Yahwe Kyinfir Yosua I

Moses fyarkin er Israel fafisu swaf taun ḇe taun kwar, ma kerower kenkenem ḇyedi imnai. Yahwe ikofen yoḇ i, ’Na wun snonkaku Israel sya fa sisun ḇe Sup Ḇaḇeasas ya ḇa. Ḇape, na yaḇuk swaf ḇe au fa mam sup ani.’ Mura Moses dor Yahwe I fa kyinfir manfarkin ḇebabo fa myamfaduru er ani. Yahwe ikofen ḇo doḇo, ’Wasrow Yosua i ma wakofenḇair ḇe i iso yakinfiri.’

Moses ikofenḇair ḇe er anya kerower nari imarbursi ma Yahwe kyinfir Yosua i kwar fa fyarkin si ḇe Sup Ḇaḇeasas ani. Moses ikofen ḇe Yosua, ’Wamkak awer. Yahwe nari ifnoḇek au.’ Fyoroḇa mura, Moses dek ḇe Bon Nebo pum ya. Ro diwa Yahwe fyasnai ḇe i sup Ḇyeasas kwar faro Abraham, Ishak, ma Yakub. Moses imar fafisu ḇyeumur taun ri 120.

Yahwe dawos ḇe Yosua, ’Wambranuk Warḇeki Yordan ma rwaḇe sup Kanaan. Nari yafnoḇek au raris moḇ yafnoḇek Moses i raya. Wasya Sasoser Yena ro ras nakam. Ḇe bri ma wamkak awer. Rwamura ma wafrur rosai yawan kwar fa wafrurna.’

Yosua iwan manpaf risuru fa sumamfasis mnu Yerikho. Ro farfyar ḇeuser ya, nari komam rosai ḇeḇesya rodianya. Rofyor sukaḇer muma, sukofenḇadir iso swaf ḇepyum fa sisun ḇe Kanaan. Meser ya, Yosua iwan er ansi fa sfasos kaḇer rum kruben sena. Ramnai, iwan imam sya fa sikanow burua asas ma simbran ḇepon ḇe Warḇeki Yordan. Warḇeki ani isyap. Ḇape fyoro ḇa rofyor imam sya siwemna nsun ro warya dori, war ani idaf werḇa ma isyor! Imam ansi simbran ḇe warḇeki anya faduya ma sores ro diwa isof er ansikam simbranuk ḇe ḇar ya. Kakara bedi ido, mujisat ine ifrur fa sikswarapepen faro rosai Yahwe ifrur ro Soren Ḇerik anya ke?

Taun ḇe taun ḇenande raposa, insape snonkaku Israel sisun ḇe Sup Ḇaḇeasas ya. Siḇawes rum ma kota-kota sena. Sifrur yaf ḇo siker anggur knam, ma ḇesena. Sup ani ifo kuker sus ma madu.