Bushe Mulanonkelamo mu Ukubebeta Amalembo Cila Bushiku?

Bushe lyonse mulabelenga ilembo lya bushiku mu katabo ka Ukubebeta Amalembo Cila Bushiku pa kuti mulepalama kuli Yehova? Nga tamubelenga, muleibikilishako ukulabelenga cila bushiku. Abengi babebeta cila ulucelo pa kuti baletontonkanya pe lembo lya bushiku akasuba konse ilyo balebomba imilimo imbi. (Yosh. 1:8; Amalu. 119:97) Finshi mwingacita pa kuti mulenonkelamo sana mwi lembo lya bushiku? Kuti mwabelengako ifikomo filiko pa ntanshi e lyo ne fikomo ifikonkele pe lembo lya ubo bushiku pa kuti mumfwikishe icilelandwapo. Kuti mwatontonkanya na pe lyashi lya mu Baibolo ilyampene ne lembo mulebelenga. Lyena kuti mwabomfya ifyo fyebo mu bumi bwenu. Nga ca kuti muleleka Icebo ca Lesa cilemutungulula mu bumi bwenu, mukaba ne nsansa.—Amalu. 119:105.

Ulupwa lwa pa Bethel mwi sonde lyonse babebeta ilembo cila bushiku ulucelo nga balya umwikulo. Mu myaka ya nomba line pa mulabasa wa JW Broadcasting^® balabikapo amapepo ya lucelo nga mwaya apatila AMAPROGRAMU YALEKANALEKANA. Ni lilali mwakutikeko ku mapepo ya lucelo? Nalimo ifyebo balandapo e fyo mulekabila pali iyo ine nshita. Natulangilile, bushe ilyashi lya kwa Lote kuti lyamwafwa shani ilyo mulesalapo ifya kucita?

TAMBENI VIDIO ITILA MWITEMWA ICI CALO (1 YOH. 2:15), LYENA ASUKENI AMEPUSHO YAKONKAPO:

• Bushe lishinte nshi ilya mafunde ya mu Baibolo apashimpilwe aya Amapepo ya Lucelo?

• Bushe ilyashi lya kwa Lote lilanga shani ububi bwaba mu kutemwa ici calo nelyo ifya muli ici calo?—Ukute. 13:12; 14:12; 19:3, 12, 13, 24-26

• Bushe kuti twalanga shani ukuti twalitemwa Yehova kabili tatwatemwa ici calo nelyo ifya muli ici calo?