola ifyo basuminamo. Kafundisha abepwishe ukuti, “Umwana we sukulu munenu Inte ya kwa Yehova alilondolola ifyo asuminamo, nga imwe mwafilwa shani ukulondolola?”

Bayaswike ukuti: “Inte sha kwa Yehova balasambilila Baibolo icine cine. Ifwe tatusambilila.”

Kafundisha aebele Susana ukuti: “Cine cine ulasambilila Baibolo kabili ulacita ne fyo usambilila. Ulacita bwino sana.”

Susana atemwa, nga aikele fye tondolo. Lelo, filya acitile ukulondolwela abana be sukulu banankwe ifyo asuminamo, apashenye umukashana munono umwina Israele, uo bashalumbula ishina, uo abena Siria basendele muli bunkole. Uyu mukashana atendeke ukubomba mu ng’anda ya kwa Naamani, umukalamba wa bashilika, uwalwele ifibashi. Umukashana umwina Israele aebele nakulu ukuti: “Iye, shikulu nga aba ku cinso ca kwa kasesema uuli mu Samaria! Kuti amupususha ku fibashi.” Ulya mukashana alifililwe ukwikala tondolo ukwabula ukucitilo bunte pali Lesa wa cine. Icafuminemo ca kuti, Naamani shikulu wakwe, alitendeke ukupepa Yehova.—2 Isha. 5:3, 17.

Na Susana na o e fyo acitile, alifililwe ukwikala tondolo, ukwabula ukucitila ubunte pali Yehova na bantu bakwe. Ifi Susana aitendekeleko ukulondolwela bambi ifyo asuminamo, aleumfwila ifunde lya mu Baibolo ilitila: “Shisheni Kristu nga Shikulu mu mitima yenu, lyonse mube abaiteyanya ukuisosela ku muntu onse uwingamwipusha pe subilo lyenu, lelo mulesose fyo no mutima uwafuuka na katiina.” (1 Pet. 3:15) Bushe na imwe mwaliipekanya ukulondolola ifyo mwasuminamo no kuitendekelako ukulondolwelako bambi ilyo mwakwate shuko?

[Icikope pe bula 17]

Ishi mpapulo kuti shamwafwa ukulondolola ifyo mwasuminamo