Kandera Ḇesamfur

Moses ikofen kaku faro Firaun i ḇo doḇe nari isrow i wer ḇa kwar. Mboi rofyor rya ḇaime, ikofen yoḇ Firaun i ḇo doḇe, ’Ro romfawru, romawa ḇepon ro sup Masir nari simar kam, ro romawa bani isof ro women sya romawa sesya.’

Yahwe iwan fa snonkaku Israel sya sikun roḇean ḇesnai ḇese ro roḇean san ro rasras na. Doḇe, ’Mkokaruk domba ḇaido kambing snoman oso ḇeumur taun rioser, ma mkorir kapkop rik ḇyena ro kedwa ya ḇarpondi. Mkokafnsu kraf ḇyena ḇo mkoḇukidan kuker mamami ḇepisen ḇa. Mkosansun mko, mkosower roi ḇesower mkowemna, ma mkora. Roḇ ine nari yaḇuk ḇaḇemkei ḇe mko.’ Kwarapan kada, er Israel sya na simarisen kaku!

Ro romfawru, Yahwe malaikat Ḇyedi rya yoḇ rum oser-oser ro sup Masir. Ro rum srir kapkop rik ro kedwa ya ḇarpondi ḇa ido, nari malaikat ani myun romawa ḇepon ḇero rum anya. Mboi rum ḇena kapkop rik ro na, malaikat ani nari imbran pdef. Snonkaku Masir ḇenana ke ḇena roi noḇa sya, romawa ḇepon sesya simar kam. Mboi, snonkaku Israel romawa ḇepon sesi oso ḇaḇeri imar.

Firaun romawa ḇepon ḇyedi dakmar. Inja, ipok ḇa kwar. Ikofen yoḇ Moses ma Harun su ḇo doḇe, ’Mkobur moḇ ine. Mkora mkosyom Allah mkoḇedi mura. Mkun rofanfan mkoḇesya kam!’

Fafisu paik isnai, kawasa Israel simbran sisasyarbur sup Masir. Sfasos si imnis kina ma keret sena oser-oser. Snon Israel sya sisya se 600.000, bin ma romawa sya kako sibore. Ono wer ido, snonkaku ḇeraker er ḇese saksowarpu si fa sra sisyom Yahwe I. Snonkaku Israel sya simkei ḇeri!

Ro taun ḇe taun san roḇean raris roḇean san ro ras anya insama siswarepen moḇsa Yahwe fyaspar si raya. Sor na ḇe Paskah.