Amapaalo Ayacindamisha Ukucila Ifyuma

BA JON balebomba incito ya pa muulu sana mu United States. Na lintu bali fye abalumendo, bale-enda mu fyalo ifingi kabili balepanga indalama ishingi sana. Bena na bakashi babo balikwete ing’anda iisuma nga nshi e lyo baleikala bwino. Abengi baletila fye ba Jon na bena mwabo balipaalwa icine cine.

Bambi na bo ni ba Kostas.a Bali pa bantu 80 fye abasalilwe pa bantu 5,000 ukuti balebomba no kusambilila imilimo mwi banki lya lulumbi ku Europe. Mu myaka fye inono balipeelwe ififulo fya pa muulu ifyalekanalekana, na mu kulekelesha e balelolekesha pali dipatimenti iikulu sana mwi banki limbi. Ilyo balekele iyi ncito no kutendeka akampani kabo, ninshi mu mwaka umo balakwata indalama ishingi ukucila isho abengi bakwata mu bumi bwabo bonse. Baleimona fye ati balipaalwa.

Lelo aba twalandapo, bonse babili balimona ukutila kwaliba amapaalo ayacindamisha ukucila ifyuma. Ku ca kumwenako, pali ino nshita ba Jon, bali-ipeelesha ukusambilisha abantu Baibolo pa kuti bengapalama kuli Lesa. Ba Jon batile, “Nali-imwena ne mwine ukuti icuma tacileta insansa. Nga wabika sana amano ku kunonka icuma no kucisunga, takuba nshita ya kucita ifintu fimbi. Lelo ukukonka ifyo Baibolo ilanda kulaleta amapaalo ayengi pantu icupo cilaba ica nsansa, amasakamika yalacepa, na kampingu alaba umusuma.”

Ba Kostas na bo batile: “Lesa tafwaya twabika fye amano ku kututila ifyuma. Naishiba ukuti nga atupeela ificilile pa fyo tukabila sana mu bumi, ninshi ifyapulamo tulingile ukufibomfya ukulingana no kufwaya kwakwe.” Ba Kostas no lupwa lwabo balitendeka ukusambilila ululimi lumbi pa kuti balesambilisha abantu na bambi Baibolo. Batile: “Twalimona ukuti, mwaba insansa ishingi mu kupeela ukucila ishaba mu kupokelela.”—Imilimo 20:35.

Ba Jon na ba Kostas balimona bwino bwino ukuti amapaalo ayafuma kuli Lesa yalicindamisha ukucila ifyuma. Ba Daniel Gilbert, abasoma sana kabili ababa pe sukulu likalamba ilya Harvard University, batile, abasambilila imitontokanishishe ya bantu, “balipoosa imyaka iingi sana ukufwailisha nga ca kutila ifyuma filaleta insansa nelyo iyo, kabili basanga ukuti nga kukonka fye, ifyuma fisansamusha abantu nga ca kutila fyapwisha ubupiina bwabo batampa no kwikalako bwino.” Lelo basosele no kuti, “Pa numa ya ici, ifyuma tafibaletela insansa.”

Ico Abengi Benekela Icishicitika

Umuntu umo uwatontonkanyapo sana pa ficitika atile, “ilyo umuntu afuma mu bupiina, atendeka ukwikala bwino, indalama akwata nangu shafulilako, ku ca kupapusha tashimuletela insansa.” Mu myaka yafumako, uulemba amalyashi umo alimwene ukuti ici ca cine, ilyo alanshenye na Andrew Carnegie, uwatendeke akampani kalepanga inshimbi kabili uwali pa bantu abakankaala sana muno calo. Carnegie aebele uyu kalemba ukuti: “Abantu tabafwile ukunkumbwa. Bushe icuma candi cilangafwa? Ndi ne myaka 60 kabili nga nalya ifya kulya, tafisunguluka. Nga kuti nashita ubulumendo nelyo ubumi, kuti napoosapo indalama shishaifulila shonse isho nakwata.”

Kalemba wa malyashi lyene atile: “Ba Carnegie apo pene balipilibwike kabili balandile mwi shiwi lya mu nshi, kabili ilya cifukushi no bulanda sana abati, ‘Nga balashita ubumi, kuti nashitisha fyonse ifyo nakwata pa kuti fye nshite ubumi busuma na kabili.’” Ba J. Paul Getty, abakwata indalama ishingi sana ishifuma ku bukwebo bwabo ubwa kushitisha oilo, na bo balisumine ici cishinka ilyo batile: “Nga kukonka fye, indalama tashileta insansa. Ilingi line shileta fye ubulanda.”

Na imwe limbi kuti mwasumina ifyalandile kalemba wa Baibolo uwalombele Lesa ukuti: “Mwimpeela ubupiina nangu ifyuma. Lekeni ndye ifya kulya ifyaninga, epali naikuta no kumusuula no kutila: ‘Nani Yehova?’ kabili epali naba umupiina no kwiba kabili naseebanya ishina lya kwa Lesa wandi.”—Amapinda 30:8, 9.

Imfumu Solomone iya ku kale yatile: “Nacindeme ukucila bonse abantangilile mu Yerusalemu.” Nomba umfweni fimbi ifyo iyi mfumu yalandile. Yatile: “Fyonse fya fye kabili kuuma fye umwela.” Imfumu Solomone yakonkenyepo ukusosa aiti: “Ipaalo lya kwa Yehova lilacindamika, kabili talundako ukucululuka.”—Lukala Milandu 2:9-11; 5:12, 13; Amapinda 10:22.

Ifyo Twingacita pa Kuti Tukapaalwe Umuyayaya

Kanshi pa kukwata insansa sha cine cine kano twaba ifibusa fya kwa Lesa. Nga twabika Lesa pa ntanshi muli fyonse ifyo tucita, ubumi bwesu bukawama kabili tukaba ne nsansa sana.

Ubusuma bwa kuti, indalama tashakatwalilile ukutusakamika. Baibolo yalitulaya ukuti ku ntanshi amakwebo ya bufumfuntungu yakapwa umupwilapo. (1 Yohane 2:15-17) Mu calo cipya ica kwa Lesa icikesa, tukalatekwa mu bulungami. Icalo cino cikasanguka paradaise nga filya fine Lesa alefwaya ukuti cibe ilyo abikilemo Adamu na Efa. Ala cikawama ukumona isonde lyonse lyaisulamo insansa, umutende no kutemwa!—Esaya 2:2-4; 2 Petro 3:13; 1 Yohane 4:8-11.

Pali ilya nshita pa calo pakawama sana ukwikalapo. Tukaba ifibusa fya kwa Lesa kabili Lesa akatupeela ifintu ifisuma ifingi ifyo tukasekelamo ilyo akafikilisha ubufwayo bwakwe ubwa kuti abantu bakekale pe sonde lya paradaise umuyayaya. Lesa alitulaya ukuti abantu bonse pa calo bakakwata ifya kulya ifingi, amayanda, ne ncito ishisuma. Ubupiina bukafumapo umupwilapo.—Amalumbo 72:16; Esaya 65:21-23; Mika 4:4.

Onse uwatetekela Yehova Lesa umwine wa Baibolo ukufuma pa nshi ya mutima, takalengwe nsoni, akapusuka. (Abena Roma 10:11-13) Kanshi pali ino nshita kuti cawama ukulacita ifingatuletela amapaalo ayacindamisha ukucila ifyuma!—1 Timote 6:6-10.

[Futunoti]

[Amashiwi pe bula 8]

Nga twabika Lesa pa ntanshi mu fyo tucita, ubumi bwesu bukawama sana

[Icikope pe bula 8]

Ukubomfya bwino indalama kulaleta insansa mu bumi