Abraham ma Sara Susouser faro Allah

Mnu oso isya kyain fanam ro Babel, isoine Ur. Kawasa ḇero diansya sisyom Yahwe I ḇa, mboi sisyom faro allah-allah ḇekaku ḇa. Ḇape, snon oso isya ryamaker Ur, ima isyom faro Yahwe I monda. Snoriso Abraham.

Yahwe ikofen ḇe Abraham i, ’Wabur rum ma karyer bansi, ma rwamura ḇe sup nari yafasnai ḇe au.’ Ramnai Allah ḇyeasas, ’Nari ḇe er ḇeba oso. Ma snar wasouser, nari yafrur roi ḇepyum faro snonkaku ḇebor ḇero supswan ḇesiper.’

Abraham dakfawi moḇ risai Yahwe iwan fa ryayoḇ ya ḇa, mboi ikyar faro Yahwe I. Inja Abraham, swari Sara i, kmari Terah i, ma fno ḇyedi Lot i, sfasos robebor sena ḇo sifrur marandan sena raris moḇ Yahwe iwan raya.

Abraham ḇyeumur taun ri 75 fafisu mankundi ma kina ḇyesi skofyafer ro sup Yahwe ikofen kwar nari fyasnai ḇe si anya. Sap sup ani ḇe Kanaan. Ro diwa, Allah ḇyeasas faro Abraham i ḇo doḇe, ’Sup ḇesiper mam ine, nari yaḇuk na ḇe romawa bansi.’ Mboi, Abraham ma Sara suḇemansar-binsar kwar ma suyakna romawa ḇa. Inja, moḇsa na Yahwe ifrur asas Ḇyena fa ndarirya rai?