Bushe Lesa Alitemwa Imipepele Yonse?
Abengi basuka ati:
◼ “Imipepele yonse ni nshila ishitungulula kuli Lesa.”
◼ “Icacindama kuba ne cishinka, te fyo wasumina iyo.”
Cinshi Yesu asambilishe?
◼ “Ingilileni pa mpongolo iyacepa; pantu umusebo uwaya ku bonaushi walipabuka kabili ukalamba, kabili bengi abapitamo; lelo impongolo iyacepa, no musebo uwaya ku bumi walicepa nga nshi kabili banono abausanga.” (Mateo 7:13, 14) Yesu tasumine ukuti imipepele yonse kuti yatupalamika kuli Lesa.
◼ “Abengi muli bulya bushiku bakatila kuli ine, ‘Mwe Shikulu, mwe Shikulu, bushe tatwasesemene mwi shina lyenu, no kufumisha ifibanda mwi shina lyenu, no kucitila ifipesha amano ifingi mwi shina lyenu?’ Lelo nkabebelapo nkatila: Nshatalile imwishiba! Fumeni apa mwe bampulamafunde mwe.” (Mateo 7:22, 23) Yesu tapokelela bonse abatila basambi bakwe.
ABABA mu mipepele iingi balitemwa sana ifyo basumina ne ntambi shabo. Lelo ciba shani nga ca kuti ifyo basambilisha tafilingene ne fyaba mu Cebo ca kwa Lesa, Baibolo? Yesu alilandilepo pa bubi bwaba mu kukonka intambi sha bantunse ilyo aebele bashimapepo mu nshiku shakwe ukutila: “Namulenga icebo ca kwa Lesa ukuba ica fye pa mulandu wa ntambi shenu.” E lyo nomba alandile amashiwi Lesa alandile aya kutila: “Aba bantu bancindika fye pa tunwa twabo, lelo imitima yabo yalitaluka kuli ine. Kwa fye ukupepa uko bampepa, pantu ifisambilisho basambilisha mafunde ya bantu.”—Mateo 15:1-9; Esaya 29:13.
Ifyo mwasumina fyalicindama, lelo ne mibele isuma na yo ine yalicindama. Baibolo ilanda pa bantu bamo abatila bapepa Lesa, aiti: “Basosa abati balishiba Lesa, lelo ku fyo bacita balamukaana.” (Tito 1:16) Na kuba, Baibolo ilanda pa bantu ba muno nshiku aiti bantu “abatemwa ukwangala ukucila ukutemwa Lesa, abamoneka kwati ni bakapepa lelo abakana amaka ya bukapepa; ku ba musango yu uletalukako.”—2 Timote 3:4, 5.
Ukuba uwa cishinka kwalicindama, lelo kwaba na fimbi ififwaikwa. Mulandu nshi? Pantu umuntu kuti aluba. Kanshi ukwishiba Lesa bwino kwalicindama. (Abena Roma 10:2, 3) Ukusambilila Baibolo no kulakonka ifyo ilanda kukatwafwa ukulasekesha Lesa. (Mateo 7:21) E ico, mu kupepa kwa cine mwaba ukuba ne cishinka, ukusumina ifya cine, no kulacita ifyalungama. Kabili ukucita ifyalungama kwalola mu kutila, ukulacita ukufwaya kwa kwa Lesa cila bushiku!—1 Yohane 2:17.
Nga kuti mwafwaya ukwishiba na fimbi pa fyo Baibolo itweba pali Lesa, landeni ne Nte sha kwa Yehova pa kuti balemusambilisha Baibolo pa mwenu ukwabula ukumulipilisha.
[Amashiwi pe bula 9]
Mu kupepa kwa cine mwaba ukuba ne cishinka, ukusumina ifya cine, no kulacita ifyalungama