Ifintu 5 Ifingatwafwa Ukusanga Amasambililo ya Baibolo
1. Cinshi tufwile ukucita nga cilatukosela ukusanga isambililo lya Baibolo mu cifulo tushimikila, kabili mulandu nshi?
1 Bushe cilamukosela ukusanga isambililo lya Baibolo? Tamulingile ukutendwa, twalilileni fye ukulafwaya. Yehova alapaala abesha na maka ukucita ukufwaya kwakwe ukwabula ukunenuka. (Gal. 6:9) Pe samba pali ifintu 5 ifingatwafwa ukusanga amasambililo ya Baibolo.
2. Kuti twacita shani pa kuti twishibe nga umuntu kuti atemwa ukusambilila Baibolo?
2 Ipusheni mu Kulungatika: Abantu abengi balishiba ukuti tulapeela abantu magazini ya Ulupungu lwa kwa Kalinda na Loleni! lelo nalimo te kuti beshibe ukuti tulasambilisha abantu Baibolo. Ilyo tuleshimikila ku ng’anda ne ng’anda, bushe te kuti ciwame ukwipusha abantu mu kulungatika nga kuti batemwa ukusambilila Baibolo? Kuti mwaipusha na balya mutwalila impapulo lyonse nga kuti batemwa ukusambilila Baibolo. Nga bakaana, twalilileni fye ukulabatwalila impapulo no kulalandako nabo fimo ifya mu Baibolo. Pa myaka iingi munyinefwe umo aletwalila umwaume umo no mwina mwakwe magazini. Bushiku bumo ilyo abatwalile magazini iipya abepwishe ati: “Bushe kuti mwatemwa ukusambilila Baibolo?” Alipapile ilyo basumine. Pali ino nshita balibatishiwa.
3. Bushe tufwile ukulatontonkanya ukuti abesa ku kulongana bonse balikwata aba basambilisha Baibolo? Londoleni.
3 Abesa ku Kulongana: Mwilatontonkanya ukuti bonse abesa ku kulongana balikwata aba basambilisha Baibolo. Munyinefwe umo atile: “Abengi abo natendeke ukusambilila nabo Baibolo, bantu nalandile nabo ilyo baishile ku kulongana.” Nkashi umo apingwilepo ukulanda na namayo umo uwa nsoni sana. Abana ba kwa uyu namayo bali ni bakasabankanya aba batishiwa muli ici cine icilonganino. Pa myaka nalimo 15, uyu namayo alesangwa ku kulongana nomba lyonse alefika pa Ng’anda ya Bufumu lilya line fye ukulongana kwatendeka kabili nga kwapwa alefuma bwangu no kuya. Uyu mwanakashi alisumine ukusambilila Baibolo, na pa numa alibatishiwe. Nkashi uwalemusambilisha Baibolo alembele ati: “Cilankalipa nga naibukisha ukuti, palipitile imyaka 15 pa kuti mwipushe nga kuti atemwa ukusambilila Baibolo!”
4. Bushe ukwipushako bambi kuti kwatwafwa shani ukusanga isambililo lya Baibolo?
4 Muleipushako na Bambi: Nkashi umo alitemwa ukuya na bakasabankanya bambi ku masambililo yabo. Pa numa ye sambililo, alalomba ulusa ku o abombele nankwe ukuti epushe uo bacilasambilisha nga alishibako na bambi abengatemwa ukusambilila Baibolo. Ilyo mulepeela umuntu mulanshanya nankwe pali Baibolo icitabo ca Ico Baibolo Isambilisha, kuti mwa mwipusha ukuti: “Bushe kuti mwaishibako na bambi abengatemwa ukukwata ici citabo?” Limo kulaba ifilenga ukuti bakasabankanya na bapainiya bafilwe ukulasambilila no muntu bakumanya mu cifulo ca kushimikilamo. Kanshi kuti mwaebako bambi ukuti mulefwaya amasambililo.
5. Mulandu nshi tufwile ukwipushisha Nte uwakwata umwina mwakwe uushasumina nga umwina mwakwe kuti atemwa ukusambilila Baibolo?
5 Abakwata Abena Mwabo Abashasumina: Bushe mu cilonganino cenu mwaliba bakasabankanya abakwata abena mwabo abashasumina? Abashasumina bamo tabafwaya ukulanda pali Baibolo na bena mwabo ba Nte, lelo kuti basumina ukusambilila na Nte umbi. Kuti cawama ukwipusha Nte uwakwata umwina mwakwe uushasumina nga umwina mwakwe kuti atemwa ukusambilila, pa kuti mwishibe ifyo mwingamwafwa.
6. Bushe ipepo lyacindama shani ilyo mulefwaya ukusanga isambililo lya Baibolo?
6 Ipepo: Ipepo lyalicindama sana. (Yako. 5:16) Yehova alitulaya ukuti akulakutika ku mapepo yesu nga tulepepa ukulingana no kufwaya kwakwe. (1 Yoh. 5:14) Munyinefwe umo uwakwete ifyakucita ifingi atendeke ukupepa pa kuti akwate isambililo lya Baibolo. Abakashi bakwe balemona kwati te kuti akwate inshita ya kulatungulula isambililo, maka maka nga umusambi akwata amafya. E co ilyo umukashi wakwe alepepepa kuli Yehova ukuti afwe umulume wakwe ukusanga isambililo, alyebele Yehova ifyalemusakamika. Yehova alyaswike amapepo yabo. Ilyo papitile imilungu ibili painiya uwa mu cilonganino cabo asangile umwaume uwalefwaya ukusambilila Baibolo kabili apeele uyu munyinefwe ili isambililo. Abakashi balembele ukuti: “Abamona kwati te kuti bakwate inshita ya kutungulula isambililo lya Baibolo, bafwile ukulapepelapo lyonse. Twaliba ne nsansa isho nshale-enekela.” Na imwe nga mwakosapo, kuti mwasanga isambililo lya Baibolo kabili mukaba ne nsansa ishaba mu kwafwa abantu ukuba mu “musebo uwaya ku bumi.”—Mat. 7:13, 14.