Ukulongana kwa mu Mulungu wa December 20

UMULUNGU WA DECEMBER 20

Ulwimbo 79

□ Isambililo lya Baibolo Ilya pa Cilonganino:

cf icipa. 15 amapara. 1-7

□ Isukulu lya Butumikishi Ilya Bulesa:

Ukubelenga Baibolo: 2 Imilandu 20-24

Na. 1: 2 Imilandu 20:1-12

Na. 2: Bushe Finshi Fyabimbwamo mu Kusambilila no Kulanda Ululimi Lwine Lwine? (Sefa 3:9)

Na. 3: Bushe Yesu Kristu Aali Muntu wa Cine Cine? (rs ibu. 1 para. 1-ibu. 428 para. 2)

□ Ukulongana kwa Mulimo:

Ulwimbo 12

5 min: Ukubilisha.

15 min: Bushe Mwalyeshapo Ukubomfya Ifyebo Fyaba mu Ubutumikishi Bwesu Ubwa Bufumu? Ukulanshanya. Landeni ilyashi kabili mu kwipifya pitulukeni mu fyebo fyaba mu Ubutumikishi Bwesu Ubwa Bufumu ubwa nomba line ifyaleti: “Bushe Mwalilangapo Umuntu Ifya Kusambilila Umuku wa Kubalilapo Mwalanda Nankwe?” na “Ukusambilisha Abapya Ifya Kushimikila” (km 5/10) na “Kuti Mwashimikila Ilyo Muleisha Fye!” (km 8/10). Ebeni abali mwi bumba balandepo ifyo baesha ukubomfya ifyebo fyaba muli ifi fipande ne fyo fyabafwa.

15 min: “Icipande Icipya Ica Kutwaafwa Ukutendeka Amasambililo ya Baibolo.” Ifipusho ne fyasuko. Ilyo mushilatendeka ukulanshanya, peeleleni calimo bakasabankanya abashikwete Ulupungu lwa kwa Kalinda ulwa January 1, 2011. Sondweleleni ne cilangililo cimo nelyo fibili ukulangilila ifya kubomfya icipande cileti “Sambilileni Icebo ca kwa Lesa—Mulandu Nshi Uwa Kusambilila kuli Lesa?” pa kutendeka isambililo lya Baibolo.

Ulwimbo 17

Icipande Icipya Ica Kutwaafwa Ukutendeka Amasambililo ya Baibolo

1. Cipande nshi icipya icikalaba mu Ulupungu lwa kwa Kalinda ulwa bantu bonse kabili bacipekenye mu nshila nshi?

¹ Ukutendeka umweshi uleisa, mu Ulupungu lwa kwa Kalinda ulwa bantu bonse mwakulaba icipande ica kutwaafwa ukutendeka amasambililo ya Baibolo. Icipande cikalatila “Sambilileni Icebo ca kwa Lesa.” Nangu ca kuti abantu tukalashalikila iyi magazini bakalatemwa ukubelenga ifipande abene, ifi fipande fipekanishiwe mu nshila ya kuti tukalelanshanya na bo tukalashalikako magazini.

2. Bushe ifi fipande fyakulaba shani?

² Bushe ifi Fipande Fyakulaba Shani?: Umutwe uukalamba e lyo no tumitwe twa malyashi, fyonse fikalaba fipusho ifyo twakulaipusha umuntu tulelanshanya nankwe. Amalembo muli ifi fipande, tayakula-ambulwa, pa kuti umuntu mulelanshanya nankwe engalaipakisha ukusambilila fye mu kulungatika mu Cebo ca kwa Lesa. Amaparagrafu yakalaba ayepi ica kuti nangu mwiminine fye pa mwinshi kuti mwalanshanya. Icipande cimo na cimo ca kulalosha ku citabo ca Bushe Cinshi Baibolo Isambilisha?, ku kumwaafwa ukutanukila mu citabo nga mwamona ati inshita nailinga.

3. Ilyo tuleshimikila ku ng’anda ne ng’anda, kuti twatendeka shani isambililo lya Baibolo pa mwinshi ukubomfya ifi fipande?

³ Ifya Kushalika: Pa kushalika magazini kuti mwaipusha icipusho icingalenga umuntu ukufwaisha ukwishibapo fimo pa lyashi balandilepo mu cipande. Ku ca kumwenako, magazini ya January 1 ikalalanda pa fyo Baibolo yacindama. Kuti pambi mwaipusha ukuti: “Bushe mwaishiba ukuti Baibolo Cebo ca kwa Lesa nelyo mumona ukuti citabo fye icisuma? [Lekeni basuke.] Kuti namulanga icintu cimo icisuma pali ili lyashi.” Balangeni icipusho ca kubalilapo, belengeni paragrafu ya kubalilapo, kabili belengeni na malembo ayashambwilwe. Belengeni icipusho na kabili, no kuleka abo muleshimikila basuke. Lanshanyeni ifyebo ifyo mwingakwanisha, ukubomfya ifipusho ifyo batantike. Ilyo tamulaya, bepusheni icipusho icilembelwe ico mukalanshanyapo kabili panganeni ilyo mukabwelelako. Twalilileni ukulaya mu kulanshanya cila mulungu ukufikila ilyo mukabaletela magazini imbi. Cimbi ico mwingacita kweba abo mulelanshanya nabo mu kulungatika fye ukuti kuti mwatemwa ukusambilila nabo Baibolo. Lyena salenipo icipande cimo muli magazini no ku balangilila ifyo tusambilila Baibolo.

4. Bushe kuti twabomfya shani ifi fipande ilyo tulebwelela kubo twashimikile?

⁴ Na kabili kuti mwabomfya bwino ifi fipande ifipya ku bantu abo mushiila lyonse magazini na mu fipempu ifya kubwelelamo. Kuti mwatila: “Muli ino magazini ya Ulupungu lwa kwa Kalinda muli icipande icipya. Lekeni imulange ifyo mwingacibomfya.” Tulepepa ukuti ifi fipande fya kula-afwa abengi “ukwishiba bwino bwino icine.”—1 Tim. 2:4.