Manseiso Mikhael Manfarkin ro Malaikat Sya?

Kankarem ro Refo

Ro agama ḇeḇeso, sap Mikhael i ḇe ”Santo Mikhael”, ima snonsnon ro Yesus i fafisu ryama ḇaim ma fyor iḇur supswan ine ma fafisu kyaḇer wer ḇe nanggi.a Mikhael fyamfaḇri kuker Ibiris fyor Moses imar kwar ma ifnoḇek malaikat oso fa ikofenḇair anun ro Manseren Allah faro nabi Daniel. (Daniel 10:13, 21; Yudas 9) Mikhael ibriwarek Allah ḇaḇepapoik Ḇyedi ma myun Allah mbroḇ Ḇyesi. Ine imnis kaku kuker knam ro snonsnon ḇyedi ”Mansei Imnis ra Allah?”​—Daniel 12:1; Fasasna Faro Yohanes (Wahyu) 12:7.

Mgorama kawos roi ḇeḇeso ḇefrur fa kokyar Yesus ima Mikhael dirya.

• Mikhael Ima ”ḇeḇeḇru ro malaikatsya”. (Yudas 9) Wos ”ḇeḇeḇru ro malaikatsya”, kyur ḇe ”manfarkin ro malaikat sya”, wos suru suine susae ro mnuk ri suru ḇero Refo. Ro mnuk suine, wos sepake faro ”ḇeḇeḇru ro malaikatsya” nama wos ḇekur ḇe manggun oso monda. Ine kyurfasnai malaikat sya sna manfarkin oser monda. Oser ro mnuk ansuya ikofen snar Tuan Yesus ḇebawes kwar ani nari ’dado ro boiyaswa kuker mkarem ro mananir malaikat sya’. (1 Tesalonika 4:​16) Yesus nya ’mkarem ro mananir malaikat sya’ kukro ima manfarkin ro malaikat sya isoine, Mikhael.

• Mikhael fyarkin sordade sarar malaikat sya. ”Mikhael kuker malaikat ḇyesi se embroḇ korḇen ani”, isoine Ibiris i. (Fasasna 12:7) Ro bar malaikat sya kankenem sena, Mikhael nya papoik ḇeba kaku. Iso ḇefnai fa, sap i ḇe ”oser ro fandu manfarkin ḇekaki syadi” ma ”manfarkin ḇeba syadi”. (Daniel 10:13, 21; 12:1) Ḇefawinanem ro syap Ḇaḇeasas Babo, David E. Aune, ikofen apap anna nfasnaiḇair snar Mikhael iso ”manfarkin ḇeba faro sordade malaikat sya”.

  Refo dap snonsnon oser monda na ḇepoik faro sordade malaikat sya. Refo doḇe, ”Yesus Kristus fyasna mankundi fnoḇek malaikat ḇyesi ro boiyaswa kuker papoik ḇyedi.” (2 Tesalonika 1:7, 8; Matius 16:27) Yesus ”ḇyeḇekanow ḇeboiyaswa kwar ḇyuk sasoser faro malaikatsya kam, papoikna kam ma samambraḇna kam nkunem faroi”. (1 Petrus 3:21, 22) Inja, Manseren Allah ikanow Yesus i mura ikanow Mikhael i wer ḇe manfarkin sarar ido, rya nasrow ḇa kukro nari sufamfaḇri. Inja, ḇesrow kaku fyor kokofen Yesus ma Mikhael ima kyur ḇe manggun oser monda.

• Mikhael ”nari dores” ro ’fafisu kandera ḇeba’ ḇejadi. (Daniel 12:1) Ro syap Daniel, wos ”dores kaḇer” nono ido kyur ḇe raja oso ḇeyores fa imḇe ifrur roi oso ḇefandun kaku. (Daniel 11:​2-4, 21) Yesus Kristus, ḇeḇeyap ḇe ”Wos Allah”, nari dakḇe ”Raja ro bo raja sya kam” ma ifrur roi oso ḇefandun, isoine myunpres Allah mbroḇ Ḇyesi ma kyadaunwarek Allah kawasa Ḇyesi. (Wahyu 19:11-16) Nari ifrur na ro fafisu kandera ḇeba ya myun, ”roi ḇeradine nmun ḇaim ro awar madero isof babo ine”.​—Matius 24:21, 42.