Icipusho Icakosa Sana
“MULANDU NSHI CACITIKILA?” Cilaleta ubulanda ukumona amacushi abantu bakwata ayalenga baipusha ici cipusho! Ilingi abantu bepusha ici cipusho nga kwaba akayofi. Limo icikuuku ca mwela kuti capita mu cifulo cimo no kwipaya abantu e lyo no konaula ifikuulwa. Kuti kwaba icinkukuma icaonaula umusumba. Utupondo kuti twasansa abantu no kwalula imikalile ya bantu mu bushiku bumo fye ica kutila balaikala mwenso mwenso kabili balacula ku lukaakala. Nelyo kuti kwaba ubusanso ubwalenga umuntu wenu ukucenwa nelyo ukufwa.
Ilingi line ifi fintu filacitikila na ba kaele sana kabili abashingaicingilila. Muno nshiku utuyofi twa musango yu tulacitika sana kabili nga twacitika abantu abengi balilila Lesa abati, “Mulandu nshi cacitikila?” Moneni ifyo bamo basosa nga baponenwa akayofi:
◼ “Mwe Lesa cinshi mwacitile ici cintu kuli ifwe? Cinshi tucitile icimukalifye?” Inyunshipepala imo yatile nakulu bantu umo ku India alipwishe ifi fipusho ilyo inkuuka ilengwa ne cinkukuma ca pa menshi yaonawile umushi aleikalamo.
◼ “Bushe Lesa aciba kwi ilyo ifi fyacilacitika? Kabili nga ca kutila Lesa alikwata amaka, mulandu nshi alekela ici cintu ukucitika?” Aya e mepusho baipwishe mu nyunshipepala ya ku Texas mu United States of America, ilyo utupondo twali ne mfuti twapikile abantu mu calici no kwipaya bakapepa abengi.
◼ “Cinshi Lesa asuminishishe ukuti afwe?” Umwanakashi aipwishe ici cipusho ilyo umunankwe afwile ku bulwele bwa kansa, no kusha abalume beka na bana basano.
Te aba bantu beka abatontonkanya ukuti Lesa e ulenga ukutila balekwata amafya. Nomba line ilyo kwali ukwipusha abantu pa Intaneti pa lwa masanso yalengwa ne fyabumbwa pe sonde, abantu napamo hafu pa bo baipwishe batile utuyofi pamo nga ifikuuku fikalamba ifya mwela, tufuma kuli Lesa. Mulandu nshi abantu abengi basosela ifyo?
Abaya ku Mapepo na bo Tabaishiba Icilenga
Mu nshita ya kweba abantu ifyasuko fine fine, bashimapepo na bo limo balalenga abantu ukukanaishiba icishinka. Natulande pa fintu fitatu fye ifyo bashimapepo balanda.
Ica kubalilapo, bashimapepo abengi batila Lesa alaleta utuyofi pa kuti akande abantu abashumfwa. Ku ca kumwenako, mu United States ilyo icikuuku ca mwela icaleitwa ati Katrina caonawile umusumba wa New Orleans uwabela mu citungu ca Louisiana, bamo bashimapepo batile ni Lesa alekanda abekala muli uyu musumba. Batile muli uyu musumba mwali sana amafisakanwa, ifyangalo fya cela mushuke, no bupulumushi. Bamo balandile ati Baibolo yalilanda pa fya musango yu. Batile na ku kale Lesa alyonawile ababifi ku lyeshi na ku mulilo. Lelo ifyo te fyo Baibolo isosa.—Moneni umukululo uleti, “Bushe Utuyofi Tufuma Kuli Lesa?”
Ica bubili, bashimapepo bamo batila Lesa alikwata imilandu aletela utuyofi pa bantunse nomba ifwe te kuti tuyishibe bwino bwino nangu atweba. Abengi balafilwa ukusumina ukuti ici ca cine. Balapapa abati, ‘Bushe Lesa wakwata ukutemwa kuti acita ububi bwakule fyo e lyo akaana ukulanda umulandu acitile co ku bantu abafwaya icisansamushi kabili abepusha abati “Mulandu nshi ici cacitikila?”’ Baibolo yena itila: “Lesa kutemwa.”—1 Yohane 4:8.
Ica butatu, bashimapepo bambi batila nakalimo Lesa takwata sana amaka kabili tatemwa abantu. Ukusosa ifyo na ko kulaleta ifipusho ifikankaala. Bushe ‘Uwabumbile ifintu fyonse,’—pamo no muulu ne calo ifishaikulila ifi, kuti afilwa ukufumya ukucula pano calo? (Ukusokolola 4:11) Bushe Lesa uwalenga tuleba no kutemwa, uo Icebo cakwe calondolola ukuti aba no kutemwa ukwingi, kuti akaana shani ukumfwila abantu uluse ilyo balecula?—Ukutendeka 1:27; 1 Yohane 4:8.
Ifi fintu fitatu ifyo twalandapo e fimo fimo ifyo abantu balanda pa kulondolola umulandu Lesa asuminishisha ukucula. Pa myaka iingi, abantu abengi balipusha umulandu cabele fyo. Mu cipande cakonkapo, twalalanda pa co Baibolo isambilisha pali uyu mulandu wacindama uo abengi bafwaya sana ukumfwa. Nge fyo mwalamona, Baibolo yalilondolola bwino ico Lesa asuminishisha ukucula. E lyo kabili, Baibolo ilasansamusha bonse abalecula ku tuyofi tulecitika.
[Akabokoshi ne Cikope pe bula 4]
Bushe Utuyofi Tufuma Kuli Lesa?
Bushe Baibolo itila Lesa e uleta utuyofi tucitika muno nshiku? Awe te fyo isosa! Ifyo Lesa acita mu bupingushi bwakwe fyalipusana sana no tuyofi tulengwa ne fyaba pano calo. Lesa ena alasala; alamona imitima ya bantu kabili onaula fye ababifi. (Ukutendeka 18:23-32) Na kabili, Lesa alasoka abantu ilyo talaleta ubupingushi pa kutila apeele abalungama ishuko lya kupusuka.
Lelo utuyofi tulengwa ne fyaba pano calo, tucitika fye apabula no kusoka, kabili tulepaya no kucena abacite fyabipa na balungama bene. Abantu na bo balilenga utuyofi ukufula pantu balonaula isonde e lyo kabili balakuula na mu fifulo umuba ifinkukuma, bamulamba, ne fikuuku fya mwela.
[Abatusuminishe]
SENA VIDANAGAMA/AFP/Getty Images
[Icikope pe bula 4]
Imilandu intungulushi sha mapepo shatila e yalenga Lesa ukusuminisha ukucula tayalondoloka