Lesa Alatusakamana!

IFYO Lesa acitile ilyo kwali ukupondoka mu Edene, filanga ukutila alitutemwa sana fwe bantu bonse umo umo no kuti alafwaya tukekale bwino ku ntanshi. Moneni ifilanga ukutila Lesa alatusakamana, kabili buuleni Baibolo yenu mubelenge amalembo yali muli cino cipande.

❖ Alitupangila icalo no kubikamo ifintu ifisuma ifingi, inama ishisuma, e lyo no mushili uufumye filyo.—Imilimo 14:17; Abena Roma 1:20.

❖ Alitupeela umubili uusuma sana ica kuti tulaipakisha ifingi ificitika cila bushiku, pamo nga ukulya ifya kulya ifisuma, ukumona akasuba kalewa, ukumfwa umwana aleseka, kabili tulomfwa bwino umutemwikwa nga atwikata.—Amalumbo 139:14.

❖ Alatutungulula bwino pa kuti twaishiba ifya kucita nga twakwata amafya na masakamika.—Amalumbo 19:7, 8; 119:105; Esaya 48:17, 18.

❖ Alitupeela isubilo ilisuma sana, pamo ne cilolelo ca kwikala muli paradaise pano isonde e lyo no kumona abantu besu abafwa babuuka.—Luka 23:43; Yohane 5:28, 29.

❖ Atumine Umwana wakwe uwafyalwa eka ku kutufwila pa kuti tukwate isubilo lya kwikala umuyayaya.—Yohane 3:16.

❖ Alileeta Ubufumu bwa mu muulu ubo Mesia akalateka kabili alitulanga ifingi ifya kwishibilako ukutila Ubufumu bwalaswa butendeke ukuteka pano calo.—Esaya 9:6, 7; Mateo 24:3, 4, 7; Ukusokolola 11:15; 12:10.

❖ Alitweba ukuti tulepepa kuli ena, no kumweba fyonse ifili ku mutima, no kuti nga twapepa akulakutika.—Amalumbo 62:8; 1 Yohane 5:14, 15.

❖ Alalanga abantu libili libili ukutila alibatemwa kabili alabasakamana.—1 Yohane 4:9, 10, 19.