Ḇarpur Muma Suna Romawa!

Abraham ma Sara suma sufarḇuk fyoro kwar. Subur rum ḇepyum suḇena kwar ro Ur ma suḇarek ro rum kruḇen. Mboi, Sara isasurem ḇa kukro ifawi roi Yahwe ikofen na, nama roi ḇepyum faro su nairi.

Sara myander kaku fa dakna romawa. Inja, ikofen ḇe Abraham i ḇo doḇe, ’Binfyan ayedi Hagar i, kyapar romawa kada, na yamam i ḇe romawa yakapar diri.’ Ḇarpur muma, Hagar kyapar romawa oso. Snoriso Ismael.

Swaf ro wampasi wambarek nawas mura, fafisu Abraham ḇyeumur taun ri 99 ma Sara 89, snon rikyor skorama yoḇ su. Abraham dor sko fa skomnaisu ma skonan ro aiknam fuar ya. Wakfawi manseiso snon rikyor ḇedakam anskoya ke? Skoma malaikat skoirya! Skokofen yoḇ Abraham i, ’Taun iyama, ro swaf ḇeradine, nari au ma swambri muna romawa oso.’ Sara dakrower wos ine ro rum kruḇen bandum ya. Imbrif ro mankundi ma kyara, ’Yaḇebinsar kwar radine ḇesyaḇo, moḇsa na yakna romawa rai?’

Taun ḇerama ya, Sara kyapar romawa oso, raris moḇ Yahwe malaikat Ḇyeskoya skoḇeasas kwar ndraya. Abraham nyir i ḇe Ishak, isoine ”Marafrif”.

Fafisu Ishak ḇyeumur indokada taun ririm, Sara myam mboi Ismael ikyaren ker i. Sara imbe kyadaunwarek romawa ḇyedine, inja dor Abraham i fa iyawbur Hagar ma Ismael su. Randak ya, Abraham imewer. Mboi, Yahwe I kako imbe kyadaunwarek Ishak i. Inja, ikofen yoḇ Abraham i, ’Rwower roi Sara ikofen na. Snar asas Yena nari ndarirya roro Ishak i. Nari Yafaduru Ismael i.’