Bebeteni Icebo ca kwa Yehova Cila Bushiku!

¹ Cila bushiku kulaba amafya na yambi aya kwesha icitetekelo cenu. Nalimo umwaume nelyo umwanakashi wa ku calo uo mwaishibana nankwe alamupatikisha cila bushiku ukuti muye nankwe ku kwangala. Bakafundisha balafwaya ukuti mukonkelele amasomo ya ku calo, nelyo abamwingisha incito balefwaya ukuti mulelundapo amaawala mubomba. Nalimo mulalwalilila. Nangu cingati aya mafya kuti yalemucusha, kwaliba uwingamwaafwa. Yehova kuti amupa amano ya kushipikisha. Ukubelenga ilembo lya mu Baibolo na mashiwi yalandilwepo mu katabo ka Ukubebeta Amalembo Cila Bushiku ni nshila imo iya kusambilila Icebo ca kwa Yehova lyonse. Bushe mulashukila iyi nshila?

² Ubwafilisho E ko Bwaba: Esaya 30:20 alondolola Yehova ukuti ni “Kasambilisha,” uo abantu ba kwa Lesa bengashintililapo ku kwafwiwa. Alamupa fyonse ifikabilwa ku kulwisha amesho ya citetekelo cenu. Amupeela mu nshila nshi? Icikomo cakonkapo citila: “Amatwi yenu yakomfwe cebo cafuma ku numa yenu, icileti, Iyi e nshila, e mo mwende.” Ilelo Yehova atuma ‘icebo’ cakwe ukupitila mu Malembo ne mpapulo sha “musha wa cishinka.” (Mateo 24:45) Mu fipande fya kale ifya mu Ulupungu lwa kwa Kalinda mweka mweka fye mwaba ifyebo fya mano ifyacindama, ifilanda pa mikalile yonse iya Bwina Kristu. Ukupituluka mu fipande fimo ifyalandwapo mu katabo ka Ukubebeta Amalembo Cila Bushiku kulamwafwa ukututilamo na fimbi mu butala bwenu ubwa kwishiba. Uko kwishiba kwalicindama icine cine ku kumwafwa ukulwisha amesho ya misango na misango.—Esa. 48:17.

³ Tantikeni Inshita ya Kubebeta Ilembo: Nangu cingati ifya kucita fyalemufulila ulucelo, nyina umo atantike ukulabebeta ilembo lya bushiku ilyo balelya ica kulya ca lucelo capamo na mwane umwaume. Amashiwi ye lembo lya bushiku ne pepo, e mashiwi alelekeleshako ukumfwa pa ng’anda cila lucelo ilyo ashilaya ku sukulu. Yalimukoseshe ku kukaana ukutunkwa ukucita bucisenene, ukukaana ukunakila ku kupepa icalo, no kushipa pa kushimikila ku bana be sukulu na bakafundisha. Nangu cingati alipo Inte eka pa sukulu, taleumfwa kwati ali eka.

⁴ Shintilileni pali Yehova ne Cebo cakwe ku kumutungulula. Nga mwacite co, akaba uwa cine cine kuli imwe, kwati fye ni cibusa mwacetekela. Landeni nankwe cila bushiku! Capamo na bantu bambi abengi nga nshi mwi sonde lyonse ababelenga Icebo ca kwa Lesa cila bushiku, lekeni amenso yenu ‘yalemona Kasambilisha wenu.’