Akalongo ka Mucele

UULEMBA LOLENI! MU ZAMBIA

Cinshi mutontonkanya ilyo mwaumfwa uko balelanda pa mucele? Napamo mutontonkanya pa mucele wa mabwe, uwasekemuka, atemwa uwapeleka bwino bwino. Lelo bushe mwalitala amumfwapo ulwa mucele wa Cibwa, uufuma ku citungu ca Mpika ku Northern Province muno Zambia? Umucele wa Cibwa waliibela nga nshi pantu ufuma ku cani!

Abekala mupepi ne nika ya Cibwa balabomba umulimo waibela uwa kwenga umucele ukufuma ku cani icitali icimena mu lulamba lwa mumana wa Lwitikila. Balafuula ici cani ukutula mu August ukuyafika fye na mu October, ilyo imfula ishilaloboka. Imfula nga yaloboka, icani cilafumuka tacikwata umucele.

Ilyo bafuula icani no kucanika pa kasuba, balacoca pa kuti fimbi ifili mu cani fifwe. Lelo umucele wena taupya iyo. Uba mu mito. Balabike mito mu cipe, pamo nge nsupa, e lyo nomba balacemeka panono panono pa kuminsulula amenshi ukufumya mu mito. Amenshi yalasungulula umucele uutona mu tupunda utunono mwi samba lya nsupa. Icikonkapo nomba kuteka aya menshi yakauka pe shiko.

Balabuula amenshi umuli umucele no kuyateka pe shiko pa kuti amenshi yakaminwe e lyo umucele ushale weka. Ici cisenda mupepi na ma-awala 6. Pa kucite ci, balabala baitila amenshi ya mucele mu nongo no kuteka pe shiko. Amenshi nga yakaminwa, baletilamo na yambi, mpaka inongo yaisulamo umucele uwatikama. Inongo nomba iba kwati cikombola. Nga bateula inongo pa mulilo no kuitoba, icibulungwa ca mucele cilashala.

Ni kale sana abekala mushi kulya batampile ukwenga umucele wa Cibwa. Takuli nangu umo uwaishiba abatampile uyu mulimo. Lelo ica kupapusha ca kuti filya fine utwampani tukalamba twenga umucele pali nomba e fyo na bena Cibwa mu Zambia benga umucele wabo te mulandu no kuba ku mushi ukushailepela.

[Icikope pe bula 26]

Insupa ya kucemekamo amenshi ya mucele

[Icikope pe bula 26]

umucele

[Icikope pe bula 26]

akaIongo