“Ukuliila Pamo Kulatwikatanya”

BUSHE mulaliila pamo no lupwa nangu fye umuku umo ubushiku bumo? Ica bulanda ca kutila, muno nshiku abengi tabaliila pamo no lupwa lwabo, cila muntu alya pa nshita iyo umwine alefwaya. Ukuliila pamo kulomfwika bwino kabili kuti kwalenga ulupwa ukulanshanya bwino bwino e lyo no kwikatana sana.

Ba Algirdas bekala na bena mwabo ba Rima, e lyo na bana babo abakashana batatu ku calo ca Lithuania icabela ku kapinda ka ku kuso aka ku Bulaya. Ba Algirdas batila, “Nangu ca kutila ndabomba e lyo abana na bo balaya ku sukulu, tulateyanya ukuliila pamo umulalilo. Ilyo tulelya, bonse tulashimika ifyacicitika pali ubo bushiku, ubwafya umo umo acikwata, ifyo aletontonkanya, ifyo alepanga ukucita, ifyo atemwa ne fyo apata. Pali iyi ine nshita tulalanda na pa fya kwa Lesa. Ukuliila pamo cine cine kulatwikatanya.”

Ba Rima balundapo ukutila: “Ukupekanya ifya kulya pamo na bana bandi abakashana kulalenga tulelanshanya ukufuma pa nshi ya mutima. Aba bana balomfwa bwino ukubomba na bo mu kicini e lyo pa nshita imo ine balasambililako imilimo imbi iyacindama. Kanshi nangu ni pa kubomba imilimo tusansamuka.”

Ba Algirdas, baRima na bana babo balasanga insansa pantu balaliila pamo umuku umo cila bushiku. Nga ca kutila mu lupwa lwenu tamucita ifyo, kuti cawama mwapekanya ukulaliila pamo nangu fye umuku umo cila bushiku. Na mwe bafyashi abashimbe kuti mulecita cimo cine. Mukasangamo ubusuma ubwingi mu kuliila pamo no lupwa.