Kalata Ukufuma kwi Bumba Litungulula

Bamunyinefwe ne Nkashi:

Shifwe wa mu muulu Yehova, alikwata sana ukutemwa. E co Baibolo ilandila ukuti: “Lesa kutemwa.” (1 Yoh. 4:8) Nangu ca kutila Yehova ni Lesa Wa Maka Yonse, Icebo cakwe tacitila: “Lesa maka.” Mu mitekele yakwe mwaliba sana ukutemwa. Ici cilalenga twamutemwa sana!

Icawamako ca kuti, Yehova tatupatikisha ukuti tulemubombela pantu te wa culukusu. Afwaya tulemubombela no mutima wesu onse pa mulandu wa kuti twalimutemwa. Nga tulecita ifi, tulanga ukuti twalitemwa ukuteka kwakwe pantu twalishiba ukuti imitekele yakwe yalilungama kabili mwaliba ukutemwa. E fyo afwaya abantu balecita ukutula fye na pa kutendeka.

Yehova tapatikishe Adamu na Efa ukulamumfwila, lelo alibapeele insambu sha kucita ifyo balefwaya. Abatemwa Yehova no kutasha pa fyo abacitiile, nga balikeene ilyo Satana abatunkile ukuti bapondokele Lesa.

Pa numa, ilyo Mose alelaya abena Israele, alandile ati: “Moneni, nabika ku cinso cenu lelo umweo no busuma, kabili imfwa no bubi.” (Amala. 30:15) Abantu balikwete ubuntungwa bwa kusala ifyo balefwaya ukulaikala. Yoshua na o aebele abena Israele ati: “Nga tamulefwaya ukubombela Yehova, salenipo mwe bene lelo uo mwakulabombela.” (Yosh. 24:15, 16) Abantu bayaswike Yoshua abati: “Teti tushe Yehova no kuyabombela balesa bambi.” (Yosh. 24:15, 16) Na ifwe pali lelo e fyo twingalanda. Apo twalitemwa Yehova, “teti” tumushe.

Mu cilonganino ca Bwina Kristu, twalimona umo calola ukupeelwa amaka ya kuisalila ifya kucita. Nangu ca kutila baeluda balipeelwa insambu sha kufunda e lyo no kusalapula, tabatitikisha nelyo ukuba bakapitao pa citetekelo ca bambi. Umutumwa Paulo alembele ati: “Te kutila ni fwe bakapitao pa citetekelo cenu, lelo tuli babomfi banenu aba kumuletela insansa, pantu icitetekelo cenu e cimulenga ukuti mube abashangila.”—2 Kor. 1:24.

Cilomfwika bwino sana nga twacita icintu cimo pa mulandu wa kuti tulefwaya ukucita ico cintu ukucila ukupatikishiwa! Yehova atweba ukucita icisuma pa mulandu wa kuti twalimutemwa. Ubusuma bwa kucita ifyo bulamoneka muli filya Paulo asosele ati: “Nga napeela fyonse ifyo nakwata ku kuliishishamo bambi, nangu nga naipeela ne mwine ukuti banjipaye, pa kuti njitakishe, lelo ukutemwa nshakwata, te ca kwafwa kuli ine nakalya.”—1 Kor. 13:3.

Yehova alatemwa sana ukumona bamunyinefwe ne nkashi abengi balemubombela no mutima onse pa mulandu wa kuti balimutemwa!

Yehova na o alitemwa sana ababomfi bakwe, pamo na mwe bacaice na mwe misepela mwe balanga ukuti mwalitemwa Yehova ukucila ukutemwa icalo no kufwaya ukuisekesha fye. Muleibukisha no kuti twalimutemwa sana.—Luka 12:42, 43.

Ukutemwa kwalengele imwe bamunyinefwe ne nkashi na bacaice ukubomba ama-awala 1,748,697,447 mu mulimo wa kushimikila imbila nsuma. Kabili ukutemwa kwalengele abantu 7,782,346 ukubombako umulimo wa kushimikila mwi sonde lyonse. Twalitemwa sana pantu abantu 268,777, kumo na bacaice abengi balibatishiwe pa kuti balange ukuipeela kwabo. Nga kwakanya, ninshi cila mulungu abalebatishiwa bali 5,168. Ici nacituletela sana insansa!

Muli shino nshiku sha mpela, abantu ba kwa Lesa balakwata sana amafya ayengi pamo nga amasakamika, ukucushiwa pa mulandu wa citetekelo cabo, ukulwala, e lyo bambi nabo ni pa mulandu wa bukote. Lelo tatufwaya nangu panono ‘ukubwelela inuma’ nelyo ‘ukunenuka.’ Twalimutemwa sana bonse.—Heb. 10:39; 2 Kor. 4:16.

Ni fwe bamunyinenwe,

Ibumba Litungulula Ilya Nte sha kwa Yehova