FARKARKOR 54
Manseiso ”Women Ḇesouser ma Ḇefawinanem” ma Fararur Rosai Duf ya?
Yesus iso ḇebukor faro sidang Kristen ya. (Efesus 5:23) Baboinema Yesus isya ryo nanggi kwar, mboi fyarkin kaker manfamyan ḇyesi ro supswan ine roro ”women ḇesouser ma ḇefawinanem”. (Kowasya Matius 24:45, Terjemahan Dunia Baru [NW].) Yesus manggundi iso ḇekanow women ani ma byuk papoik ono ḇe i. Rarirya mboi, fandun fa women ani isouser ḇe Kristus i ma ifarmyan Kristus naek ḇyesi. Manseiso ”women ḇesouser ma ḇefawinanem” anine? Moḇsa women ani fyasos fandun koḇena rai?
1. Manseiso ”women ḇesouser ma ḇefawinanem” ya?
Randak iwara, Manseren Yahwe kyur snon oso ḇaido raryur ro snon riḇeso fa sfarkin kawasa Ḇyesi rarirya kwar. (Maleakhi 2:7; Ibrani 1:1) Yesus ikḇok ro marmar ya mura, manwawan ma penatua ḇero Yerusalem sya siso ḇefarkin sidang Kristen. (Farfyar 15:2) Rarirya ro baboine kako, raryur ro penatua ḇeḇeso kofawi ḇe Raryur Naek Ḇefarkin ro Saksi-Saksi Yahwe siso ḇefasos anan rur ma sfarkin fararur ḇesren ya. Ḇeyaksun ro raryur anine siso ”women ḇesouser ma ḇefawinanem [Yesus] kyanow” ya. (Matius 24:45a, NW) Raryur Naek Ḇefarkin sima snonggaku Kristen ḇesmai ramrem kuker rur ḇesren ya. Nari sḇepoik fnoḇek Manseren Yesus i ro Karajan nanggi fafisu kankenem sena ḇe snonggaku ro supswan ine namnai kwar.
2. Anan rur rosai women ḇesouser ani fyasos na?
Yesus doḇe women ḇesouser ani nari byuk anan rur faro snonggaku Kristen ro fafisu ḇesrow ya. (Matius 24:45b) Anan rur women ani fyasos na iso akurfasnai ḇeknam ro Manseren Allah wos Ḇyena. Kan roḇean ro ras-ras ido, nari baken koḇena naprei ma kosambraḇ. Rarirya kako, kan roḇean rur women ani fyasos na ido, nari kosambraḇ fa kofarmyan ḇe Yahwe I ma kosambraḇ fa kofrur fararur Yesus byuk ḇe ko na. (1 Timotius 4:6) Kosmai roḇean rur anna roro fananjur ari, ma munara sarawrow ḇeba na. Oso wer ido, kosmai anan rur nane roro syap-syap ma vidio ḇeknam ro Refo na. Nane nafnoḇek ko fa kofawi roi Manseren Allah imarisen na ma nafrur fa wis koḇena kuker I nsambraḇ syadi wer.
SWEWAR KAKU WER
Nari kofarkor roi ḇefnai fa kofandun ”women ḇesouser ma ḇefawinanem”, isoine Raryur Naek Ḇefarkin sya.
Raryur Naek Ḇefarkin sfasos anan rur, sbuk akurfasnai, ma fafnoḇek faro Saksi-Saksi Yahwe ḇero supswan ine ḇesiper
3. Yahwe kawasa Ḇyesi fandun fa sfasos pyum si
Yesus fyarkin Raryur Naek Ḇefarkin sya fa sfasos pyum Saksi-Saksi Yahwe sya fararur sena. Yesus fyarkin snonggaku Kristen ḇero abad randak siwara kuker nyan ḇemnis kako. Komam VIDIO.
Kowasya 1 Korintus 14:33, 40, raimnai kawos fakfuken ine:
Wos risai mam ro mnuk nane ḇefasnai Yahwe imarisen insama kawasa Ḇyesi sfasos pyum si?
4. Women ḇesouser fyasos pyum fararur ḇaḇebaryas
Fararur ḇaḇebaryas ima fararur ḇefandun kaku snonggaku Kristen ro abad randak siwara roi sifrur na. Kowasya Farfyar 8:14, 25, raimnai kawos fakfuken suine:
Mansei ḇebuk akurfasnai faro fararur ḇaḇebaryas snonggaku Kristen sifrur ro abad randak naiwara?
Rosai Petrus ma Yohanes sufrur ro fafisu susmai akurfasnai ro manwawan ḇesesya?
Raryur Naek Ḇefarkin smam fararur ḇaḇebaryas ḇe fararur ḇefandun kaku fa sfasos na. Komam VIDIO.
Yesus fyasnaiḇair fararur ḇaḇebaryas ima fararur ḇefandun kaku. Kowasya Markus 13:10, raimnai kawos fakfuken suine:
Rosai ḇefnai fa Raryur Naek Ḇefarkin smam fararur ḇaḇebaryas ḇe fararur ḇefandun kaku?
Rosai ḇefnai fa kofandun ”women ḇesouser ma ḇefawinanem” fa fyasos fararur sifrur ro supswan ḇesiper ine?
5. Women ḇesouser byuk akurfasnai
Raryur Naek Ḇefarkin sfasos akurfasnai faro snonggaku Kristen ḇero supswan ine ḇesiper. Inja moḇsa Raryur Naek Ḇefarkin sna wos oser ḇekur akurfasnai imbe sbuk na? Kokarapan nyan raryur naek ḇefarkin ro abad randak siwara roi sakfrur na. Kowasya Farfyar 15:1, 2, raimnai kawos fakfuken suine:
Ro abad randak naiwara, snonggaku Kristen ḇeḇeso sna kakara ḇesisye ḇekur rosai?
Paulus, Barnabas, ma ḇesesya sor akurfasnai ro mansei ḇekur samswen anine?
Kowasya Farfyar 15:12-18, 23-29, raimnai kawos fakfuken ine:
Raryur naek ḇefarkin ḇero abad randak siwara sifrur snemuk ḇaim, rosai sifrur ḇepon fa sismai akurfasnai ro Yahwe I?—Mam mnuk ḇe 12, 15, ma 28.
Kowasya Farfyar 15:30, 31 ma 16:4, 5, raimnai kawos fakfuken suine:
Snonggaku Kristen ro abad randak siwara rosai sifrur fafisu sismai akurfasnai ḇeraker raryur naek ḇefarkin sya?
Barakas rosai Yahwe byuk ḇe si snar sisouser?
Kowasya 2 Timotius 3:16 ma Yakobus 1:5, raimnai kawos fakfuken ine:
Ro fafisu koḇedine, rosai Raryur Naek Ḇefarkin sifrur fa sismai farkankin ro Yahwe I rofyor sifrur snemuk ḇaim?
SIA SOḆE: ”Mgorower Raryur Naek Ḇefarkin sya ido, mgoisya mgoso snonggaku monda.”
Rosai ḇefrur fa wakyar Manseren Yesus isya fyarkin Raryur Naek Ḇefarkin sya?
FARKARKOR ḆYENA
Raryur Naek Ḇefarkin siso ”women ḇesouser ma ḇefawinanem” Yesus Kristus kyanow kwar. Raryur Naek Ḇefarkin sbuk akurfasnai ma anan rur faro snonggaku Kristen ro supswan ine ḇesiper.
Waswarepen Kaḇer
Mansei ḇekanow ”women ḇesouser ma ḇefawinanem” ya?
Rariso Raryur Naek Ḇefarkin sfasos fandun koḇena rai?
Wakyar kaku Raryur Naek Ḇefarkin sya siso ”women ḇesouser ma ḇefawinanem” ani ke?
SWEWAR NABOR WER
Moḇsa Raryur Naek Ḇefarkin sifrur fararur sena rai?
”Rosai Sor ḇe Raryur Naek Ḇefarkin ro Saksi-Saksi Yahwe?” (Fasfas ro situs jw.org)
Mam rariso Raryur Naek Ḇefarkin sya smam pyum fa syap ḇeser anan rur koḇena namnis kaku.
Rariso Raryur Naek Ḇefarkin sya smam fararur Yesus byuk ḇe si fa sifrur na rai?
Rariso fananjur ma munara sarawrow koḇena nfasnaiḇair Yahwe isya fyarkin Raryur Naek Ḇefarkin sya?