AMEPUSHO UKUFUMA KU BABELENGA

Finshi ifilanga ukuti umusumba wa Yeriko baonawile pa numa ya kuushinga pa nshita fye iinono?

Yoshua 6:10-15, 20 yalanda ukuti ilyo abashilika abena Israele baile mu kusansa umusumba wa Yeriko, baleushinguluka umuku umo cila bushiku pa nshiku 6. Lelo pa bushiku bwalenga 7 bashingulwike umusumba imiku 7. Lyena Lesa alengele ifibumba fya Yeriko ifyali ifyakosa ukuwa, e fyo abena Israele baingile mu musumba no kuusansa. Bushe kwaliba ifyo abashula ifya kale basanga ifilanga ukuti umusumba wa Yeriko baonawile pa numa ya kuushinga pa nshita fye iinono nge fyo Baibolo yalanda?

Kale abashilika nga balefwaya ukusansa umusumba, baleushinga. Nga ca kuti umusumba baushinga pa nshita ntali, abekala musumba balelya fye ifya kulya ifyo baletutila. Abashilika nga basansa umusumba balesenda fyonse ifyo balesanga mu musumba kumo ne fya kulya. E mulandu wine abashula ifya kale bashasangila ifya kulya mu misumba ya ku Palestine iyo balesansa muli uyu musango, e lyo nga bafisanga fyaleba fye ifinono sana. Lelo mu fitantala fya musumba wa Yeriko mwena balisangilemo ifya kulya. Icitabo cimo citila: “Ifintu ifingi ifyo basangile mu fitantala fya musumba fyali fipe fye bumba e lyo ne fya kulya.” Icitabo cimo cine cilanda no kuti: “Tacaseeka ukusanga ifya kulya ifingi nga nshi mu fitantala nge fyo basangile mu Yeriko.”—Biblical Archaeology Review.

Baibolo ilanda ukuti abena Israele tabasendele ifya kulya ifyo basangile mu musumba wa Yeriko pantu e fyo Yehova abebele. (Yoshua 6:17, 18) Na kabili Baibolo ilanda ukuti abena Israele basanshile Yeriko ilyo abantu bapwile fye ukuseepa, ninshi abena musumba nabatutila ifya kulya ifingi. (Yoshua 3:15-17; 5:10) Ifi abashula ifya kale basangile ifya kulya ifingi mu Yeriko, bushininkisho bwa kuti abena Israele bashingile umusumba wa Yeriko pa nshita fye iinono nge fyo Baibolo yalanda.