ICIPANDE 3
Ifya Kupwisha Amafya
“Muletemwana nga nshi, pantu ukutemwa kufimba pa membu ishingi.”—1 Petro 4:8
Ilyo abantu baupana, balatendeka ukukwata amafya yalekanalekana. Limo icilenga aya amafya ni co balapusana mu fyo batontonkanya, mu fyo bomfwa nga kwacitika fimo na mu fyo bamona ifintu. Amafya yamo yafuma kumbi fye e lyo yambi yesa nga kwacitika ifyo bashile-enekela.
Limo kuti mwafwaya ukulacita ifintu kwati tamukwete amafya, lelo Baibolo itweba ukuti tulepwisha amafya. (Mateo 5:23, 24) Nga mulekonka ifyo Baibolo ilanda e lyo mukalapwisha bwino amafya.
1 MULELANSHANYA NGA MWAKWATA AMAFYA
IFYO BAIBOLO ILANDA: Kwaliba “inshita ya kusosa.” (Lukala Milandu 3:1, 7) Mufwile ukulakwata inshita ya kulanshanya pa mafya mukwete. Mule-eba abena mwenu ifyo muleyumfwa ne fyo muletontonkanya pa co mulelandapo. “Mulelanshanya icine” na bena mwenu lyonse. (Abena Efese 4:25) Nangu mukalipe shani, tamufwile ukulaumana. Nga muleasuka bwino, tamwakulaumanina na pa tuntu utunono.—Amapinda 15:4; 26:20.
Nangu mwafilwa ukumfwana, muleba no mutembo kabili muletwalilila ukutemwa no kucindika abena mwenu. (Abena Kolose 4:6) Mule-esha ukupwisha bwangu amafya kabili mwilaleka ukulanshanya.—Abena Efese 4:26.
IFYO MWINGACITA:
Mulesala inshita iisuma iya kulanshanya pa mafya
Abena mwenu nga balelanda mulekutikisha, mwilabacilima. Mulelolela mpaka inshita yenu iya kulanda yafika
2 MULEKUTIKA NO KUMFWA
IFYO BAIBOLO ILANDA: “Mube abatemwana nga nshi. Ku kucindikana ni mwe mubalilepo.” (Abena Roma 12:10) Calicindama ukukutikisha. Esheni ukumfwa ico abena mwenu balelanda, “mulelangulukilana. . . kabili muleicefya mu mitima.” (1 Petro 3:8; Yakobo 1:19) Mulekutika no mutima onse. Muleleka fyonse ifyo mulecita no kubika amano ku fyo abena mwenu balelanda. Nga cayafya, bebeni ukuti mwalalandapo inshita imbi. Nga muleibukisha ukuti abena mwenu te balwani benu lelo mufwile ukubombela pamo nabo pa kuti mupwishe ubwafya, ‘tamwakulakalipa bwangu.’—Lukala Milandu 7:9.
IFYO MWINGACITA:
Nangu tamutemenwe ifyo abena mwenu balelanda, twalilileni ukukutika no kwesha ukumfwa
Esheni ukumfwa umo balelosha. Moneni ifyo abena mwenu balecita pa kulanda
3 CITENI IFYO MWALANSHANYA
IFYO BAIBOLO ILANDA: “Mu kucucutika konse mwaba no busuma, lelo ukusosa fye ukwa milomo kulola ku kubulwa.” (Amapinda 14:23) Tamufwile ukupelela fye pa kusuminishanya ifya kucita. Mulingile ukulacita ifyo mwasuminishanya. Ici tacayanguka, lelo mulafuma ifisuma. (Amapinda 10:4) Nga mulebombela pamo, ‘mukalambulwa icisuma’ pa kubombesha kwenu.—Lukala Milandu 4:9.
IFYO MWINGACITA:
Landeni ifyo cila muntu akulacita pa kupwisha amafya
Nga papita inshita mulemona nga mulecita ifyo mwaumfwene