Ulubali 7—Ukutungulula Amasambililo ya Baibolo Ayalunduluka
Ukupepa pe Sambililo
1. (a) Mulandu nshi cabela icalinga ukwiswila no kusondwelela isambililo lya Baibolo ne pepo? (b) Ni lilali twingatendeka ukupepa pe sambililo lya Baibolo?
1 Ipaalo lya kwa Yehova lilakabilwa pa kuti abasambi ba Baibolo balunduluke lwa ku mupashi. (1 Kor. 3:6) E ico, tukabila ukwiswila no kusondwelela isambililo ne pepo. Kuti twacite fyo pa muku wa kubalilapo fye uwe sambililo na bantu abatemwa ifya mapepo. Abasambi bambi bena, kuti twamona inshita iingalinga iya kutendeka ukupepa pe sambililo. Nalimo kuti mwabomfya Amalumbo 25:4, 5 na 1 Yohane 5:14 ukwafwa umusambi ukumfwikisha umulandu kufwile ukubela ipepo na kabili kuti mwabomfya Yohane 15:16 ukulondolola ubucindami bwa kupepela kuli Yehova ukupitila muli Yesu Kristu.
2. Nga ca kuti nkashi aya kwi sambililo lya Baibolo na munyinefwe uwabatishiwa, nelyo aya no mwaume kasabankanya uushabatishiwa, nani afwile ukupepa?
2 Ni bani bafwile ukupepa pe sambililo lya Baibolo? Nga ca kuti munyinefwe uwabatishiwa aya na nkashi kwi sambililo, e ufwile ukupepa, nelyo cingatila nkashi kuti atungulula isambililo, ninshi nafwala ne cifimbo ku mutwe. (1 Kor. 11:5, 10) Lelo, nga ca kuti umwaume kasabankanya wa Bufumu uushabatishiwa aya na nkashi kwi sambililo, nkashi e ufwile ukupepa. Nga ca kuti nkashi alepepa no kutungulula isambililo ilyo kasabankanya uushabatishiwa umwaume e po ali, uyu nkashi afwile ukufwala icifimbo ku mutwe.
3. Fintu nshi ifyacindama ifyo tufwile ukusansha mu mapepo ya pe sambililo lya Baibolo?
3 Ififwile Ukulumbulwa mwi Pepo: Amapepo ya pe sambililo lya Baibolo tayafwile ukuba ayatali, lelo yafwile ukuba aya kulungatika. Pa mbali ya kulomba ukwafwa kwa kwa Lesa pe sambililo no kutasha pa cine icisambililwe, kuti cawama ukutasha Yehova pantu e Kasambilisha wapulamo. (Esa. 54:13) Kuti twasanshamo na mashiwi ayalelanga ukuti twalitemwa sana umusambi kabili kuti twatasha no kuteyanya kwa kwa Yehova. (1 Tes. 1:2, 3; 2:7, 8) Ukupepa ukuti Yehova apaale umusambi pa fyo aleibikilishako ukukonka ifyo alesambilila kuti kwamwafwa ukumona ubucindami bwa kuba ‘kacita wa cebo.’—Yako. 1:22.
4. Kumwenamo nshi ukufuma mu kwiswila no kusondwelela isambililo lya Baibolo ne pepo?
4 Tulamwenamo ifingi mwi pepo lya pe sambililo lya Baibolo. Ukupitila mwi pepo, tulapokelela ipaalo lya kwa Lesa. (Luka 11:13) Amapepo yalakosha ubucindami bwa kusambilila Icebo ca kwa Lesa. Ilyo umusambi alekutika ku mapepo yesu, akasambilila ifya kupepa. (Luka 6:40) Ne cacilapo, amapepo ayafuma ku mutima uwaisulamo kutemwa Lesa no kumutasha pa mibele yakwe ishingalinganishiwako kuti yaafwa umusambi ukulundulula bucibusa na Yehova.