Amepusho Ukufuma ku Babelenga

Ni mu nshila nshi umutumwa Paulo ‘asendelwe ku muulu walenga itatu’ na “ku paradaise”?—2 Kor. 12:2-4.

Pali 2 Abena Korinti 12:2, 3, Paulo alandile pa muntu “uwasendelwe ku muulu walenga itatu.” Bushe uyu muntu ali nani? Ilyo Paulo alembeele icilonganino ca mu Korinti kalata, alikomailepo ukuti ali mutumwa wa kwa Lesa. (2 Kor. 11:5, 23) Lyena alandile na ‘pa fipesha amano ifyo Shikulu alengele ukuti amone ne fyo amusokolwelele.’ Ilyo Paulo alandile pali ifi, talandilepo pa ba bwananyina bambi. Kanshi Paulo alelanda pali ena ukuti e muntu uwamwene ifipesha amano ne fyo bamusokolwelele.—2 Kor. 12:1, 5.

Kanshi Paulo e “wasendelwe ku muulu walenga itatu” kabili ‘e wasendelwe ku paradaise.’ (2 Kor. 12:2-4) Ilyo alandile ukuti ifyo Shikulu “ansokolwelele,” alelanda pa fyo amwebele ifikacitika ku ntanshi.

Bushe “umuulu walenga itatu” uo Paulo amwene ni cinshi?

Limo Baibolo nga yalanda pa “muulu” ilanda pa muulu uo tumona na menso. (Ukute. 11:4; 27:28; Mat. 6:26) Lelo limo nga yalanda pa “muulu” ilanda pa fintu fimbi. Limo umuulu wimininako imitekele ya bantunse. (Dan. 4:20-22) Nelyo kuti waimininako imitekele ya kwa Lesa ukubomfya Ubufumu bwakwe.—Ukus. 21:1.

Ni mwi Paulo aloseshe ilyo atile amwene “umuulu walenga itatu”? Limo limo Baibolo ilanda pa cintu imiku itatu pa kukomailapo. (Esa. 6:3; Esek. 21:27; Ukus. 4:8) Cimoneka kwati filya Paulo alandile pa “muulu walenga itatu,” alekomaila pa mitekele iisuma nga nshi iyacila imitekele yonse. Iyi mitekele Bufumu bwa kwa Mesia ubo Yesu Kristu e Mfumu kabili akalateka pamo na ba 144,000. (Moneni icitabo ca Insight on the Scriptures, Vol. 1, amabu. 1059 na 1062.) Nga filya fine umutumwa Petro alembele, tulolela “imyulu ipya” iyo Lesa atulaya.—2 Pet. 3:13.

Inga filya alandile pali “paradaise,” aloseshe mwi?

Ishiwi lya kuti “paradaise” na lyo kuti lyapilibula ifintu ifingi pamo nga: (1) Nga kulanda pa cifulo umo abantu baikele pa kutendeka, ili ishiwi kuti lyapilibula Paradaise iikaba pano isonde. (2) Kuti lyapilibula umutende uo abantu ba kwa Lesa bakakwata mu calo cipya. (3) Na kabili kuti lyapilibula ubwikalo ubusuma ubwa ku muulu, e kutila paradaise ya kwa Lesa nelyo “ibala lya kwa Lesa” ilyo balumbula pa Ukusokolola 2:7.—Moneni Ulupungu lwa kwa Kalinda ulwa July 15, 2015, ibu. 8. para. 8.

Paulo afwile alelanda pali ifi fitatu ilyo alandile ifyo amwene ifyalembwa pali 2 Abena Korinti 12:4.

Natulande mu kwipifya:

“Umuulu walenga itatu” uo balandapo pali 2 Abena Korinti 12:2 ufwile Bufumu bwa kwa Mesia ubo Yesu Kristu e Mfumu kabili akalateka pamo na ba 144,000. Ubu Ubufumu e “myulu ipya.”—2 Pet. 3:13.

Ubu Ubufumu “muulu walenga itatu” pantu busuma nga nshi kabili imitekele ya buko yalicila imitekele yonse.

“Paradaise” uko Paulo “asendelwe” mu cimonwa ifwile ipilibula (1) Paradaise iikaba pano isonde, (2) paradaise ya ku mupashi iikabako mu calo cipya, kabili abantu ba kwa Lesa bakaba sana no mutende ukucila uo bakwata pali ino nshita, na (3) “ibala lya kwa Lesa” nelyo “paradaise ya kwa Lesa” ku muulu iikabako pa nshita imo ine na paradaise iikaba pano isonde mu calo cipya.

Kanshi imyulu ipya ne sonde lipya, e fikapanga icalo cipya. Mu calo cipya, Ubufumu bwa ku muulu e bukalateka kabili abantunse abakaba muli paradaise pano isonde bakalabombela Yehova.