Ifyebo Fyaumfwika Kuli Bambi

ILYO mulelanda, te kulanda fye ifyebo. Esheni ukulenga ifyo fyebo fyumfwike kuli bakomfwa. Ici kuti camwafwa ukumfwana na bo bwino, nampo nga mulelanda ku cilonganino nelyo ku bashili Nte.

Kwaba ifingi ifilenga ico mulelanda ukumfwika. Fimo fyalilandwapo mwi Sambililo 26, “Ukulanda na Mano.” Fimbi nafilandwapo mwi Sambililo 30, “Ukwangwa Abantu Mulelandako.” Muli lino isambililo, twalalanda pa fishinka na fimbi.

Amashiwi Yayanguka, Imilandile Yayanguka. Amashiwi yayanguka na masentensi ayepi e yabomba bwino sana mu kulanshanya. Ilyashi lya pa Lupili ilya kwa Yesu lyaba ca kumwenako cawamisha ica lyashi ilyo abantu bengomfwa te mulandu ni bani nelyo ni kwi bekala. Ico alesosa kuti caumfwika icipya kuli bene. Lelo kuti baumfwikisha ifyo Yesu alesosa pantu alelanda pa milandu yakuma ifwe bonse: ifya kuba ne nsansa, ifya kumfwana na bambi, ifya kucita pa masakamika, ne fya kusanga ubufwayo mu bumi. Kabili alandile ifishinka fyakwe mu lulimi lwayanguka. (Mat., ifipa. 5-7) Kwena, Baibolo yalikwata ifya kumwenako ifingi ifya malyashi ayatali na yepi kabili ayalandilwe mu nshila shalekanalekana. Ubuyo bwenu bufwile ukuba bwa kulanda ifyalondoloka kabili ifyaumfwika.

Nangu ni lintu mulelanda pa fyebo fyakosa, ukufyangusha kuti kwalenga fyaumfwika bwangu. Kuti mwayangusha shani ifyebo? Mwieba ibumba ifyebo ifingi ifishilekabilwa. Teyanyeni ifyebo fyenu ica kuti fyasailisha ifishinka fikalamba pa kuti fyumfwike. Sakamaneni pa kusala amalembo yakumine sana ku fyo mulelandapo. Ukucila ukukwankwanya fye ukuyabelenga, yabelengeni no kuyalondolola kwi bumba. Mwifimbilikisha icishinka cisuma ku mashiwi ayengi.

Bomfyeni ifyo fishinte fimo fine ilyo muletungulula isambililo lya Baibolo ilya mu ng’anda. Mwiesha ukulondolola ifishinka fyonse fye. Afweni umusambi wenu ukumfwikisha ifishinka fipulilemo. Ku ntanshi, akasambilila ifishinka na fimbi ukupitila mwi sambililo lya pa lwakwe na ku kulongana kwa cilonganino.

Pa kuti mulande ifyebo mu nshila yayanguka, ukupekanya kusuma kulakabilwa. Mwe bene mufwile ukumfwikisha ifyebo muli no kulandapo nga mulefwaya bambi bafyumfwikishe. Nga namumfwikisha icintu cimo, kuti mwalondolola no mulandu cibelele fyo. Kuti mwacilanda na mu mashiwi yenu.

Londololeni Amashiwi Ayeni. Inshita shimo pa kulenga ifintu ukumfwika kano mwalondolola ubupilibulo bwa mashiwi yamo ayengaba ayeni kwi bumba lyenu. Mwimona kwati ibumba lyenu lyalishiba ifingi, kabili mwitila talyalamuka sana. Pa mulandu wa kusambilila Baibolo, pambi kuti mwabomfya amashiwi yamo ayengomfwika ayeni ku bantu bambi. Nga tamulondolwele ukuti amashiwi pamo nga “abashalapo,” “umusha wa cishinka kabili uwashilimuka,” “impaanga shimbi,” na “ibumba likalamba” yapilibula amabumba ya bantu, abashilongana ne Nte sha kwa Yehova teti beshibe. (Rom. 11:5; Mat. 24:45; Yoh. 10:16; Ukus. 7:9) Cimo cine na ku muntu uushabeleshanya no kuteyanya kwa Nte sha kwa Yehova, napamo takomfwikishe umwalola amashiwi pamo nga “kasabankanya,” “painiya,” “kangalila wa muputule,” na “Icibukisho.”

Amashiwi yamo aya mu Baibolo ayo na bashili Nte babomfya sana kuti yakabila ukulondololwa. Abengi batila “Armagedone” ni nkondo ya manyukiliya. Kuti batila “Ubufumu bwa kwa Lesa” bwaba fye mu mutima wa muntu nelyo ukuti bwaba ku muulu lelo te buteko. Nga mwatila “umupashi,” kuti batontonkanya ati e cilya cifuma mu muntu nga afwa caya mu kwikala kumbi. Ukulingana ne fyo iminshipendwa ya bantu basambilishiwa, “umupashi wa mushilo” muntu uwaba muli Balesa Batatu. Apo abantu abengi balifutatila ifipimo fya mu Baibolo pa lwa mibele isuma, kuti mwakabila ukubalondolwela pa kuti bomfwikishe umo Baibolo ilosha nga yatila: “Fulumuko bulalelale.”—1 Kor. 6:18.

Abantu nga tababelenga sana Baibolo, teti bomfwikishe nga mwatila fye, “Paulo alembele ati . . . ” nelyo nga mwatila “Luka atile . . . ” Napamo kuti balikwata umunabo nelyo umwina mupalamano uwitwa Paulo nangu Luka. Kuti mwalondololako ifingalanga ukuti uo mulelandapo mutumwa wa Bwina Kristu nelyo kalemba wa Baibolo.

Abantu muno nshiku bakabila ukwafwilishiwa libili libili pa kumfwikisha amalembo ayalimo ifipimo nelyo imyata ya ku kale. Ku ca kumwenako, nga mwalondolola ati icibwato ca kwa Noa calepele imikono imyanda itatu, mu bufumo cali imikono amakumi yasano, ne ciimo cali imikono amakumi yatatu, abantu teti bomfwe. (Ukute. 6:15) Lelo nga mwalondolola ifyo fipimo ukubomfya ifipimo na manambala babelesha uko mwikala, ibumba lyenu bwangu bwangu likelenganya ifyo icibwato cakulile.

Londololeni Apalekabilwa. Nga mulefwaya umulandu umfwike kwi bumba lyenu, kuti mwakabila ukulundapo fimbi, te kulondolola fye ubupilibulo bwa mashiwi yamo. Mu Yerusalemu, mu nshiku sha kwa Esra, ifyalebelengwa mu Malango fyalelondololwa. Pa kwafwa abantu ukumfwikisha ubupilibulo, abena Lebi baleilula no kulondolola ifyo abantu bengabomfya Amalango ku fintu balolenkene na fyo pali yo nshita. (Nehe. 8:8, 12) Ne mwe citeni cimo cine, londololeni amalembo mulebomfya no kulanda ifyo yengabomfiwa.

Pa numa ya mfwa yakwe no kubuushiwa, Yesu alondolwelele abasambi bakwe ukuti icacitike calefishapo Amalembo. Na kabili akomaile pa mulimo bali no kubomba apo bali ni nte kuli fyo fintu. (Luka 24:44-48) Ilyo mwayafwa abantu ukumona ifyo bengalula imikalile yabo ukulingana ne fyo basambilile, cikabangukila ukumfwa umo cilolele.

Ifyo Umutima Wabimbwamo. Kwena, nangu ca kuti namulanda ifyalondoloka, kwaba fimbi ifilenga umuntu mulelandako ukumfwa nelyo ukukanaumfwa. Nga ca kuti umutima wa uyo muntu walikutwa, ico cipindami icingamulenga ukufilwa ukukutuluka icasoswa. (Mat. 13:13-15) Ku bantu abafwaya ukumwena fyonse mu buntunse, ifya ku mupashi fya buwelewele kuli bene. (1 Kor. 2:14) Nga ca kuti umuntu alanga ukuti ali no mutima wa musango yo, kuti cawama ukuputula ukulanshanya pali yo nshita, mpaka inshita imbi.

Lelo, inshita shimbi umutima kuti waba uwakutwa pa mulandu wa mafya ya mikalile. Nga umuntu wa musango yo apeelwa ishuko lya kumfwa icine ca mu Baibolo pa nshita yalepa, umutima wakwe kuti wasuka wakutuluka. Ilyo Yesu aebele abatumwa bakwe ukuti ali no kufopaulwa no kwipaiwa, tabaumfwikishe. Mulandu nshi? Te cintu baleenekela kabili te co balefwaya! (Luka 18:31-34) Lelo, mu kupita kwa nshita, abatumwa 11 balyumfwikishe, kabili balangilile ico ukupitila mu kucita umwabela fintu Yesu abasambilishe.

Ifyo Imicitile Isuma Ibomba. Icafwilisha abantu ukumfwikisha caba fintu tusosa ne fyo tucita. Abengi pa kwibukisha umuku wa kubalilapo baile ku Ng’anda ya Bufumu, batila ico bebukisha sana caba kutemwana bamwene, te fintu baumfwile. Ne nsansa tulanga na sho shalyafwa abene mayanda abengi ukumfwa ku cine ca mu Baibolo. Ukumona ifyo abantu ba kwa Yehova baba ne cikuuku cabamo ukutemwa kuli bakapepa banabo ne fyo balangulukilako bambi mu kutemwa ilyo kwaba amafya, kwalenga bamo ukutila Inte e shaba no kupepa kwa cine. E ico ilyo muleesha ukwafwilisha abantu ukumfwikisha icine ca mu Baibolo, tontonkanyeni pali fyonse fibili, ifyo muli no kulanda na pa micitile yenu.