2. Ubusaka Bulafwaikwa

BADOKOTA abalepula abalwele balasamba ku minwe, no kuwamya ifyo babomfya e lyo no kusunga umuputule balepwilamo abalwele uwa busaka pa kuti babacingilile. Na imwe pa kucingilila ulupwa lwenu mufwile ukusunga umo mwipikila umwa busaka e lyo ne fya kulya fifwile ukuba ifya busaka.

● Mulesamba ku minwe.

Akabungwe ka Public Health Agency aka ku Canada katile, “amalwele ayengi ayo abantu bambula pamo nga icifine, yafuma ku tushishi tuleta amalwele utuba mu minwe.” E ico mulesamba sana ku minwe ne sopo ilyo mushilatendeka ukulya, pa kutendeka ukupekanya ifya kulya, na pa numa ya kubomfya icimbusu.

● Mulesunga kicini iya busaka.

Abafwailisha bamo basangile ukuti nangu ca kutila mu fimbusu mwali umwa busaka sana, “ku fintu pamo nga amafuso ya kusukila imbale no tusalu twa kupukutila imbale utuba mu kicini kwali utushishi utuleta amalwele utuba na mu busali.”

E ico mulewasha utusalu ne sopo mu menshi ayakaba no kuwamya mu kicini ne miti iipaya utushishi. Kwena tacayanguka ukucita ifi lyonse. Ba Bola abekala pa ng’anda apashaba amenshi ya kupompi batile: “Tacayanguka ukusunga kicini iya busaka. Na lyo line, tatumfwa akaso ukushita isopo e lyo tatumfwa no bunang’ani bwa kutapa amenshi, kanshi lyonse tulakwata isopo na menshi pa kuti kicini yesu na pa ng’anda paleba apa busaka.”

● Mulesamfya ifya kulya.

Ku fya kulya abantu bashitisha, limo kulaya amenshi ya fiko nelyo ifiko fimbi ififuma ku busali bwa bantu, na ku fintu fimbi ukuba utushishi utuleta amalwele. E ico mulesamfya umusalu e lyo ne fisabo fine ilyo mushilalya nangu ca kutila mulefyubula. Inshita ilafwaikwa pa kuti umuntu acite ifi. Ba Daiane, abekala ku Brazil batile: “Nga ndepekanya umusalu uo tulya ukwabula ukwipika, ndateka umutima pa kuti nausamfya bwino sana.”

● Mwilabika inama iibishi pamo ne fya kulya fimbi.

Pa kuti utushishi tuleta amalwele twilaya ku fya kulya fimbi, mulebika umunani pamo nga inama, inkoko, ne sabi fyeka. Mulefibika mu mapulasitiki no kukakapo bwino pa kuti tafisaakene ne fya kulya fimbi. Mwilabomfya umwele umo wine ku kuputula inama iibishi no kuputula ifya kulya fimbi kabili mwilabomfya ne ca kuputwilapo cimo cine. Pa kuputula ifya kulya fimbi, nga mulefwaya ukubomfya umwele ne ca kuputwilapo ifyo mwacibomfya pa kuputula inama, mulefisamfya sana ne sopo mu menshi ayakaba ilyo mushilafibomfya, na pa numa ya kufibomfya.

Twalanda ukuti, kicini ne fyo mulebomfya e lyo ne fya kulya fifwile ukuba ifya busaka, ukusanshako fye na imwe. Lelo, finshi fimbi mufwile ukucita pa kuti utushishi tuleta amalwele twilaya ku fya kulya ilyo mulefipekanya?

[Akabokoshi pe bula 15]

SAMBILISHENI ABANA BENU: “Tulasambilisha abana besu ukuti bafwile ukulasamba ku minwe ilyo bashilatendeka ukulya no kusamfya ifya kulya nga fyapona pa nshi nelyo ukufipoosa fye.” —Ba Hoi, aba ku Hong Kong