Ifya Kubomfya Broshuwa ya Imbila Nsuma pa Kusambilisha Abantu Icine
1. Bushe broshuwa ya Imbila Nsuma bailemba shani?
1 Nga fintu twalandilepo mu Ubutumikishi Bwesu Ubwa Ubufumu ubwa July, ulupapulo lumo ulwa kubomfya pa kusambilisha abantu icine ni broshuwa ya Imbila Nsuma Ukufuma Kuli Lesa! Amalembo ayabamo tayayambulwa pa kuti abantu abalefwaya ukusambilila icine balenonkelamo mu kubelenga Baibolo. Nangu ca kuti impapulo ishingi shalembwa mu nshila ya kuti uulebelenga kuti aleisambilisha umwine, iyi broshuwa yena pa kuisambilila kano umwine wa ng’anda alelanshanya na kasabankanya. Kanshi, ilyo twapeela umuntu iyi broshuwa, tufwile ukwesha na maka ukumulanga ifya kuisambilila pa kuti engamona ubusuma bwaba mu kusambilila pa mbila nsuma iyaba muli Baibolo.—Mat. 13:44.
2. Bushe kuti twabomfya shani broshuwa ya Imbila Nsuma nga twasanga umwine wa ng’anda pa muku fye wa kubalilapo?
2 Pa Muku Wakubalilapo Fye: Kuti mwalanda ukuti: “Ico naishila, ni co abantu abengi tabaishiba ifikacitikila abantu bonse ku ntanshi. Bushe mutontonkanya ukuti ifintu fikaba bwino? [Lekeni basuke.] Muli Baibolo mwaliba imbila nsuma iilenga tube ne subilo. Moneni ifipusho fimo fimo ifyo Baibolo yayasuka.” Peeleni umwine wa ng’anda broshuwa, kabili mwebeni asalepo icipusho pa fipusho fyaba pe bula lya kulekelesha. Lyena mulangeni ifya kusambilila iyi broshuwa ukubomfya paragrafu ya kubalilapo mwi sambililo ilyo umwine asala. Cimbi na co ico mwingacita, kwipusha umwine wa ng’anda icipusho ico mwe bene musalile icingamufika pa mutima, lyena mulangeni ifyo broshuwa ingamwafwa ukusanga ifyasuko mu Baibolo.
3. Londololeni ifya kucita pa kutendeka ukusambilila no mwine wa ng’anda muli broshuwa ya Imbila Nsuma.
3 Ifya Kutendeka Isambililo: (1) Belengeni icipusho icili mu filembo ifyafiita pa kuti umwine wa ng’anda abike amano ku cishinka icikalamba. (2) Belengeni paragrafu iili pe samba. (3) Belengeni amalembo ayaba mu filembo fyapindama, kabili ipusheni ifipusho ifisuma ifingafwa umwine wa ng’anda ukumona ifyo amalembo yaleyasuka ifyo fipusho. (4) Nga pali na paragrafu na imbi pe samba lya ico cipusho, citeni fimo fine ifyo mwacicita mu lubali 2 na 3. (5) Pa kulekelesha, ipusheni umwine wa ng’anda ukuti alande icasuko ku cipusho pa kuti mumone nga naumfwa. Nga mwasambilila muli iyi broshuwa pa miku iingi kabili mwamona no kuti mulesambilila lyonse, nalimo kuti mwatendeka ukusambilila mu citabo ca Ico Baibolo Isambilisha nelyo ukutwalilila muli iyi ine broshuwa mpaka mwaipwisha.
4. Finshi fingatwafwa ukulabomfya bwino broshuwa ya Imbila Nsuma?
4 Ishibeni bwino ifya kubomfya iyi broshuwa. Muleibomfya lyonse ilyo calinga. Ilyo mushilatendeka ukusambilila isambililo ilili lyonse muli iyi broshuwa, muletontonkanya pa musambi wenu na pa fyo mwingapelulushanya nankwe bwino pa malembo ayali mwi sambililo. (Amapi. 15:28; Imil. 17:2, 3) Ilyo muleishibilako ifya kubomfya bwino iyi broshuwa, nalimo mukamona ukuti isuma sana iyo mukalabomfya mu kusambilisha abantu icine!