Ababelenga Ino Magazini Balepusha Ukuti

Bushe Inkondo Ya Armagedone Ni Kwi Ikabela?

Inkondo ya Armagedone tayakabele pa cifulo cimo icasalwa. Iyi nkondo ikaba fye icalo conse. Mulandu nshi? Pantu amabumba yabili ayakalwa iyi nkondo, yakalamba nga nshi ica kuti te kuti yabe pa ncende fye imo.

Armagedone, nelyo Har–Magedone, ikaba ni “nkondo ya bushiku bukalamba ubwa kwa Lesa Wa maka yonse.” Yehova Lesa akeeba Umwana wakwe, Kristu Yesu, ukulonganika bamalaika pa kuti bakalwe na bakateka babipa bonse pano calo.—Ukusokolola 16:14; 19:11-16.

Ifibanda fya kwa Satana fikacitapo fimo ifikalenga bakateka bakatunkwe ukuitumpa mu nkondo. Baibolo ilanda ukutila, “ifyebo fyapuutwamo ku fibanda” fiya “ku shamfumu sha pe sonde lyonse, ku kushilonganishisha ku. . . cifulo iciitwa mu ciHebere Armagedone.”—Ukusokolola 16:14-16.

Pa mabuuku yonse aya mu Baibolo, Ibuuku lya Ukusokolola e lyalondolola ifintu mu nshila ya kutila ababelenga balafwaisha ukwishiba umo filolele. Abengi abatila ifyaba mwi buuku lya Ukusokolola, tufwile ukufyumfwila fye mulya mwine bafilembela, balisonta incende imo iyo batila e pakabela inkondo ya Armagedone, kabili balipoosako sana amano ku ficitika mupepi na ilya ncende. Ili lyashi lya kuti Armagedone cifulo apakabela inkondo, lisangwa mu citabo cilanda pa mashiwi yaba mwi buuku lya Ukusokolola ico Oeconomus, umuGriki alembele mu myaka ya ba 500 C.E. Ici citabo, na nomba e po caba.

John F. Walvoord uwaletungulula akabungwe ka basambilila imipepele ya bantu aka ku Dallas, kabili uwasumina ukuti abantu tabafwile ukulondolola amalembo ya mu Baibolo, alandile ukutila Armagedone ikaba ni “nkondo ya kapeleko iye sonde lyonse iikabela ku Middle East.” Incende Walvoord alelandapo ukuti e pa kabela iyi nkondo ikalamba, ni palya paba “akapili beta ati ‘Megido.’ Aka kapili kabela ku kapinda ka ku kuso aka calo ca Palestine mupepi ne lungu ilikalamba.”

Lelo kwena, te kutila ibuuku lya Ukusokolola e lya kutulanga ukwaba incende ya cine cine iyo beta ati Armagedone. Na kuba amashiwi ya kubalilapo muli ili buuku yalanda ukuti ifyebo fyabamo fyalembwa mu “fishibilo.” (Ukusokolola 1:1) Kale sana Inte sha kwa Yehova balembele mu citabo cabo icitila Studies in the Scriptures, icalenga 4 ukuti: “Tatufwile ukwenekela ukuti abantu bakalongana kuli kalya Kapili ka Megido.”

Nga filya caleba mu nkondo sha kale isha ku Megido, na mu nkondo iyo Lesa akalwa na balwani bakwe, tapali umulwani uukapusuka. E ico pa nkondo ya Armagedone, Lesa akapwisha amafisakanwa pamo no bubifi bonse ifyaba pano calo, kabili tafyakatale afibako na kabili.—Ukusokolola 21:8.

Abatemwa Yehova Lesa no Mwana wakwe Yesu Kristu, tabafwile ukutiina Armagedone. Abo Lesa akakanda muli iyi nkondo, ni balya fye abo umwine aamona ukuti babifi abashifwaya na kupilibuka. Inkondo ya kwa Lesa tayakonaule ababifi kumo na balungama. Baibolo itila, “Yehova alishiba ukupokolola bakapepa” bakwe. (2 Petro 2:9) Pa Amalumbo 37:34 paba ubulayo butusansamusha ubutila: “Lolela Yehova, no kukomena mu nshila yakwe, na o akakusansabika ku kupyaninine calo; ababifi pa kufitwa, ukamonako.”