Nyan fa Mufasos Mnis Kumpanna

Kokame kofandun kumpanna insa kokoḇes fandandun ro kina koḇesi. (Amsal 30:8) Kakuḇae, ”kumpanna iso ḇeḇuk fadadiren”. (Pengkhotbah 7:12) Imbude samswen ḇe inbeswa fa suwawos kumpanna, ḇape muwawosna ḇa ido na nafnai farmbroḇ ro farḇakḇuk muḇena. (Efesus 4:32) Fandun fa mukyaryaemu ma mufararur kayam rofyor mufasos kumpanna.

1 MUFASASOS PYUM

ROSAI REFO IKOFEN YA: ”Snar rofandu mko oso iḇe ifrur kaderen ḇeḇesyos ido, nari dawof fasasos kumpan ḇefrur ḇaḇawes ani fa namniske, namnisḇaim?” (Lukas 14:28) Fandun kaku fa mukara ma mufasos rariso mufrur kumpanna rai. (Amos 3:3) Rofyor mufasos na ido, muna wos oser kuk’r rosai ḇefandun syadi fa mukoḇes na, ma kumpan muḇena nabor ke oroḇa. (Amsal 31:16) Pok fa snar kumpanna nasya inja mukoḇes rosairiryakam. Mumam mnis insama muḇenyaki awer. Mukaḇkoḇes syadi awer ro kumpan musmai na.​—Amsal 21:5; 22:7.

NA ROSAI WAFRUR NA:

• Rofyor mukaḇkoḇes kwar mḇoi pipi na nasya kaker ido, mukain ma muwawos resari rosai na mufrur wer kuk’r pipi anna

• Ḇape pipi nakame naḇro kwar ido, mufasos mnis insama roi ḇefandun manken’m ḇa ido mukoḇ’s awer na. Imnis raris, mukankun ro rum monda ipyum syadi bur ro mukoḇ’s anan ro warung

2 SMAI KARKARA ḆEMNIS MA WOS KAKAKU

ROSAI REFO IKOFEN YA: Fandun kaku fa ’kokofen roi ḇekakuyae faro ko, snar kokam koḇekina ro Kristus baken ḇyedi’. (Efesus 4:25) Wakonfenḇair ḇe swa Ḇedi kuk’r kakaku, kumpan rifis wasmaina ma wasasyarna.

Rofyor muna wos oser kuk’r kumpanna kwar, fandun fa muwawos kayam na. (Amsal 13:10) Snar roi nane nefaduru ḇaḇeaski ro farḇakḇuk muḇena. Waswarepen, kumpan wasmaina ima mankun ḇena ḇa, ḇape faro kina Ḇedi kam.​—1 Timotius 5:8.

NA ROSAI WAFRUR NA:

• Muna wos oser kwar kuk’r kumpan rifis na mu oser-oser muḇuk kaḇkoḇes. Ḇape nasyadi kwar ido, muwawos wer na resari

• Iḇye kada fasaw fa muwawos kumpan muḇena, mboi muwaf awer isof ro farmbroḇ ya isya insape muwawos na