Bushe Kuti Mwa-asuka Ifi Fipusho?
Mulandu nshi Yuda bamupeelele indalama 30 isha silfere pa kuti afutuke Yesu?
Ilyo Yuda Iskariote akumene na bashimapepo bakalamba ku kumfwana indalama bali no kumupeela pa kuti afutuke Yesu, bashimapepo bamwebele ukuti bali no kumupeela “indalama 30 isha silfere.” (Mateo 26:14, 15) Ukushitisha Yesu mu ndalama shinono kwalelangilila ifyo bashimapepo bapatile Yesu ne fyo bamusuulile.
Ishi ndalama tulelandapo napamo shali mashekele ya silfere, indalama isho abaYuda balebomfya. Nomba, finshi umuntu ali no kushita mu mashekele 30? Amafunde ya kwa Mose yalandile ukuti amashekele 30 e yo abena Israele balingile ukushitamo umusha. Uyu wine mutengo e o baleshitamo ne mpanga.—Ukufuma 21:32; Mateo 27:6, 7.
Ilyo kasesema Sekaria alombele indalama abombele umulimo wa kucema abantu ba kwa Lesa, abena Israele abashali na cishinka kuli Yehova, bamupeele “indalama sha silfere 30.” Ifi bapeele kasesema wa kwa Lesa ishi ndalama shinono, balefwaya ukumulanga ifyo bamusuulile, ukulangilila ukuti balemumona fye kwati musha. E mulandu wine Yehova aebele Sekaria ukuti: “Ucipoose mu cipao—icilambu icikankaala ico nalingilwe kuli bene!” (Sekaria 11:12, 13) Filya Sekaria acitile ifyo Lesa amwebele, filenga twaibukisha ifyo Yuda acitile ne ndalama bamupeele ilyo afutwike uo Yehova asontele ukuba kacema wa bena Israele.—Mateo 27:5.
Bushe “kalata wa kulekana” uo Baibolo yalandapo e cinshi?
Mu Mafunde ya kwa Mose mwali amashiwi ya kuti: “Umuntu nga abuulo mwanakashi no kumuupa, na o tasangile ububile mu menso yakwe, pantu asanga muli wene icintu ca nsoni, kabili amulembela kalata wa kulekana, apeela na mu minwe yakwe, no kumuleka afume mu ng’anda yakwe.” (Amalango 24:1) Cinshi balelembela iyi kalata? Kwena Amalembo tayalanda ifyaleba muli yi kalata, lelo ifwile yalecingilila umwanakashi uo bakeene ku mulume.
Mu 1951 na 1952, kwali ifintu fya kale ifyalekanalekana ifyo basangile mu ncengo shaba ku kapinda ka kuso aka bemba iyakama iyo beta ati Murabbaat iyaba mu ciswebebe ca mu Yudea. Pa fyalembwa ifingi ifyo basangile kuli ilya ncende pali na kalata ya kulekaninapo iyo balembele mu ciAramaic kabili yali ya mu 71 nelyo 72 C.E. Kalata yalelanda pa fyacitike pa bushiku bwa kubalilapo mu mweshi wa Marheshvan, mu mwaka walenga 6 ukutula pantu abaYuda bapondokeele abena Roma. Joseph, umwana wa kwa Naqsan uwaleikala mu Masada, alekele Miriam, umwana mwanakashi wa kwa Jonathan uwaleikala mu Hanablata. E ico alikwete insambu ya kupwa ku muYuda umwaume uuli onse uo ali no kutemwa. Lyena Joseph abweseshe impango isho bamulipiile kuli Miriam no kumufuta imiku ine pa fipe fimbi ifyo Miriam aletele ukufuma ku mwabo ifyaonaike. Pa kulekelesha Joseph alisaine pali kalata, lyena pasaine ne nte shitatu—Eliezer, mwana Malka; Joseph, mwana Malka; na Eleazar, mwana Hanana.
[Icikope pe bula 25]
Incengo shaba muli bemba wakama uwa Murabbaat
[Icikope pe bula 25]
Kalata ya kulekana iya mu 71 nelyo 72 C.E.
[Abatumtuminishe Ukubofya Ifikope Fili pe bula 25]
Caves: Todd Bolen/Bible Places.com; certificate: Clara Amit, Courtesy of the Israel Antiquities Authority