ISAMBILILO 12

Mulebika Amano ku Balekutika Kabili Mulebalangulukilako

1 Abena Tesalonika 2:7, 8

IFILI MULI ILI ISAMBILILO: Inshila mulelandilamo ifwile ukulanga ukuti namutemwa abalekutika kabili mulefwaya ukubafwa.

Muletontonkanya pa bakalakutika. Pa kuti mukalande bwino ilyashi mulingile ukulatontonkanya pa mafya ayo abakalakutika bakwata. Muleesha ukwelenganya ifyo bomfwa.
Mulesala amashiwi ayasuma. Mulekoselesha abalekutika, mulebasansamusha, kabili mulebakosha. Mwilalanda amashiwi ayengabakalifya, kabili mwilalanda ifyabipa pa bashili ba Nte nelyo pa fyo basuminamo.
Mulelanga ukuti namubabikako amano. Ifyo mulelanda ne fyo mulebomfya amaboko filingile ukulanga ukuti namubika amano ku balekutika. Mulebika amano na ku fyo mulemoneka pa menso; mulemwentula.

Mwilaipatikisha ukumfwa ifyo mushileumfwa nelyo ukukukumya ifyo muleumfwa. Ilyo mulebelenga, muleumfwika ukulingana ne fyo ilyashi mulebelenga lilelandapo, lelo mwilalenga abantu balebika sana amano kuli imwe. Inshila mulelandilamo ifwile ukulanga ukuti muli ne cikuuku kabili namutemwa abalekutika.