Fafrowes ro Kakyar

Abraham fyarkor roma ḇyedi Ishak i fa dakswar Yahwe I ma ikyar faro asas Ḇyena kam. Mboi, rofyor Ishak ḇyeumur indokada taun ri 25, Yahwe dor Abraham i fa ifrur roi ḇesamswen kaku. Wafawi na ke?

Allah ikofen ḇe Abraham i, ’Wun roma bani ḇe bon ḇero sup Moria ma farser i ḇe farsarser.’ Abraham ifawi ḇa rosai ḇefnai fa Yahwe iwan i fa ifrur roi anya. Mboi, isouser monda faro Yahwe I.

Ras meser ro arwo prim kaku, Abraham dor Ishak ma manfyan risuru ḇyesuya fa sraḇe sup Moria. Ras rikyor mura, smam ḇinkwan muraro bon anya kwar. Abraham dor ḇe manfyan ḇyesuya fa sukain suwaf resari ḇo Ishak sura suḇuk farsarser. Abraham iwan Ishak i fa dun aimun na, ma Abraham dun inoi. Ishak ifuken kmari, ’Domba imbe kufarser ani ryoiso?’ Abraham kyarem, ’Roma yedi, Yahwe nari fyasos i.’

Fafisu sufyafer kwar ro bon anya, sufrur rofek farsarser oso. Ramnai, Abraham fyesepen Ishak ḇrasi ma wesi, mura ryir i ro rofek farsarser anya bori.

Rofyor Abraham damkepen inoi ya, Yahwe malaikat Ḇyedi dawos ro nanki mumfes, ’Abraham e! Mun awer roma ani! Ine insape yafawi kwar, wakyar faro Allah kukro wamarisen wafarser roma bani.’ Mura, Abraham myam faro domba oso knapur ḇyeja isyawer ro manuk ḇorek. Inja, iper ḇeri kaḇrai ḇefes Ishak i ma fyarser domba ani.

Ro ras anya ḇeri, Yahwe dap Abraham i ḇe maniḇoḇ Ḇyedi. Wakfawi roi ḇefnai ya ke? Abraham ifrur raris rosai Yahwe dor faro i nakam ḇesya kwar. Ifawi mnis ḇa rosai ḇefnai Yahwe iwan i fa ifrur roi anna, ḇesyaḇo iso na monda.

Mura, Yahwe ḇyeasas wer faro Abraham i, ’Nari yaḇebarakas au, ma yafrur fa romawa bansi, ḇaido up bansi, sibor syadi wer.’ Ine fyasnai Yahwe nari ḇyebarakas snonkaku ḇefrur pyum sya roro Abraham up ḇyesi.