Umukululo wa Fipusho

◼ Ni bani bafwile ukupepa pa kulongana kwa cilonganino?

Ipepo lya pa kulongana lyalicindama mu kupepa kwesu. Ukwimininako bambi kuli Yehova mwi pepo lishuko lyacindama kabili mulimo ushaikulila. Pa mulandu wa bucindami bwe pepo, baeluda bafwile ukutontonkanyapo bwino pa kusala bamunyina abengafikapo ukupepa mu cilonganino. Bamunyina babatishiwa abaleimininako icilonganino mwi pepo bafwile ukuba batumikishi ba Bwina Kristu abakosoka ababa ifya kumwenako fisuma kabili abacindikwa mu cilonganino. Amapepo yabo aya katiina kabili aya mucinshi yafwile ukusokolola bucibusa bwabo ubwawamisha na Yehova Lesa. Mu cipande cisosa ukuti “Ukupepa pa Ntanshi ya Bambi no Mutima Wafuuka,” icaba mu Ulupungu lwa kwa Kalinda ulwa May 15, 1986, mwaba ifishinte fisuma ifya mu Baibolo ifingafwa sana abapepelako icilonganino pa cintubwingi.

Baeluda tabakasale munyina uwaba ne mibele yatwishikwa nelyo uushaicindika ukupepa pa kulongana. Munyina umukali nelyo uulemenena ku kulanda pa fyo apusana na bamunyina mwi pepo lya pa cintubwingi takasalwe ukupepa pa kulongana. (1 Tim. 2:8) Nangu line munyina umupungwe kuti alibatishiwa, baeluda bakafwaya ukumona bwino nga cine cine nafikapo lwa ku mupashi ku kupepa pa ntanshi ya cilonganino.—Imil. 16:1, 2.

Limo limo pa kukumana kwa kuya mu mulimo wa mwi bala, nkashi wabatishiwa kuti apepa nga tapali munyina wafikapo uwingemininako abasangilweko mwi pepo. Afwile ukufwala icitambala. Nga nabeshiba ukuti munyina umo uwafikapo takasangweko ku kukumana kwa kuya mu mulimo wa mwi bala, baeluda bafwile ukusonta nkashi wafikapo ukutungulula ukukumana.

Ilingi line pa Kulongana kwa Cintubwingi, ceyamani e upepa ipepo lya kwiswila. Nalyo line, nga kuli bamunyina na bambi abafikapo, pa kulongana kumbi ukwashala kuti kwaba munyina umbi uwingapepa pa kutendeka nelyo pa kusondwelela programu, ukucila ulya wine fye uukwete ilyashi lya kubalilapo nelyo ilya kusondwelela pa kulongana. Lyonse fye munyina uufwile ukupepa pa kulongana kwa cilonganino afwile ukwebelwa libela pa kuti atontonkanishishe libela ifya kulanda mwi pepo. Lyene kuti apepa ipepo lyalongoloka, ilya kufuma ku mutima kabili ilyalingana ne filelandwapo pali uko kulongana.

Amapepo ya pa kulongana tayafwile ukulepa. Ilyo munyina alepepa pa cintubwingi, ilingi line kuti aumfwikwa bwino ku basangilweko nga aimako, ukwikatishako ishiwi, no kulanda ifileumfwika. Ico cikalenga bonse abalongene ukumfwa ipepo na pa kusondwelela bakasosa abati “Amene!,” ukufuma ku mutima.—1 Imila. 16:36; 1 Kor. 14:16.

◼ Ni bani bafwile ukupokako amabaji ye bungano?

Amabaji ye bungano yalafwilisha sana ukwishiba bamunyinefwe no kusabankanya pa lwe bungano. Lelo, tayafwile ukupeelwa fye icipeelepeele. Amabaji yeshibisha uufwele ukuti wa mibele isuma mu cilonganino alonganako ica Nte sha kwa Yehova.

Pali baji paba incende apa kulemba ishina lya mwine wa baji ne lya cilonganino. Kanshi uufwele baji afwile alibishanyako pa nshita iyalinga ne cilonganino alembele pali baji. Sosaite ilatuma amabaji ku cilonganino cimo na cimo. Kuti cawama ukupeela bonse bakasabankanya ababatishiwa na bashabatishiwa. Abana pamo na bambi abasangwako ku kulongana lyonse kabili abalelunduluka ica kuti balemoneka nga abengatendeka ukufumina mwi bala na bo bene kuti bapeelwako amabaji. Te kuti cibe bwino ukupeela baji we bungano ku muntu uwatamfiwa.

Ilyo amabaji yaisa, baeluda bafwile ukumona ukuti bakonka ifi fifwaikwa pa kupeela abantu.