FARKARKOR 46
Rosai Ḇefnai Kaku fa Buk Kenem Bena ḇe Yahwe I ma Bebaptis?
Buk kenem Bena ḇe Yahwe I kuker wakofenḇair yoḇ I ro nadi bo woḇe nari wakfarmyan ḇe I monda ma wafrur marisen Ḇyena ḇe roi ḇefandun syadi ro kenem Bena. (Mazmur 40:8) Wafrur roi ine kwar mande, insape na wakḇebaptis. Rarirya, nari snonggaku ḇesesya sifawi Auma buk kenem Bena ḇe Yahwe I kwar. Kun nyan fa kobuk kenem koḇena ḇe Yahwe ima roi ḇefarfnak risya ḇa. Rosai na ḇedif Au fa wafrur roi ḇefandun kaku ine?
1. Rosai ḇedif snonggaku oso fa byuk kenem ḇyeja ḇe Yahwe I?
Kobuk kenem koḇena ḇe Yahwe I kukro koswar I. (1 Yohanes 4:10, 19) Refo danunepen ḇe ko bo doḇe, ”Waswar [Yahwe] Allah ḇedi kuker sne ḇesiper ma rur bedi ḇesiper ma karkara ḇena ḇesiper ma samambraḇ bena kam.” (Markus 12:30) Kofasnai koswar Yahwe I ro rosai kawos na monda ḇa, mboi ro rosai kofrur na kako. Snon ma bin suswar su ido, nari susewar fa ras oso sufarḇuk. Imnis rarirya kako, saswar koḇena faro Yahwe I nari nadif ko fa kobuk kenem koḇena ḇe I ma koḇebaptis.
2. Barakas rosai na Yahwe byuk faro snonggaku ḇebaptis ḇe Saksi Ḇyesi?
Bebaptis kwar ido, nari waksun ro Yahwe kina Ḇyesi. Nari mam ro manggundaw Yahwe fyasnai saswar Ḇyena faro Au ro nyan ḇebor ma nari wafanam syadi ḇe I. (Kowasya Maleakhi 3:16-18.) Oso wer ido, nari nwa Yahwe I ḇe Kmami ma nwa naek srar ro supswan ine ḇesiper. Sima sakswar Yahwe I ma siswar Au kako. (Kowasya Markus 10:29, 30.) Kaku ḇae, roi ono fandun fa wafrur na rofyor bebaptis ḇaim. Ḇepon ya fandun fa mambir Yahwe I, waswar I, ma wakyar faro Roma Ḇyedi. Mura ido, insape buk kenem Bena ḇe Yahwe I. Wafrur roi nane kwar fa bebaptis ido, nari wasmai payamyum ḇekain fyoro. Refo ya doḇe koḇebaptis kada, nari kosmai kankenem ḇaido koḇye.—1 Petrus 3:21.
SWEWAR KAKU WER
Nari kawos rosai ḇefnai fa buk kenem Bena ḇe Yahwe I ma bebaptis ima roi ḇefandun kaku fa wafrur nairi.
3. Kokam fandun fa kokinfir mansei imbe kofarmyan ya
Ro fafisu naiwara, snonggaku Israel sia skara bisa sisyom Yahwe I ma sisyom kako allah ḇekaku ḇa, Baal i. Ḇape, Yahwe iwan nabi Ḇyedi Elia i fa ikofenḇair ḇe si snar kakara ḇeradinema kakara ḇesasar nairi. Kowasya 1 Raja 18:21, raimnai kawos fakfuken ine:
Rosai fandun fa snonggaku Israel sya skinfir ya?
Raris snonggaku Israel sya, ko kako fandun fa kokinfir mansei imbe kofarmyan ya. Kowasya Lukas 16:13, raimnai kawos fakfuken suine:
Rosai ḇefnai fa kopok kosyom awer snonggaku ḇaido roi oso ḇese mura koḇe kosyom Yahwe I wer?
Moḇsa kofasnai ḇe Yahwe I koma kokinfir fa kosyom I monda?
4. Kwara mura ro Yahwe saswar Ḇyena faro Au
Yahwe byuk roi ḇepyum nabor kaku ḇe ko kwar. Inja rosai na kakbuk yoḇ I? Komam VIDIO.
Rosai monda Yahwe ifrur kwar fa fyasnai saswar Ḇyena faro Au? Kowasya Mazmur 104:14, 15 ma 1 Yohanes 4:9, 10, raimnai kawos fakfuken suine:
Ro rosai Yahwe byuk kwar ḇe Au na, minsai besyowi kaku na?
Moḇsa ḇaḇir rai snar Yahwe byuk roi ḇepyum anna ḇe Au?
Snonggaku ḇese sbuk roi komarisen kaku na ido, nari kofasnai syowi kasumasa faro snonggaku ḇebuk roi anna ḇae. Kowasya Ulangan 16:17, raimnai kawos fakfuken ine:
Kwain kwara roi Yahwe ifrur kwar faro Au na ido, rosai imbe wakbuk yoḇ I?
5. Buk kenem Bena ḇe Yahwe ido nari wasmai barakas nabore
Snonggaku ḇebor ḇero baboine sya soḇe sismai snonsnon, sna fararur ḇepyum, ḇaido sna pipi fa nabor kada nari simarisen. Mboi roi ine kyaku ke? Komam VIDIO, raimnai kawos fakfuken nane.
Snon ḇero vidio insanja imarisen kaku ifnak bola, fama rosai ḇefnai fa ibur na?
Kyinfir fa byuk kenem ḇyena faro farfnak bola ḇa, imboi byuk nakam faro Yahwe I. Kwara ido roi ifrur nane napyum ke? Kwarem rarirya kukro?
Fafisu Manwawan Paulus dakḇe snonggaku Kristen ḇaime, daksasewar fararur ḇepyum na. Fyarkor sasoser Yahudi ma guru ḇyedi iso snonggaku ḇena snonsnon ḇeba ro sup anya. Fama, ibur nakam insama dakḇe snonggaku Kristen. Inja Paulus fyafko faro rosai ifrur kwar nane ke? Kowasya Filipi 3:8, raimnai kawos fakfuken nane:
Rosai ḇefnai fa Paulus doḇe roi ifrur kwar ro ḇepondi na, namnis ra roi ḇemamas ḇaido papus na?
Inja rosai syewar fa ismai na?
Kwara ido kenem Bena nari napyum syadi rofyor kwinfir fa wafarmyan ḇe Yahwe I ke? Kwarem rarirya kukro?
Fafisu Paulus dakḇe snonggaku Kristen kwar, ismai nabor syadi ro rosai ibur kwar na
SIA SOḆE: ”Yafawi roi yafarkor nanema roi ḇekaku nairi, ḇape yakara samswen kaker fa yaso na.”
Manggundaw moḇsa wakkara rai, rosai ḇefnai fa kobuk kenem koḇena ḇe Yahwe I?
FARKARKOR ḆYENA
Saswar iso ḇedif ko fa kobuk kenem koḇena ḇe Yahwe I ma koḇebaptis.
Waswarepen Kaḇer
Rosai ḇefnai kaku fa koswar Yahwe kuker kosnesna nasiper ma kofarmyan ḇe I?
Rosai na Yahwe byuk faro snonggaku ḇebaptis ḇe Saksi Ḇyedi?
Wamarisen wakbuk kenem Bena ḇe Yahwe I ke?
SWEWAR NABOR WER
Mam roi ḇefrur fa bin ḇefnak musik ma snon ḇefnak olahraga, sukinfir fa subuk kenem suḇena ḇe Yahwe I.
Roma Inai Babo Sifuken—Rosaiso Nari Yasewar ro Kenem Ayedi?—Waswasen Kaḇer (6:54)
Ro vidio musik ine, mampan snonggaku ḇebuk kenem sena ḇe Yahwe I sfasnai raryaḇ sena.
Mam roi ḇedif bin oso fa kyara roi ḇefandun syadi ro kenem ḇyeja. Wawasya fawar ḇyena ro ”Yafakfuken Ker bo Yoḇe, ’Rosai Ḇefnai fa Kokenemri?’”