Ukucepa kwa Fya Kulya mwi Sonde Lyonse pa Mulandu wa Nkondo no Kwaluka kwa Miceele—Finshi Baibo Yalandapo?

Inkondo ku Ukraine, ukubikapo no kwaluka kwa miceele, na kulenga ifya kulya mwi sonde ukucepa sana. Nga ni mu fyalo ifilelunduluka mwena cileyafya sana ukusanga ifya kulya.

“Icilelenga sana cileyafya ukusanga ifya kulya ifingi, fimfulunganya, ukwaluka kwa miceele, ne mitengo ya fintu ukuya pa muulu.”—E fyalandile ba António Guterres, UN secretary-general, pa 17 July , 2023.
“Abasambilila sana balandile ukuti ifi icalo ca Russia calekele ukulatuma ifya kulya ku fyalo fimbi fili no kulenga ifya kulya mu fyalo ukucepa sana kabili ici cikalenga umutengo wa fya kulya ukuya pa muulu mu fyalo ifipiina, pamo nga mu North Africa na mu Middle East.”—E Fyalandile Lipoti ya Atalayar.com, pa 23 July, 2023.

Moneni ifyo Baibo ilanda pa fya kulya ukucepa e lyo ne fyo ifintu fikaba ku ntanshi.

Baibo yalisobele ukuti ifya kulya fikacepa

Yesu asobele ukuti: “Uluko lukemina uluko lubiye no buteko bukemina ubuteko bubiye, kabili kukaba ifipowe.”—Mateo 24:7.
Ibuuku lya Ukusokolola ilyaba mu Baibo, lyalilanda pali bakabalwe 4 e lyo ne fyo bemininako. Umo pali aba bakabalwe emininako inkondo. Lyena kabalwe uwakonkapo emininako icipowe, e kuti inshita ilyo ifya kulya fikacepa sana e lyo no kunina sana imitengo. “Naliloleshe, kabili, moneni! kwali kabalwe uwafiita; no waikelepo ali na sekelo mu minwe yakwe. E lyo naumfwile ishiwi . . . aliti, ‘Icipimo cimo ica ngano mu ndalama imo iya denari, ne fipimo fitatu ifya barle mu ndalama imo iya denari.’”—Ukusokolola 6:5, 6

Ifyo Baibo yasobele pa kucepa kwa fya kulya filefikilishiwa muli shino inshiku isho Baibo ita ukuti ‘inshiku sha kulekelesha.’ (2 Timote 3:1) Nga mulefwaya ukwishibilapo na fimbi pa “nshiku sha kulekelesha” na pa banina pali bakabalwe 4 abo Baibo yalandapo mwi buuku lya Ukusokolola, tambeni vidio itila Ifintu mu Calo Fyalyaluka Ukutula mu 1914 kabili belengeni ne cipande citila “Bushe Abaume Bane Abanina Pali Bakabalwe ni Bani?”

Ifyo Baibo ingamwafwa

Muli Baibo mwaliba ifyebo ifisuma ifingalenga twalashipikisha amafya tukwata, ukubikako fye na mafya ya kucepa kwa fya kulya e lyo no kunina kwa mitengo ya fya kulya. Moneni ifya kumwenako fimo mu cipande citila “Ifya Kucita pa Kuti Mulebomfya fye Indalama Ishinono Isho Mukwata.”
Baibo ilalenga twaba ne subilo lya kuti ifintu fikawama ku ntanshi. Yalitulaya ukuti kukaba inshita ilyo “Ingano shikafula nga nshi pano isonde” kabili bonse bakakwata ifyakulya ifingi. (Amalumbo 72:16) Pa kuti mwishibilepo na fimbi pe subilo lya kuti ifintu fikawama ku ntanshi, e lyo ne cingalenga mwaficetekela, belengeni icipande citila “Isubilo lya Kuti Ifintu Fikawama ku Ntanshi lya Cine .”