ILYASHI LYA PANO ISONDE

Israel

Ifyebo fimo pa Intaneti ifyali pali adresi ya Haaretz.com fyatile, abana abafyalwa no bulema ubo badokota balingile ukwishiba ilyo bashilafyalwa nomba tabakwete insambu ya kutwala ba dokota ku cilye ca milandu pali filya babalekele bafyalwa no bulema mu nshita ya kubepaila mu mala. Nomba abafyashi bena kuti batwala badokota ku cilye ca milandu pa mulandu wa kuti balilekele umwana wabo ukufyalwa icilema, pa kuti babalipile indalama sha kusungilamo no kukushishamo umwana uwalemana ubumi bwakwe bonse.”

Australia

Mu Australia, pa baupana abali 20, palaba 18 abatala baikala pamo ukwabula ukuupana.

Greece

Icipani ca buteko bwa Greece icilolekesha pa bumi bwa bantu catile, mu myeshi 5 iya kubalilapo mu 2011 impendwa ya bantu abaipeye yalikulileko mupepi na hafu ukucila abaipeye mu myeshi imo ine umwaka wafumineko uwa 2010. Pali iyi ine nshita e lyo no bunonshi bwa calo bwabwelele sana panshi.

United States

Akabungwe ka Natural Resources Defense Council katile mupepi na hafu ya fya kulya abantu bakwata mu United States filonaika. Ku ca kumwenako, abafwailisha batila ifisabo fimo tabafilobolola fyonaika fye, e lyo ne fyakulya fimo ifyo bepika mu fifulo fya kuliilamo limo tapaba na bafilya bafipoosa fye, kabili aba mu mayanda nabo balapoosa ifya kulya ifingi ifyo bashita.

Madagascar

Ku Madagascar balisanga kafulunyemba akacepesha mu calo conse. Aka kafulunyemba kaba fye ama milimita 29, kabili tumo pali utu tufulunyemba kuti twaikala na pa lwala lwa muntu. Pa mulandu wa kuti incende twikalamo baleyonaula sana ku bantu, utu tufulunyemba kuti twaloba.

[Abatusuminishe]

Fulunyemba: Frank Glaw/Zoologische Staatssammlung München/ Reuters/Newscom