Mulelanga Ukuti Mulatasha pe Shuko lya Kubombela Pamo na Yehova!

1. Bushe Yehova omfwa shani pa milimo yakwe, kabili ici cilenga acita cinshi?

YEHOVA mubomfi uwatemwa imilimo iyo abomba. (Amalu. 135:6; Yoh. 5:17) Alipeela abantu na bamalaika imilimo iisuma pa kuti nabo baleumfwa bwino no kukwata insansa ilyo balebomba iyi milimo. Ku ca kumwenako, ilyo alebumba ifintu aali no Mwana wakwe ibeli. (Belengeni Abena Kolose 1:15, 16.) Baibolo itweba ukuti ilyo Yesu ashilaisa pano calo aali pamo na Lesa ku muulu “ngo waishibisha imilimo.”—Amapi. 8:30.

2. Finshi filanga ukuti lyonse Yehova alepeela ifibumbwa fyakwe ifya ku mupashi imilimo iyacindama kabili iisuma?

² Ukutampila fye ne buuku lya Ukutendeka ukufika na kwi buuku lya Ukusokolola, Baibolo yalilanda pa fya kumwenako ifilanga ukuti lyonse Yehova alapeela abana bakwe aba ku mupashi imilimo. Ilyo Adamu na Efa babatamfishe mu Paradaise umo baleikala pa numa ya kubembuka, Lesa ‘abikile ku kabanga ke bala lya Edeni bakerubi, no lupanga lwa lubingu lwa mulilo ulwaleshinguluka ku kulinda inshila ya ku muti wa mweo.’ (Ukute. 3:24) Na kabili pa Ukusokolola 22:6 patila, Yehova “atumine malaika wakwe ku kulanga abasha bakwe ifili no kucitika bwangu bwangu.”

IMILIMO IYO APEELA ABANTUNSE

3. Bushe ilyo Yesu ali pano calo apashenye shani Wishi?

³ Ilyo Yesu ali pano calo, alebomba ne nsansa umulimo uo Yehova amupeele. Na kabili Yesu na o alepashanya Wishi ilyo apeele abasambi bakwe imilimo. Ilyo Yesu alebeba pa milimo iyo baali no kubomba ku ntanshi, atile: “Ndemweba icine cine, nati, Uuntetekela, na o akacita imilimo iyo ine ncita; kabili akacita imilimo iyacila pali iyi, pantu ine ndeya kuli Tata.” (Yoh. 14:12) Pa kubalanga ukuti iyi milimo yalingile ukubombwa bwangu, Yesu atile: “Tufwile ukubomba imilimo ya wantumine ilyo kucili akasuba; ubushiku buleisa ilyo umuntu nangu umo ashingabomba.”—Yoh. 9:4.

4-6. (a) Mulandu nshi twingatashisha Noa na Mose pa kukonka ifyo Yehova abebele? (b) Finshi ilingi line fifuma mu milimo yonse iyo Lesa apeela abantunse?

⁴ Na lintu Yesu ashilaisa pano calo, Lesa alepeela abantunse imilimo iisuma iya kubomba. Nangu ca kuti Adamu na Efa balifililwe ukubomba imilimo iyo bapeelwe, abantu bambi bena balibombele ukulingana ne fyo Lesa alefwaya. (Ukute. 1:28) Noa balimwebele ifya kupanga icibwato umo ifya mweo fyali no kupusukila Ilyeshi likalamba nga lyaisa. Alikonkele ifyo Yehova amwebele. Ala, tulatasha sana pa fyo abombele pantu nga tatwabapo na lelo!—Ukute. 6:14-16, 22; 2 Pet. 2:5.

⁵ Mose na o balimwebele ifyo alingile ukukonka pa kupanga icikuulwa ca mushilo ne fya kuteyanya umulimo wa bashimapepo, kabili alikonkele bwino sana ifyo bamwebele. (Ukufu. 39:32; 40:12-16) Na pali lelo tulanonkelamo mu fyo Mose abombele ulya mulimo ne cishinka. Tunonkelamo shani? Umutumwa Paulo alondolwele ukuti ifyali mu Mafunde fyalelanga ‘ifintu ifisuma ifyali no kucitika ku ntanshi.’—Heb. 9:1-5, 9; 10:1.

⁶ Imilimo iyo Lesa apeela abantunse ilapusanapusana ukulingana ne nshita pa kuti afikilishe ubufwayo bwakwe. Na lyo line, imilimo iyo abapeela ukubomba yalilenga ukuti Yehova acindikwe kabili yalilenga no kuti abantu abamutetekela bapaalwe. Ifi fine e fyali ne milimo iyo Yesu abombele ilyo ali ku muulu na lintu ali pano isonde. (Yoh. 4:34; 17:4) Imilimo tubomba pali lelo nayo ilalenga Yehova ukucindikwa. (Mat. 5:16; belengeni 1 Abena Korinti 15:58.) Cinshi twalandila ifi?

MULEITEMENWA UKUBOMBA UMULIMO ONSE UO LESA AMUPEELA

7, 8. (a) Milimo nshi imo iyo Abena Kristu babomba muno nshiku? (b) Bushe tulingile ukucita shani nga kwaba ukwaluka?

⁷ Ala kuti mwapapa nga mwatontonkanya pa fyo Yehova asuminisha abantunse abashapwililika ukuba ababomfi banankwe. (1 Kor. 3:9) Ababa mu mulimo wa kukuula Ifikuulwa fya Kulonganinamo Ukulongana Ukukalamba, Amayanda ya Bufumu, na maofeshi ya misambo babomfya amaka yabo pa kubomba iyi milimo nga filya fine Noa na Mose bacitile. Nampo nga mulebombako umulimo wa kuwamya Ing’anda ya Bufumu nelyo nga mulekuulako amaofeshi yakalamba ku Warwick, mu New York, mufwile ukulatasha pa kubombako iyi milimo. (Moneni icikope icili pa ntendekelo ya cino cipande.) Iyi milimo yonse ya mushilo. Lelo umulimo uo Abena Kristu abengi babomba, mulimo wa bukuule bwa ku mupashi. Uyu mulimo na o ulalenga Yehova alumbanishiwa kabili abantu abacumfwila balapaalwa. (Imil. 13:47-49) Mu cilonganino ca kwa Lesa e mo batusambilisha ifya kubomba bwino uyu mulimo. Pa kutusambilisha, inshita shimo nalimo kuti batupeela fye ne milimo imbi.

⁸ Lyonse ababomfi ba kwa Yehova aba cishinka balaitemenwa ukukonka ubutungulushi bwa kwa Lesa. (Belengeni AbaHebere 13:7, 17.) Inshita shimo, nalimo pa kubala te kuti twishibe bwino ifilelenga ukuti imilimo ilebombwa mu nshila iyo ilebombelwamo. Na lyo line, twalishiba ukuti tulingile ukukonka ukwaluka konse uko Yehova amona ukuti nakulinga.

9. Kuti twapashanya shani baeluda mu fyo babomba umulimo wabo mu cilonganino?

⁹ Ifyo baeluda batungulula ifilonganino e filanga ukuti balafwaisha ukucita ifyo Yehova afwaya. (2 Kor. 1:24; 1 Tes. 5:12, 13) Balaitemenwa ukubombesha no kwaluka ukulingana ne fyo ifintu fili. Balaitemenwa ukukonka inshila ishipya isho babeba isha kushimikililamo pa Bufumu bwa kwa Lesa ubwatendeka ukuteka. Nangu ca kuti baeluda bamo pa kubala baleshimunuka ukuteyanya ifya kushimikila ku cintubwingi, ukushimikila ukubomfya foni, no kushimikila pa cabu, balitemenwe ifyafuminemo. Ku ca kumwenako, bapainiya bane ku Germany baile mu kushimikila ku cifulo ca makwebo uko bakasabankanya bashashimikile pa nshita iitali. Ba Michael batile, “Tatwabalile atushimikilapo mu cifulo ca makwebo pa myaka iingi, kanshi twali no mwenso sana. Yehova afwile alishibe ukuti twali no mwenso, e co alitupaalile nga nshi bulya bushiku twaile ku kushimikila ulucelo. Ala mwandini twalitemenwe sana pantu twalikonkele ifyo batwebele mu Ubutumikishi Bwesu Ubwa Bufumu kabili twashintilile pali Yehova!” Bushe mulaitemenwa ukubomfya inshila ishipya isha kushimikililamo nga ca kuti ifintu mu cifulo mushimikilamo fyayaluka?

10. Kwaluka nshi ukwacitika mu cilonganino ca kwa Lesa muno nshiku?

¹⁰ Inshita shimo kulaba ukwaluka mu mibombele ya fintu mu cilonganino ca kwa Lesa. Muli ino myaka imisambo imo iinono balisala kabili imisambo iikalamba e ibomba imilimo iyo balebomba pa misambo iinono. Nangu ca kuti uku kwaluka kulalenga bamunyinefwe na bankashi abalebombela pali iyi misambo ukuteuluka mu fintu ifingi, tapapita na nshita bonse abo uku kwaluka kukuma balamona ubusuma ubwingi. (Luk. Mil. 7:8) Ala aba bakabomba ba kuitemenwa balasekelela nga nshi pa kuba ulubali lwa uku kwaluka ukulecitika pa kati ka bantu ba kwa Yehova!

11-13. Mafya nshi aba bwananyina bamo bakwete ilyo kwali ukwaluka mu cilonganino ca kwa Lesa?

¹¹ Kuti twasambililako amasambililo ayacindama ku ba bwananyina abo uku kwaluka pa maofeshi ya misambo kwakuma mu kulungatika. Bamo balibombele umulimo wa nshita yonse pa Bethel mu calo cabo pa myaka iingi nga nshi. Abaupana bamo abalebombela pa Bethel apali fye abantu abanono mu Central America babebele ukukuukila ku Bethel iikalamba, ku Mexico, ukwali bakabomba abengi sana. Ba Rogelio batile, “Calinkosele sana ukusha balupwa ne fibusa.” Munyinefwe Juan, na umbi uo baebele ukukuukila ku Mexico atile: “Cali kwati nafyalwa cipya cipya; pantu nalingile ukupanga ifibusa na balupwa bambi. Nalingile ukusambilila ntambi shimbi no kwaluka mu fyo naletontonkanya.”

¹² Ababomfi ba pa Bethel abalebombela pa maofeshi ya ku Bulaya abo baebele ukukuukila ku Bethel ya ku Germany na bo bene calibakoseele. Nga mwalitemwa ukutamba impili, e lyo mwingeshiba bwino ifyo cakoseele bamunyinefwe abo baebele ukufuma ku Switzerland uko babeleshe ukutamba impili sha Alpine. Abafumine ku Austria nabo pa kubalilapo balefuluka sana imikalile iisuma iyo babeleshe ku mwabo.

¹³ Aba bwananyina abakuukiile ku calo cimbi balingile ukubelesha imiputule ya kwikalamo iipya, ukubelesha ukubomba na bamunyinefwe na ba nkashi abo bashaishibe, e lyo nalimo baali no kusambilila ne fya kubomba imilimo imbi. Na kabili, balingile ukubelesha icifulo ca kushimikilamo icipya, icilonganino icipya, nalimo no kushimikila mu lulimi ulupya. Kwena calikosa ukwaluka muli ifi fyonse. Lelo bakabomba ba pa Bethel abengi bali-itemenwa ukwaluka. Cinshi calenga ukuti baaluke?

14, 15. (a) Bushe bamunyinefwe abengi balanga shani ukuti balatasha pe shuko lya kubombela pamo na Yehova, te mulandu no mulimo uo balebomba? (b) Kuti twabapashanya shani?

¹⁴ Nkashi Grethel atile: “Nalisumine ukukuukila ku Bethel imbi pantu nalefwaya ukulanga Yehova ukuti nalimutemwa sana ica kuti, kuti nasha icalo candi, icikuulwa nelyo ifintu fimo pa kuti imombe umulimo wakwe.” Nkashi Dayska na o atile: “Ilyo naibukishe ukuti ni Yehova antumine, nshashimunwike ukuya. Ba André na ba Gabriela nabo batile: “Twamwene ukukuukila ku calo cimbi ukuti lishuko na limbi ilya kulanga ukuti ico tufwaisha kubombela Yehova, te kucita fye ifyo imitima yesu ilefwaya. Na kabili twatile, ‘Nga ca kuti ifintu mu cilonganino ca kwa Yehova fyayaluka, caliwama ukukonkamo fye ukucila ukulashimunuka.’”

¹⁵ Nga kwaba uku kwaluka ukukumine imisambo, bakabomba ba pa Bethel bamo balabatuma ukuya mu kubomba bupainiya. Ifi fine e fyo cali kuli bakabomba ba pa Bethel abengi abalebombela pa misambo ku Denmark, ku Norway, na ku Sweden ilyo baisele iyi misambo no kukuushisha imilimo ku Bethel ya ku Scandinavia. Pali aba pali na ba Florian na ba Anja abatile: “Tumona ukuti uku kwaluka kusuma sana. Na kuba, icacindama sana kubombela Yehova te cifulo uko mulebombela. Ala ukulanda fye icishinka, twalipaalwa nga nshi!” Nangu ca kutila fwe bengi nalimo te kuti tukabile ukwaluka nge fyayalwike aba bamunyinefwe, bushe te kuti ciwame ukubapashanya mu fyo baitemenwa ukulabika Ubufumu intanshi? (Esa. 6:8) Lyonse Yehova alapaala abalanga ukuti balatasha pe shuko lya kubombela pamo nankwe, konse uko balebombela.

TWALILILENI UKULANGA UKUTI MULATASHA PE SHUKO MWAKWATA ILYA KUBOMBELA PAMO NA YEHOVA!

16. (a) Finshi tusambilila pe lembo lya Abena Galatia 6:4? (b) Lishuko nshi ilikalamba ilyo ababomfi ba kwa Lesa bonse bakwata?

¹⁶ Abantunse abashapwililika ilingi line balafwaya ukuilinganya ku bantu bambi, lelo Icebo ca kwa Lesa citweba ukubika amano ku milimo iyo twingaba na maka ya kubomba. (Belengeni Abena Galatia 6:4.) Fwe bengi tatwapeelwa amaka ya kutungulula mu cilonganino ca kwa Lesa. Na kabili, te bonse abengabomba bupainiya, bumishonari nangu fye pa Bethel. Ukulanda fye icishinka, aya mashuko ya mulimo, yasuma! Nomba tulingile ukwibukisha ukuti ishuko ilyacila pali yonse, lishuko ilyapeelwa ku babomfi bonse aba kwa Lesa, ilya kubombela pamo na Yehova mu mulimo wa Bwina Kristu uwa kushimikila. Ala mwandini tulingile ukulatasha pali ili ishuko lishaiwamina!

17. Apo twikala mu calo ca kwa Satana, mafya nshi twakulakwata, lelo mulandu nshi uo tushilingile ukufuupwilwa?

¹⁷ Apo twikala mu calo ca kwa Satana, te kuti tukwate ishuko lya kubomba imilimo yonse mu cilonganino ca kwa Yehova. Nalimo ukulwalilila, ukusakamana ulupwa ne fintu fimbi kuti fyalenga twafilwa ukubombako iyi milimo. Lelo ifi fyonse tafilingile ukutufuupula. Ala mwilamona kwati te kuti mubombele pamo na Lesa, na imwe bene kuti mwashimika ubunte pe shina lyakwe no kulenga Ubufumu bwakwe ukwishibikwa lyonse ilyo mwakwata ishuko. Icacindama kubombela pamo na Lesa apapelele amaka yenu no kupepelako aba bwananyina ababomba imilimo iyo imwe mushingabomba. Muleibukisha ukuti umuntu onse uulumbanya ishina lya kwa Yehova alicindama kuli ena!

18. Finshi ifyo tushifwile ukukonkelela, kabili mulandu nshi?

¹⁸ Nangu ca kuti tulalufyanya kabili tatwapwililika, Yehova alafwaya ukuti tulebombela pamo nankwe. Ala tufwile ukutasha pali ili ishuko twakwata ilya kulabombela pamo na Lesa muli shino nshiku sha kulekelesha! E ico, tatufwile ukukonkelela ififwaya imitima yesu, pantu Yehova akatupeela “umweo wine wine,” umweo wa muyayaya mu calo cipya umukaba umutende.—1 Tim. 6:18, 19.

19. Finshi Yehova atulaya ku ntanshi?

¹⁹ Tuli mupepi sana no kwingila mu calo cipya. Kanshi kuti cawama ukulatontonkanya pa mashiwi ayo Mose aebele abena Israele ilyo bali fye mupepi no kwingila mu Calo ca Bulayo, atile: “Yehova Lesa wenu akamupeela ifingi nga nshi mu milimo yenu yonse iyo mukalabomba.” (Amala. 30:9) Armagedone nga yapita fye, bonse abaali abacincila mu kubombela pamo na Lesa bakapyana icalo ico abalaya. Lyena tukatendeka ukubomba umulimo uupya, uwa kulenga isonde ukuba paradaise iisuma nga nshi!