Roi Ḇeḇarḇor Nakam Ndramuma ro Pipi ya Ke?

Kankarem ro Refo

Oroḇa. Refo ikofen ḇa pipi nama roi ḇeḇye ḇa. Refo ya kako ikofen ḇaḇeri pipi naiso newar roi ḇeḇye ḇa nakam. Snonggaku ḇebor sya sikofen, ”Roi ḇeḇarḇor nakam ndramuma ro pipi ya.” Wos anna sun na ro mnuk oso ro Refo mboi sapḇair kam ḇa, ine nafnai ra snonggaku sya sna kakara ḇesasar. Kaku ya, Refo ikofen ”snar ḇarḇor ḇeḇor nakam nerares ro mkaba pipiya”, inja pipi ya derer ḇa.a—1 Timotius 6:10, ḆAḆEASAS BABO Wos Ḇyak ro Rasras.

Rosai Refo ikofen ḇekur pipi ya?

Refo ikofen kobuk pyum pipi na ido, bisa nun fainda ḇe ko, ḇesyadi bisa nbuk ”fadadiren”. (Pengkhotbah 7:12) Oso wer ido, Refo ya kako byuk wos sandik faro snonggaku ḇefasnai snemura sya, ma ine kako kyur ḇe snonggaku ḇebuk pipi ḇe snonggaku ḇesesya.—Amsal 11:25.

Rarirya mboi, Refo ya kako byuk swarapepen insama sasewar pipi ine ḇye roi ḇefandun syadi ro kenem koḇena awer. Refo ikofen, ”Mkormomen pipi awer, mboi mkokenem imnis kuker rosai isya faro mko.” (Ibrani 13:5) Inja, fandun fa kona mamam ḇemnis faro pipi ma kosewar syadi ker nana arasai na awer. Inja, rofyor roi kofandun kaku na raris roḇean, sansun, ma moḇ koḇarek ro ya naisya kwar ido, nama namnis kwar.—1 Timotius 6:8.

**Refo ikofen koswar pipi ido rosai roi ḇeḇye ḇa nari kosmai na?**

Snonggaku ḇeswar pipi na nari sor si ḇe snonggaku ḇeyanfambram, snonggaku ḇeradirya nari sismai kankenem fyoro ya ḇa. (Efesus 5:5) Rosai ḇefnai ya? Kukro snonggaku ḇeyanfambram sima simnis ra snonggaku ḇesyom amfyanir, ḇaido ḇesyom agama ḇekaku ḇa. (Kolose 3:5) Roi ḇeseya wer, snonggaku ḇeyanfambram fyorno ido sifrur roi ḇeḇye ḇa kaku insama sismai roi simarisen na. Amsal 28:20 ikofen, ”Snonggaku ḇemarisen ḇesmai fasaw nana sya nari sifrur roi ḇesasar.” Ḇesyadi, na skara fa sifrur roi ḇeḇarbor na, rupa ra sidif snonggaku ḇese fa sbuk pipi, sanggarkar, sun fasis snonggaku sya, ḇaido smamunmun.

Snonggaku ḇeswar pipi ifrur roi ḇeḇye ḇa na ḇa yo, bisa ismai roi ḇepyum ḇa snar kenem ḇyenane. Refo doḇe, ”Ḇape mansei ḇemarisen ḇenana nari isapi ro fafrowes, ro denem ma ro nafsu ḇeḇor ḇeḇebei ma ḇeyun raro. Nafsu anna nafrur fasnonkakusya sfarmambriwer ma sro.”—1 Timotius 6:9.

Fainda rosai kosmai na snar koso wos anun ro Refo ḇekur pipi na?

Pipi bisa nawyae snonggaku sya fa sifrur roi sifawi nama sasar nairi ḇaido roi Allah imarisen ḇa na. Inja, fandun fa kosasor ko insama koswar pipi na awer. Kofrur rarirya ido, na sesyowi ko, ma Allah I kako na imarisen ma isaramper ko. Allah ḇyeasas faro snonggaku ḇesewar kaku fa ḇefarmyan faro I sya, ”Nari yarir aw ḇa ma nari yabur aw ḇa.” (Ibrani 13:5, 6) Byuk kakyar ḇe ko kako, ”Snonggaku ḇesouser sya nari sismai barakas ḇebor.”—Amsal 28:20.

Mnuk ro Refo ḇekur Pipi Na

Pengkhotbah 7:12: ”Pipi nbuk fadadiren.”

Farkarkor ya: Kobuk pyum pipi na ido, na nafnoḇek ko fa kofamfon fandun koḇena ro ras-ras.

Lukas 12:15: ”Snonkaku oso nana ḇyena nabor rariso wer kankenem ḇyedi ḇyeknam ro nana ḇyenaḇa.”

Farkarkor ya: Pipi nama roi ḇefandun syadi ro kenem koḇena ḇa, ma pipi na nbuk fasaspar ḇe ko ḇa.

1 Timotius 6:10: ”Snar ḇarḇor ḇeḇor nakam nerares ro mkaba pipiya. Snar sasewar pipi eḇedari snonkaku ono ssunkirbur kakyar sena ma sewayam mankunsi kuker ḇarop nabor.”

Farkarkor ya: Pipi nama roi ḇesasar ḇa. Imḇape fafisu snonggaku oso iswar pipi na, isoine myam pipi ḇe roi ḇepon syadi ro kenem ḇyena ido, nari ismai samswen ḇebor. Imbude fyararur marbak kaku insama ismai pipi rawo myam kina ḇyesi wer ḇa ma idafdufe.

Ibrani 13:5: ”Mkormomen pipi awer, mboi mkokenem imnis kuker rosai isya faro mko.”

Farkarkor ya: Bardibur koso nyan ḇebor insama kosmai pipi nabore, roi kofandun kaku na naisya kwar ido ipyum ya kokara nama nasrow kwar.

Matius 19:24: ”Ipyan syadi onta oso syun ro wairusmkir ya ro snon ḇenana oso syun ro Ḇaḇesasoser Allah.”

Farkarkor ya: Yesus insape dor snonkbor ḇekayan oso fa dakḇe manfamyan ḇyedi. Imbape, snon ani pyampum Yesus fararyor ḇyena kukro iswar syadi nana arasai ḇyena. Inja ro mnuk ine, Yesus byuk swarapepen ḇefandun kaku. Snonggaku ḇesewar ḇepon nana arasai bardibur sisewar ḇepon Allah marisen Ḇyena ido, nari saksmai kankenem fyoro ya ḇa.

a Ro terjemahan Refo ḇesena, mnuk ine ryok radine, ”Saswar faro pipi iso osero ḇeḇewar roi ḇeḇarbor nakam.”