Rariso Kma Oso Fyanam Pdef yoḇ Roma Ḇyedi Rai?

”KAMAM wapnase! Rariso Kamam wafawina rai?” Fafisu ono roma Bedi isandik Au kuker wos ḇeradine ke? Fafisu ani, na ḇaḇir Auma kma ḇepyum kwar. Ma, na wamarisen syadi wer fafisu roma Bedi iso pyum roi wakofen kwar na ma ismai payamyum snar isouser.a​—Amsal 23:​15, 24.

Imbape, taun nawas mura, roma Bedi isya ḇyesyowi kaker Au ke? Ḇaido snar iba muryas kwar inja fyasnai syowi wer ḇa faro Au ke? Rariso insama fanam syadi kuker romawa snon ḇedi fafisu ḇyesnonkḇor kwar? Ḇepon ya, mgorama komam samswen ḇeḇeso kma sya sismai na.

Samswen Ri Kyor Kma Ḇebor Sya Sismai na

1. SNA ORAS NABOR ḆA: Ro sup ḇebor, kma sya siso ḇesasewar fandun ro kina. Fafiso ono, snar sfararur inja ro ras ya ḇesiper sisya ro rum ḇa. Ro moḇ ḇeḇeso, kma sya sna oras nabor ḇa fa siryur kuker romawa sesi. Imnis ra, survei ḇeḇabo ro Prancis, ḇebair kma sya sna oras menit ri 12 monda ro ras oser fa smam faduru romawa sesi.

INFA KWARA NA: Buk oras ri fis kwar fa kwainnus roma Bedi? Minggu oser ḇaido minggu ri suru ḇe ḇarpon, fasepen oras ri fis ḇekayamyam kuker i ro ras oso. Na wakandor fyor mam fasfas Bena.

2. SISMAI CONTO ḆEPYUM NABOR ḆA: Snon ḇeḇeso sifanam kuker kma sesya ḇa fafisu siḇamuryase. Jean-Marie ḇebarek ro Prancis ikofen, ”Ayama rasras na yawos kuker Kamam i ḇa.” Inja, rosai ismai ya? Ikofen wer, ”Yasmai samswen yakara ḇa na. Rupa ra, kirine samswen ḇe aya fa yawos pyum kuker roma yedi.” Fafisu ḇesena wer, snon ono sisya sifawi pyum kaku kma sesya, imbape wis sena kuker si rya napyum ḇa. Philippe, ḇyeumur taun ri 43, ikofen, ”Kamami syamswen fa fyasnai saswar ḇe aya. Ine nafnai ra, yasewar marmar kaku fa yakfasnai saswar faro roma yedi.”

INFA KWARA NA: Wis Bena kuker kmami nafrur samswen Au fa wafanam kuker roma Bedi ke? Wakara ḇa bo waso kwar nyan ḇepyum ma ḇepyum ḇa ro kmami ke? Ro nyan rosai monda?

3. SNA KAKARA ḆESASAR: Ro sup ḇeḇeso, kma sya rya sbuk fafnoḇek nabor ḇa fa sfaduru romawa sesi. Luca ḇeramaker Eropa Barat doḇe, ”Ro moḇ yaba ro ya, binswa sya siso ḇena fararur sfarus romawa sya.” Ro sup ḇesena wer, kma sya siso ḇebuk wos anun ḇepakrek monda. Rupa ra, George ḇeḇarek ro sup Afrika. Ikofen, ”Ro sup nggoḇedima, kma sya sifnakkus roma sesi ḇa kukro simgak nari snonggaku sya smamkyof si ma sesyowi si ḇa. Inja, samswen ḇe aya fa yakainnus roma yesi.”

INFA KWARA NA: Ro moḇ Bedi, fakamamar rosai kma sya suf na? Soḇe ḇefarus romawa sya siso fararur ro bin sya ke? Sanun ḇe si fa sakfasnai saswar faro roma sesi ke, ḇaido roi ani smam nasrow ḇa ke?

Auma kma ḇesmai samswen ḇeḇeso ine ido, rariso ḇisa wafrur mnis na rai? Mam anun ḇepyum ḇeḇeso nane.

Fasnai Nyan Ḇepyum Fafisu Roma Bedi Iba Ḇa Kaker

Romawa snon sya na siso syadi nyan ro kma sesi. Inja, wakfasnai nyan ḇepyum rofyor roma Bedi iba ḇa kaker. Moḇsa na wafasnai na rai? Ma, fafisu risai buk oras kuker i fa mukayamyam?

Ipyum ya, wor roma Bedi fafisu Ausya wafrur fararur ro ras-ras na. Imnis ra, Ausya wafararur ro rum ido, wor fa ifnoḇek Au. Buk sasapu ḇe i ḇaido skop kasun oso. Na imarisen fa ifararur kayam fnoḇek snonggaku myanen ma ḇyesyowi kaku isoine kmari! Imbude wafandun oras naḇor fa wafrur posa fararur anna, imbape roi ine na nafrur fa mufanamyaye, ma na wafarkor i fa dufpyum fararur na. Fyor iwara, Refo ya danun ḇe kma sya fa sor romawa sesi fa saksowarpu ro fararur sifrur ro ras-ras na ma sbuk swaf ani fa sawawos kuker si ma sifarkor si (Ulangan 6:​6-9) Wos anun ḇepyum nane nasrow kaker isof ro kirine.

Oso wer ido, mgofararur kayam monda ḇa, imḇape buk swaf fa mgofnak kayam. Mgofnak fa mgomarisen monda ḇa. Riset fyasnaiḇair snar fafisu kma oso ifnakkus romawa ḇyedi ḇekasun kaker, isya ifnoḇek i fa imgak ḇa ma syewar fa ifrur roi randak ya imgak fa ifrur na.

Mgofnakkus roma Bedi na payamyum ya isya. Peneliti oso ḇenir ḇe Michel Fize doḇe, ”Rofyor sufnak kayam, romawa snon oso bisa dawos pyum kuker kmari.” Ro fafisu ḇerarirya kma oso na fyasnai saswar faro romawa snon ḇyedi ro wos ma roi ifrur na. Rarirya ido, roma ani nari dakfarkor fa fyasnai saswar ya kako. Kma oso ro Jerman snori André doḇe, ”Rofyor roma yedi iba ḇa kaker, nufnak kayam ker. Yaforepen i ma yafarkor i fa dakfasnai saswar ya kako ḇe aya.”

Swaf ḇepyum faro kma oso fa syambraḇser saswar kuker roma ḇyedi iso fafisu imbe senef. Wawasya ker farfyar oso, ma warower pyum i fafisu ikofenḇair roi ḇefrur fa imarisen ma ḇyesneso ro ras ani. Wafrur rarirya ido, na imarisen fyawar kuker Au pdef isof iba muryase.

Wasewar fa Mufrur Roi Mumarisen Na

Roma babo ḇeḇeso sifandun manggenem ḇa fafisu sikmasi imḇe sawos kuker si. Fafisu roma Bedi imewer kyarem fakfuken Bena ido, kwara fasaw awer ima imewer dawos kuker Au. Imbude na imarisen fyor fadwer nyan wawos kuker i na.

Jacques, kma oso ro Prancis, kyara samswen ḇe i fa dawos kuker roma ḇyedi, Jérôme i. Imbape ḇardibur idif roma ḇyedi fa dawose, fyadwer nyan ḇyukifanam yoḇ i, dor i fa sufnak bola. Jacques doḇe, ”Nufnak bola raposa nari nukain ro abris na ma numnaisu. Ro fafisu ani roma yedine insape dawos rosai ḇero sneri. Fafisu nukayamyam radine ma ḇyaḇir saswar yafasnai ḇe i na, wis nuḇena nsambraḇ syadi wer.”

Rariso rofyor roma Bedi imarisen faro farfnak olahraga na ḇa? André iswarepen kaḇer fafisu i ma roma ḇyedi sumam farfyos ḇefo kuker mak sya ro roḇ oso. André doḇe, ”Nurir kursi ro bandi bo nuḇepake selimut ḇeba ma nuyuf teh ro bramin nuḇena, numam ḇe mak ḇero farsyos iyaswa. Nufawar ḇekur Manḇefrur roi nayafakame. Nuyawos ḇekur roi nusmai na oser-oser, ma roi ḇesena wer.”​—Yesaya 40:​25, 26.

Rofyor wamarisen ḇa faro rosai roma Bedi imarisen ifrur na ido, rosai na wafrur ya? Fandun fa warir roi wamarisen na. (Filipi 2:⁠4) Ian ḇeraker Afrika Selatan doḇe, ”Roma yedi, Vaughan i, ima imnis ra aya ḇa, imarisen faro olahraga na ḇa, ima imarisen faro pesawat ma komputer na. Inja, yasewar fa yakmarisen roi anna, yor i fa numam pesawat ḇeroḇ na ma nufnak simulator ḇefasnai nyan sbukisun pesawat ro komputer. Yaḇaḇir, snar yakmarisen faro roi imarisen na, inja Vaughan bisa dawosbos kaku roi ḇero sneri faro aya.”

Wafnoḇek I fa Ikyar faro Manggundi

”Kamam, mampan ine res!” Ras ono roma Bedi ikofen radirya ḇe Au fafisu ifrur roi ḇebabo oso ke? Iba muryas kwar ido, imarisen kaker wamanen i radirya ke? Imbude oroḇa. Imbape fyandun wos sandik pdef ro Au insama isur muryas ḇe snon kuf ḇeyuf pyum fararur sikyar ḇe i na.

Mgomam nyan ḇepyum ro Allah Yahwe manggundi ro nyan ifrurpyum roma Ḇyedi. Fafisu Yesus imbe ifarmyan ro supswan, Allah fyasnai saswar Ḇyena ḇe i. Ro ḇarpon snonggaku sya, ikofen, ”Inekada Romawa Yaswar kaku, faro I Ya ḇeḇare.” (Matius 3:​17; 5:​48) Kaku ḇae, Auso ḇesyus kaku ḇebuk wos aprer ma ḇefarkor roma Bedi. (Efesus 6:⁠4) Ḇape, Au kako swewar swaf fa buk wos sandik ḇe i snar roi ikofen ma ifrur na ke?

Snon ḇeḇeso sya, samswen ḇe si fa sfasnai saswar ma wos ḇeyun samarawraw. Imbude fafisu iwara sinan sesi simarisen syadi sfasnai sasar sifrur na ḇardiburo roi ḇepyum sifrur kwar na. Ine iso samswen wasmai na ido, fandun fa swewar kaku insama wafnoḇek roma Bedi fa ikyar faro manggundi. Moḇsa wafrur na rai? Luca, ḇeḇeyap ḇepon kwar ani, syewar kaku fa ifrur fararur ras-ras ro rum na kuker Manuel i, roma ḇyedi ḇeumur taun ri 15. Luca doḇe, ”Fafisu ono, yawan Manuel i fa ifrur ḇepon fararur anna ma nari yafnoḇek i rofyor fyandun fafnoḇek. Fyoro mura ido, bisa ifrur posa fararur ḇyedi ro manggundi. Ine nafrur fa imarisen faro roi ifrur na ma nafnoḇek I fa ikyar syadi faro samambraḇ ḇyena. Roi ifrur na nambran pyum ido, na yabuk wos sandik ḇe i. Roi ifrur na nambran mnis ḇa yo, yabuk wos sandik pdef ḇe i faro sasewar ḇyena.”

Au kako bisa wafnoḇek roma Bedi fa ikyar faro manggundi kuker wafnoḇek i fa ifrur roi ḇeba syadi ro kenem ḇyedi. Ḇape, rariso fyor ifrur fasaw na imnis moḇ wamarisen na ḇa? Ḇaido rariso fyor roi imbe ifrur na, naḇye ḇa manggenem ḇa, mboi naḇese ro roi wamarisen faro i na? Ro fafisu ḇeradine kwara pyum kaku mamam Bena faro i. Jacques, ḇeḇeyap ḇepon anya doḇe, ”Yasewar fa yafnoḇek roma yedi fa dap ḇepon roi syambraḇ fa ifrur na. Ḇape, yamam pyum insama naiso aw ḇyenairi, mboi aw yedirya ḇa. Ramnai, yaswarepen insama yadif i ḇa fa ifrur fasaw na, imḇape ifrur raris samambraḇ ḇyena.” Warower pyum roma Bedi roi ikofen na, buk wos sandik faro roi syambraḇ fa ifrur na, ma wanun i fa ifrur mnis kaḇer sasar ifrur na ido, na wafnoḇek i fa ifrur imnis aw ḇyena.

Kaku ḇae, wis oso ḇaḇeri nari nambran pyum pdef ma samswen na nari naisya ḇesya kwar. Imbape, fyoro mura ido, roma Bedi nari fyanam syadi ḇe Au. Na komarisen kaku fa kofanam kuker snonggaku ḇefnoḇek ko fa kosmai roi komarisen na ḇae.

[Fasfas Kasun]