Waswarepen Lot Swari

Lot ḇyarekus kma kasun ḇyedi Abraham i, ro sup Kanaan. Snar Abraham ma Lot rofanfan suḇesya sibor syadi kwar, inja moḇ ya ifyos mankenem faro su. Abraham ikofen yoḇ Lot i ḇo doḇe, ’Na jadi fa kuḇarek kayam ro moḇ oser ine ḇa kwar. Inja, kwinfir mura, moḇ risaiso wamarisen rwa ro na, ma nari yaraḇe moḇ ḇesena.’ Ine fyasnai Abraham fyaḇri mankundi ḇa.

Lot myam faro moḇ ḇepyum oso. Moḇ ine isya kyain fanam ro mnu ḇeba Sodom. War ma abris nabor naisya ro moḇ anya. Inja, kyinfir moḇ anya ma dun kina ḇyesi fa sḇarek ro dia. Ḇarpur mura, sḇarek ro mnu ḇeba Sodom.

Kawasa ḇero Sodom ma mnu ḇeba ḇefanam ya, isoine Gomora, sikam siḇarḇor kaku. Inja, Yahwe imbe kyakokpres mnu ḇeba ansuya. Mboi, imarisen fyaspar Lot ma kina ḇyesi. Iwan malaikat risuru fa sukofenḇair yoḇ si, ’Fasaw! Mkosasyarbur mnu ine! Nari Yahwe kyakokpres mnu ine.’

Mboi, Lot iyaryar ḇo ifrarbur moḇ ani ḇeri ḇa. Inja, malaikat ansuya suyamkepen Lot, swari, ma inai suḇesuya siḇrasna ma suyun si fa sisasyarbur mnu ḇeba ani. Sukofen, ’Mkofrar! Insama mkomar ḇa. Mkopok mkomam awer ḇe ḇarpur. Mkomam ḇe ḇarpur ido, nari mkomar!’

Rofyor skofyafer ro mnu Zoar, Yahwe ḇyuk mekem for ma fofen ḇefafar fa nado rarḇaḇ narap Sodom ma Gomora. Mnu ḇeba ansuya supromes ḇeri. Mboi, Lot swari isouser faro Yahwe I ḇa ḇo myam ḇe ḇarpur, inja ḇye adir karumasen! Lot ma inai ḇyesuya skoḇesaneso rawo. Mboi, skosmai payamyum kukro skosouser faro Yahwe I. Inja, soasuser faro Yahwe ima roi ḇefandun kaku nairi.