Manseren Allah Ḇye Evolusi fa Ikfrur Roi Ḇekenem Nakam Ke?

Kankarem ro Refo

Oroḇa. Refo ya ikofen snai kaku kwar snar ro randak kaku, Manseren Allah ifrur snonggaku sya, aiwan sya raris moḇ sisnai raya oser-oser ma rokaker na.a (Kejadian 1:12, 21, 25, 27; Fasasna 4:11) Refo ya doḇe snonggaku koine kam korama ro sinan ḇepon koḇesuya, Adam ma Eva su. (Kejadian 3:20; 4:1) Farkarkor oso ro dunya ine doḇe Manseren Allah ḇye roi sor ḇe evolusi fa byukifrur roi ḇekenem sya raris moḇ sisnai raya. Sor farkarkor anna kako ḇe evolusi teistik. Fama, farkarkor anya iḇese kaku kuker rosai Refo fyakor na. Rarirya mboi, roi Refo ikofen na nasrow kuker manfawawi ḇero baboine roi sikofen na. Soḇe roi ḇekenem oso na isnai ḇesisye ro ḇesesya.b

• Manseren Allah ḇye evolusi fa ikfrur roi ḇekenem na ido, moḇsa ifrur na rai?

• Farkarkor evolusi namnis kuker roi Refo fyarkor na ke?

• Moḇsa rokaker ma aiwan sya bisa sikenem ro fafisu ḇefadadwer rai?

Manseren Allah ḇye evolusi fa ikfrur roi ḇekenem na ido, moḇsa ifrur na rai?

Snonggaku ḇekyar Manseren Allah ḇye evolusi fa ikfrur roi ḇekenem na, kakara sena naḇesisye. Syap Encyclopædia Britannica doḇe ”nyan oso Manseren Allah fyara supswan farsyos ine iso roi sor ḇe proses seleksi alam [ḇesambraḇ sya na sikenem pdef mboi ḇeryar ḇa sya nari simar]”.

Snonggaku sia sikyar:

• Roi ḇekenem nakam nama up ro sinan ḇepon ro awar madero siwara.

• Roi ḇekenem oso bisa fyadwer i ḇe roi ḇesnai ḇese kaku ro randak ya. Roi ine sor na ḇe makroevolusi.

• Kofawi pyum ḇa ḇo Manseren Allah iso ḇefrur roi anna kam.

Farkarkor evolusi namnis kuker roi Refo fyarkor na ke?

Farkarkor evolusi teistik nafnai fa snonggaku sya skara fawar ro randak kankenem ine ro syap Kejadian nkaku kam ḇa. Imbape, Yesus manggundi ikyar fawar sfas ro syap Kejadian ima kyaku ḇeri. (Kejadian 1:26, 27; 2:18-24; Matius 19:4-6) Refo ya ikofen ḇo doḇe fafisu Yesus ryama ḇe supswan ine ḇaime, ima ikenem ro nanggi kwar. Inja, kokyar fafisu anya na iwarpu Manseren Allah fa sufrur roi nakam fa naisya. (Yohanes 1:3) Inja, kakara ḇeyoḇe Mansere Allah ḇye evolusi fa ikfrur roi ḇekenem nakam ima imnis kuker roi Refo fyakor na ḇa.

Moḇsa rokaker ma aiwan sya bisa sikenem ro fafisu ḇefadadwer rai?

Refo ya ikofenḇair ḇa roi ḇekenem oso nya roi ḇesnai ḇesisye ri fis. Manseren Allah ifrur aiwan ḇebor ma rokaker na kwar fa bisa skapar rawo sibor syadi ḇaido sikenem ro fafisu ḇefadadwer ḇae. Refo dakkofenḇair roi ine. Fama, roi ḇeradinema evolusi risya ḇa, kukro ima roi ḇesasyar fa ḇekenem babo risya ḇa.