Bushe Insapato Shenu Shilamulinga Bwino?
UWA MANO YA BUNTUNSE UMWINA ROMA ATILE: “Uufwele insapato ewishiba apo ilemoca.”
NI LILALI mwalekelesheko ukushita insapato? Bushe shaikele shani? Bushe shalilingile? Bushe mwalikokwele pa kusala? Bushe uubombela ku nsapato amwafwile shani? Bushe mwashitile pa mulandu wa fyo shapangwa ukucila ifyo shamulingile? Bushe shileikala shani nomba apo namushifwala pa nshita yalepako? Bushe shilocako pamo?
Ukushita insapato takwayanguka. Kabili ukushita insapato yalinga kumoneka nga ukwayafya. Mulandu nshi cabele fi?
Ukusala Insapato Ingalinga
Pa kubala, ni luli kwi ulukasa lwenu ulwakulapo—lwa ku kulyo nelyo lwa ku kuso? Bushe muletontonkanya ukutila yonse yalilingana? Tontonkanyenipo na kabili! Cimbi na co ica kutontonkanyapo ca kuti cila lukasa lwakwata imbali shine ishakumona pa kulinga insapato, ne shi mbali ni shi: apa kunyatila ilyo uletusha, apo umubili ulemenena nga nawiminina, apa kunyantila nga ulecita fimo, na palya umuntu omfwila ulukasa ngo lukulile nelyo ukucepa. Bushe ishi mbali shapusana shani?
Icitabo ca Professional Shoe Fitting cisoso kuti: “Apa kunyatila ilyo umuntu aletusha ni palya anyantila ilyo ekeleko.” Nga fintu amashiwi ya kuti “apo umuntu alemenena nga naiminina” yalelanga, apa peshibikwa nga ca kuti umuntu naiminina. Ukwiminina kulalula ubukulu bwa lukasa no kumoneka kwa luko. Icitabo cambwilwe pa muulu citila: “Umuntu nga naikala ulukasa luba fye ulwanakilila nomba nga aiminina, ulukasa lulakosa no kukulilako.” Lelo kuli mbali na shimbi shibili.
Apa kunyantila nga ulecita fimo ni palya paluka-aluka—ilyo uleenda, ukubutuka, ukutoloka, nelyo ukutukushako umubili kumbi. Ici “cilenga ulukasa ukupusana ubukulu ne mimonekele.” Ulubali lwa bune ni palya umuntu omfwila ulukasa ngo lukulile, ululanda pa fyo ulukasa lukulilako nelyo ukucepa nga na kukaba, ukutalala no kubomba. Ifi filenga ulukasa lwakulako panono. Caumfwika kanshi ukuti cilawama nga wafuula insapato pa mpela ya ubo bushiku, maka maka nga ufwele ishilingile bwino! E fyo ilingi line ciba.
Bushe Mupima Shani Amakasa Yenu?
Pa myaka iingi, Eric aleshita insapato namba 10 na hafu nelyo 11 kabili yalelinga na mu bufumo. Pali ilya ine nshita, alecushiwa lyonse ku citusha cali pa kakondo no lwala lwaingile mu nkanda ku cikondo cikalamba ica ku kuso. Uwalemundapa amolu amwebele ukuyapimisha amakasa ku waishiba ifya kulinga insapato. Icapapwishe Eric ca kuti ulusapato lwali no kumulinga bwino ni namba 12 na hafu, e kutila namba A! “A” imininako ulukasa lunono. Bushe insapato nga nailinga mu butali na mu bwipi ninshi calaala capwa ili fye bwino? Kuti mwapima shani amakasa yenu?
Icisolobelo caseeka mu fyalo fimo ica kupiminako ubukulu bwa lukasa citwa Brannock. (Moneni icikope.) Ici kuti cabomfiwa ku kupima ifintu fitatu ifyacindama: ukulepa kwa lukasa, ukufuma pa citende ukufika pa nkolokoso, na mu bufumo bwa nkolokoso. Lelo kwena, cila lukasa lwalipusana ifyo lumoneka na fintu lwakula. E mulandu wine tulingilamo insapato ilyo tushilashita. Apa na po epaba ubwile. Bushe mwalitala amulingapo insapato isho mwatemenwe sana e lyo mwasanga ukutila shilepatako pamo? E lyo uuleshitisha amweba ati: “Shikakula.” Ilyo papita fye inshiku ishinono nelyo imilungu ukutula apo mwatendekele ukushifwala mwalila ica mukolele. Awe ne fitusha fya ku tukondo fyatendeka, no lwala lwaingila mu nkanda!
Bushe Mushita Ishimulingile Bwino?
Bushe kuti mwasanga ishimulingile bwino? Icitabo ca Professional Shoe Fitting cilasuka bwino bwino ukuti awe. Mulandu nshi? “Pa mulandu wa kuti kwaba ifyapusana ifingi. . . . Takwaba umuntu uwakwata amakasa yabili ayalingana, ayamoneka cimo cine no kubomfiwa mu nshila imo ine.” E co nga ca kuti ulusapato nalulinga bwino ulukasa lwenu ulukalamba, teti lulinge bwino ku lukasa lumbi. “Ici tacilanga ukuti teti tusange ulwalinga, lelo tufwile ukupoosako amano pa kusala insapato yalinga bwino.”
Nga mulefwaya ukwishiba apo amakasa yenu yekata sana mu nsapato, bebeteni insapato shimo mwalefwala kale. Moneni mu kati ka nsapato. Ni pi lwapwile sana? Ilingi line mukamona ukuti ni palya pekala icitende, ku numa ya citende, na pa nshi ya tukondo. Bushe ici cilolele mwi? Cilolele mu kuti “insapato mumo mumo tayabililwe ukulingana ne mbali shimo isha lukasa. Imbali shimo shilalepuka sana lelo shimbi shishala fye ishituntulu.”
Imipangilwe ya mulya mupita intambo nayo ilenga insapato ukulinga bwino. Bushe mwalimona ukuti insapato shimo shakwata imisango yapusanapusana iya mulya mupita intambo? Ukupangwa kumo ukwa mulya mupita intambo ukwitwa bal style kulenga insapato ukwikata sana lwa pe samba. Lelo, nga ca kuti mwakwata amakasa ayakalamba, insapato ingamulinga bwino ni ilya itwa ati blucher style, apo iyi nsapato yakwata imbali shibili ishatalukana. (Moneni icikope) Mulandu nshi ici cacindamina? Icitabo cimo cine citila: “Ilingi line icilenga icitende ukukalipa mu nsapato mulandu wa kutila naicepa sana pa milomo, no kulenga icitende ukufyenenkana.”
Ngo Tukokolo Ututali Utwa Banakashi?
Utukokolo tutali abanakashi batemwa tulenga umubili waba ifyo ushali. Utukokolo tutali twalula ifyo umuntu eminina, ilingi line akongamina ku ntanshi, no kulenga amakufi ukubeyama pa kuti umubili ushikimane. Utukokolo tutali tulenga ne mishipa ya muli kapafu ukukosa ica kuti kalamoneka sana.
E co, akakokolo ilingi line kalicindama ku nsapato ya mwanakashi kabili ekalenga no kutila aleumfwa bwino nelyo ukukanaumfwa bwino nga nafwala. Icitabo ca Professional Shoe Fitting cisoso kuti kwabe fintu fitatu ifilenga ukupanga insapato sha tukokolo: ‘(1) “ukulepelako,” (2) ukuyembelako—e kutila na ko kalayemfeshako ulusapato, na (3) ukumoneka bwino—e kutila utukokolo twa banakashi ututali tulenga amolu yalamoneka bwino.’
Abanakashi bafwile ukupoosa sana amano ku fyo akakokolo kasululwike, pantu ekalenga ukwishiba apo ukufina kwa mubili kulefikilila pa citende. Nga ca kutila akatende kafininina ku numa nelyo ku ntanshi sana, kuti mwatumbuka ifyabipa. Mulandu nshi cingabele fyo? Pantu akakokolo kuti kashelemuka no kulenga umuntu ukupona icabipisha.
Pali ifi twalandapo fye ifinono, twamono kuti pa kushita insapato iingalinga bwino, inshita ilafwaikwa nalimo ne ndalama na shimbi, apo pa kupanga insapato iisuma palapooswa inshita iikulu. Lelo insapato shenu kuti shalenga ukuumfwa bwino no bumi bwenu kuti bwawama. E co muleteko mutima pa kusala. Ishibeni ubukulu bwa nsapato mufwala. Muletekanya. Mwikopekwa ku mipangilwe nelyo imimonekele.
[Akabokoshi pe bula 30]
Ifyo Mufwile Ukutontonkanyapo pa Kusala Insapato
Ba William A. Rossi na ba Ross Tennant balanda iyi mitubululo mu citabo cabo ica Professional Shoe Fitting.
“Umulandu wa kupimina ulukasa te kwishiba ubukulu bwa lusapato lulefwaikwa kwati ni filya umo engatontonkanya.” Cinshi balandila ifi? Pantu fingi fikuma ubukulu bwa nsapato, pamo nga ubutali bwa citende, imipangilwe, imibililwe, ifyo babomfeshe, na kampani kapangile iyo nsapato. Ici ca cine maka maka pali ino nshita ilyo ifyalo filepanga insapato fifulishe kabili fikwete ifipimo fyalekanalekana.
Ilyo mulepima ubukulu bwa lukasa lwenu, muletintako insokoshi ku ntanshi pa kuti utukondo tatupeteme, icingalenga mwabepwa.
Bushe mufwile ukupimwa ubwikele nelyo ubwiminine? “Ukupima uuleshita nga naikalako kwalyanguka.” Kulenga mwabepwa. E ico, iminineniko ilyo balemupima amakasa. Pimeni amakasa yonse yabili. Mwitila ulukasa lwa ku kuso e lukulu. Pimeni yonse!
“Umulimo wa kulingisha insapato ukabila ubutukushi no kupyunga kwa bakanshiwa ababombela mu mashitolo kabili abaumfwikisha no kwishiba ubucindami bwa mulimo ukalamba uwa kulingisha insapato.”
[Ifikope pe bula 29]
(Nga mulefwaya ukumona ifikope, moneni muli magazini)
Imbali sha nsapato
imilomo ya nsapato
palya ulukasa lunyanta
pa nshi ya kakokolo
akakokolo
ica pa nshi
vamp
impapa ya mu kati iya ku citende
quarter
akatambo ka pa lutwe lwa nsapato
impapa ya kutukondo
icitende ca nsapato
mulya mupita intambo
vamp
umubilo
mu mbali ya ca pa nshi ya nsapato
[Ifikope pe bula 30]
Cimashini ca kupiminako ubukulu bwa lukasa
[Icikope pe bula 31]
Pa kupanga insapato, babomfya iyi misango 7
[Ifikope pe bula 31]
imisango yapusanapusana iya mulya mupita intambo
Umusango umo uwitwa Blucher
Umusango umbi uwitwa Bal