Rosai Yafrur Kaku Insama Yamai Ker Ḇa?

Roi ḇepyum ḇa: Wamai ker ido, nari nwa swaf fa waksmai bati ḇebabo oḇa ma nwa fawar ḇepyum ro kenem Bena ḇa.

Roi ḇepyum na: Wamai ido, napyum kako kukro nari nafrur fa kwara ḇepon resari insape wawose. Oso wer ido, nwa swaf fa wafawi pyum roi snonggaku ḇesesya skara na ma rwower pyum si rofyor sawos yoḇ Au.

Nyan ḇepyum syadi: Bisa fadwer kenem Bena insama wamai ker ḇa. Rarirya kada, na wasmai roi ḇepyum na. Awawos ine nari isaramper Au fa wafawi moḇsa wafrur roi ine rai.

• Swewar fa wafawi roi ḇefrur Au fa wamai kerdi

• Roi bisa fa wafrur na

• Bati Besi roi sikofen na

Swewar fa wafawi roi ḇefrur Au fa wamai kerdi

Wamamyai ido, ima rya wamgak kaku wawos ḇeri kuker snonggaku ḇesesya. Inja swewar fa wafawi roi ḇefrur fa wamgak ya kada, na insape wafawi roi anya wapok wamgak awer na. Rwama kawos roi ri kyor ḇefnai fa bisa wamgak.

• ”Yafawi roi imbe yawos na ḇa.”

  Ḇekaku ya: Snonggaku sya roi na siswarepen kawan iso rosai wawos na ḇa, mboi frur pyum Bena. Fasnai sawarwar faro snonggaku ḇese ma rwower pyum roi sikofen na ido, nari wamai wer ḇa.

  Kwarapan: Manggundaw wamarisen syadi bebati kuker snonggaku ḇerariso? Bati ḇeyawos nabor ke bati ḇerower pyum Au?

• ”Yamgak na smam ayama yafarfnak manggun ḇa.”

  Ḇekaku ya: Auma wamamyai ke roḇa yo, na snonggaku ḇese moḇ smam Au naḇesisye. Wafrur monda raris moḇ simarisen raya kada, nari fawawas wamai wer ḇa ma nari snonggaku ḇese skara pyum Au syadi.

  Kwarapan: Mam mboi rya snonggaku syakam skara sasar Au ido, mam pyum resanari kukro wafawi ḇa ḇo Auso ḇekara sasar si ke?

• ”Yamgak yawos sasar ido na yamai ra.”

  Ḇekaku ya: Snonggaku koine kam bisa kawos sasar ḇae. Inja wamgak awer na wawos sasardi kukro wawos sasar ido, na snonggaku ḇesesya smam wakmnis ra si.

  Kwarapan: Snonggaku oso ikofenḇair ḇe Au ḇo doḇe dakkawos kir ḇa ido, na wamarisen bebati kuker i ke?

Wafawi ke? Sia soḇe sima simamyai ḇa kukro sawos ker kuker snonggaku ḇese ro fasfas ḇeknampu monda. Imboi ḇekaku ya, kosrow fa kawos ḇeri kuker snonggaku oso kada, insape na napyan syadi fa koḇebati kuker i. Sherry Turkle, ima syewar fawawi ḇekur snonggaku ma robebor sor ḇe teknologi na. Fyas radine, ”Kosrow fa komam snonggaku oso mgasi ḇeri ma korower i ḇeri kada, insape na komambir pyum i.”a

Roi bisa fa wafrur na

• Mamkara awer Au kuker snonggaku ḇese. Kwara awer wamnis kaku kuker snonggaku ḇese ro sasewar bati ma roi ḇesena. Imboi, swewar fawawas fa wamamyai awer. Rarirya kada, bisa nwa bati ḇebabo ma wasmai fawar ḇepyum ro kenem Bena.

  ”Imbe wawos ido, kwara awer fa wawos wos ḇekwan kaku. Kwara awer kako fa woḇe swewar kaku insama awawos mgoḇena naser marasrisen kada. Wasrow kuker snonggaku insape mam babo ma wawos monda roi imbe wawos yoḇ i na ima isrow kwar.”​—Alicia.

  Refo ya doḇe: ”Iḇye syadi snonkaku oser-oser imnasen mankundi resari ro kankenem ḇyedi; insape imsik mankundi, mboi myam awer faro kankenem snonkaku ḇese.”​—Galatia 6:4.

• Farkor ro snonggaku ḇese. Rosai simarisen sawos ya? Rosai simarisen sawos manggun ḇa na? Mampan snonggaku ḇeyawos kuker snonggaku ḇesesya moḇ sawos raya. Rosai imbe wakfrur raris si?

  ”Mam ro snonggaku bebati pyum kuker snonggaku ḇese ma wafarkor ro si. Mam pyum rosai sifrur na ma rosai sawos na fafisu imbe sebati randak kuker snonggaku ḇese.”​—Aaron.

  Refo ya doḇe: ”Raris manggarmom ifrur manggarmom ḇese nasar, snonggaku oso ifrur bati ḇyedi isar.”​—Amsal 27:17.

• Buk fakfuken. Kokara kada, snonggaku koine komarisen kokofenḇair roi kokara na ḇe snonggaku ḇese. Inja buk fakfuken ido, nari wasmai nyan fa wawos kuker snonggaku ḇesesya. Oso wer ido, nari snonggaku sya smam ker Au ro moḇ wawos raya ḇa.

  ”Imbe rwa wasrow snonggaku ḇese fa mgoryur ro moḇ oso ido, kwara ḇepon rosai imbe wawos na resari ḇaido rosai na imbe wafukeni. Ine iso nyan oser fa wamgak syadi ḇa ḇaido waḇor famfnom ḇa fafisu wasrow kuker snonggaku wafawi ḇaim sya.”​—Alana.

  Refo ya doḇe: ”Mkono oser-oser syewar fandun mankundi ḇyena awer, ḇape fandun snonkaku ḇesesya kako.”​—Filipi 2:4.