Umukululo wa Mepusho

◼ Bushe tufwile ukupepa ilyo tuletungulula isambililo pa nse?

Cisuma ukupepa ilyo mushilatendeka ukusambilila e lyo na pa numa. Pantu ilyo tulepepa, tulalomba Yehova ukutupeela umupashi wakwe uwa mushilo ukuti utwafwe ilyo tulesambilila. (Luka 11:13) Na kabili ukupepa kulalenga umusambi ukwishiba ukuti ukusambilila Baibolo kwalicindama kabili kuti asambilila ne fya kupepa. (Luka 6:40) Kanshi, calicindama ukutendeka ukupepa pa kusambilila lilya line mwatendeka ukusambilila no muntu nangu pa numa ya kusambilila nankwe imiku fye iinono. Lelo, apo ificitika filapusanapusana, kasabankanya afwile ukubomfya ukushilimuka pa kuti e shibe nga ca kuti balingile ukupepa ilyo aletungulula isambililo lya Baibolo pa nse.

Icacindama sana icingapima nampo balingile ukupepa nelyo iyo cifulo apo isambililo liletungulwilwa. Nga ca kuti na pa fisama, nalimo nga lisambililo ilitungululwa lyonse kuti caba bwino ukupepa ipepo ilyalinga fye ilyo mushilatendeka ukusambilila e lyo na pa numa. Nomba nga ca kutila kuti kwaba abalemumona ilyo mulepepa nelyo nga umusambi kuti aumfwa insoni ukupepa nankwe, kuti cawama ukulolela kufikila mwatendeka ukusambililila pa cifulo apacingililwa nelyo umwa kuti bambi tabalemumona. Te mulandu na po isambililo liletungulwilwa, tufwile ukuba abashilimuka ukwishiba ilyo cingalinga ukutendeka ukupepa pe sambililo.—Moneni Ubutumikishi Bwesu Ubwa Bufumu ubwa March 2005, pe bula 4.