ISAMBILILO 2

Mulelanda Kwati Mulelanshanya fye

2 Abena Korinti 2:17

IFILI MULI ILI ISAMBILILO: Mulelanda mu cifyalilwa ukulingana ne fyo muleumfwa pa fyo mulelandapo ne fyo muleumfwa pa balekutika.

Ilyo mulepekanya mulepepa kabili mulepekanya bwino. Mulelomba Yehova pa kuti alemwafwa ukubika amano ku fyo mulepekanya ukucila ukubika amano kuli mwe bene. Mufwile ukubika amano ku fishinka fikalamba ifyo mulingile ukweba abantu. Mulelanda mu mashiwi yenu ukucila ukuyalanda filya fine fye yalembelwe.

Nga mwapekanya ukuyabelenga Baibolo nelyo ulupapulo lumbi, mulingile ukwishiba bwino ifyebo pa kuti muyefibelenga bwino. Nga ca kuti muleyabelenga ifyebo ifyo bayambula, mufwile ukubelenga ukulingana ne fyo muleumfwa pa fyebo mulebelenga, lelo tamulingile ukubelenga kwati muli mu cangalo.
Mulelanda no mweo onse. Muletontonkanya pa co abantu balingile ukumfwila ifyo mulefwaya ukubeba. Mulebabikako amano. Lyena, ifyo mwalaiminina, ifyo mwakulabomfya amaboko pa kulanda, ne fyo mwakulamoneka pa menso fya kulalanga ukuti namutemwa abalekutika kabili namubabikako amano.

Mwilamona kwati ukulanda mu cifyalilwa cimo cine no kulanda kwati ifyo mulelanda taficindeme. Amashiwi mulelanda ne fyo muleyalanda fifwile fyalanga ukuti ifyo mulelanda naficindama.
Mulelolesha abalekutika. Mulebalolesha nga ca kuti te kuti bakalipe nga mwabalolesha. Ilyo mulelanda ilyashi, mulelolesha umuntu umo na umo mwi bumba ukucila ukulatandanya fye amenso pe bumba.