Ukulongana kwa pa Cilonganino Ukubomfya Programu ya pa Intaneti

Amabuteko ayengi mwi sonde lyonse yalibikako ifunde lya kuti abantu belapalamana kabili yalikaanya no kulongana abengi pa cifulo cimo. Inte sha kwa Yehova balakonka aya amafunde. Kabili nangu ca kuti tabakumana pa cifulo cimo, balitwalilila ukulalongana. Pa kuti aba mu filonganino balelongana ukwabula ukukumana pa cifulo cimo, balabomfya amaprogramu ya pa Intaneti pamo nga Zoom.

Pa kuti tulelongana lyonse ukubomfya Intaneti, Ibumba Litungulula lyalisuminishe ukuti indalama musangula bashibomfye ku kusonkela programu ya pa Intaneti iyo beta ukuti Zoom, pa kuti ifilonganino filebomfya iyi program pa kulongana. Ifi Ibumba Litungulula lyacitile, fyalyafwile sana ifilonganino fimo ifishingakumanisha ukulipila indalama balipilisha pa kubomfya iyi programu. Indalama balipilisha aya amaprogramu, madola ya ku America 15 ukufika ku 20 nelyo ukucilapo (K270 ukufika kuli K360 nelyo ukucilapo.) Ifi ifilonganino ilingi line fyalebomfya fye programu ya Zoom iyo bashilipilisha. Iyi programu taisuminisha ukusuntinkanya abantu abengi kabili tayacingililwa sana. Nomba aba mu filonganino ifibomfya akaunti ya Zoom iyo icilonganino ca kwa Lesa calipila, balanonkelamo nga nshi. Pantu akaunti ya Zoom iyo balipila yalicingililwa kabili abantu abengi kuti babasuntinkanyako pa kulongana. Pali ino nshita ifilonganino ukucila pali 65,000 mu fyalo ukucila pali 170 filebomfya iyi akaunti ya Zoom iyo icilonganino ca kwa Lesa calipila.

Icilonganino ca Kairagi icaba mu musumba wa Manado, uwaba mu citungu ca North Sulawesi, ku Indonesia, calilekele ukubomfya programu ya pa Intaneti iyabula ukulipila no kutendeka ukubomfya akaunti ya Zoom iyo icilonganino ca kwa Lesa calipile. Munyinefwe Hadi Santoso alandile ukuti: “Na bamunyinefwe na bankashi abashaishiba sana ifya kubomfya amafoni, amatabuleti, na makompyuta, baleipakisha ukulongana, pantu pali ino nshita tabakabila ukuisuntinkanya ku kulongana imiku iingi ilyo balelongana.”

Ba Lester Jijón, Jr., baeluda mu cilonganino ca Guayacanes Oeste icabela mu Guayaquil, ku Ecuador, batile: “Apo bamunyinefwe na bankashi abengi bapiina, ifilonganino fimo nga tabakumanishe ukusonkela programu ya Zoom pa kuti baleibomfya pa kusuntinkanya aba mu cilonganino bonse ku kulongana. Nomba tuletasha icilonganino ca kwa Lesa pa kutulipililako programu ya Zoom iyo twingabomfya ku kusuntinkanya abantu abengi ku kulongana. Ici cilalenga tule-ebako na bantu bambi ukuti baleisuntinkanya ku kulongana kwesu.”

Ba Johnson Mwanza, baeluda mu cilonganino ca Ngwerere North, icaba mu musumba wa Lusaka, mu Zambia, balembele ukuti: “Bamunyinefwe na bankashi abengi balanda ukuti, ‘Ifi icilonganino ca kwa Lesa catulipililako programu ya Zoom, tafilenga fye twaikatana sana na bamunyinefwe na bankashi, lelo filalenga twalaumfwa no kuti Yehova alitutemwa kabili alitubikako amano.’”

Pa kulipila aya ama akaunti ya Zoom, icilonganino ca kwa Lesa cibomfya indalama sha kubomfya ku kusakamaninamo bamunyinefwe na bankashi abaponenwa na masanso ayakalamba. Ishi indalama bashifumya pa misangulo ya kuitemenwa iya kutungilila umulimo wa mwi sonde lyonse. Abengi basangula ishi imisangulo ukubomfya donate.jw.org. Tulemutasha nga nshi pa misangulo musangula, ishibomfiwa ku kwafwilisha aba bwananyina mwi sonde lyonse.—2 Abena Korinti 8:14.