Ukutantika kwa Lupwa—Ilembo lya Bushiku

¹ Abafyashi abatemwa abana balabombesha ukupekanishisha abana babo ifya kulya ifisuma. Ukupekanishisha abana ifya ku mupashi ukufuma mu Cebo ca kwa Lesa Baibolo kwacilapo ukucindama. (Mat. 4:4) Inshila imo iya kwafwilamo abana ukulafulukisha ifya ku mupashi pa kuti ‘bakulileko ukufika kwi pusukilo’ kukwata inshita cila bushiku iya kubebeta ilembo lya bushiku no kulandapo pamo ngo lupwa. (1 Pet. 2:2) Ni lilali mwingatantike ci mu kutantika kwenu ukwa lupwa?

² Pa Nshita ya ca Kulya: Nga ca kuti cila bushiku mulebalilapo ukulanshanya ilembo cikafwa ulupwa ukulatontonkanya pali Yehova inshita yonse. (Amalu. 16:8) Nyina umo atantike ukulabelenga no kulanshanya ilembo no mwana wakwe umwaume lintu alelya ica kulya ca lucelo e lyo no kupepela pamo nankwe ilyo talaya ku sukulu. Ne ci cakoseshe umwana ukukanaipoosa mu kupepa buluko no kusengauka ukusengasenga kwa bucisenene, no kumulenga ukupama ukushimikila ku banankwe na bakafundisha bakwe. Nangu ali fye eka uwali Nte pa sukulu, aleyumfwa kwati balipo abengi.

³ Nga ca kuti inshita ya lucelo teti mulanshanye ilembo, kuti mwatantika inshita imbi muli ubo bwine bushiku, limbi inshita ya ca kulya ca cungulo. Bamo e nshita intu balanda na pa fintu bakumanya mu kushimikila nelyo ifishinka basanga lintu balebelenga Baibolo pa lwabo. Abengi balebukisha isho nshita sha pa kulya ukuba inshita shimo isho balesansamukila pamo ngo lupwa.

⁴ Inshita ya Bushiku: Indupwa shimo, inshita isuma bakwata iya kubebeta ilembo lya bushiku ni lilya line fye bashilaya mu kusendama. Kabili iyi ilaba ni nshita isuma iya kupepela pamo. Lintu abana baleumfwa mwe bafyashi mulelanda pali Yehova no kupepa kuli wene, balamona no kuti cine cine e ko aba.

⁵ Shi Yehova amupaale lintu mulebombesha ukusambilisha abana benu icine ukupitila mu kubomfya bwino akatabo ka Ukubebeta Amalembo Cila Bushiku.