Manseren Allah Fyasnai Iswar Kaku Ko

1. IFRUR ORI YA FA ISNAI

Kankenem ro supswan ine isya kukro ­sananai ro ori ya. Ori ya ḇyuk samambraḇ faro ai knam na fa nasur pyum, mura ram na nabore, nasmurem, nbuk bon ma mor. Ori ya kako ifrur fa ai knam rares ḇyena syewar war ḇero saprop na ḇe ram ḇyena, ramnai nasasyar ḇe farsyos ḇe war.

2. IFRUR MEKEM YA FA DADO

Sinan ḇyuk mekem ya insama supswan ine syambraḇ fa fyasos roḇean fa kan. Manseren Allah ­ifrur mekem ya fa dado ma ifrur mamarem ro rokaker na. Ḇyuk sneprei faro ko kuker fyasos roḇean ma ­ifrur ko fa koryaḇ.

3. FYASOS ANAN MA SANSUN

Kma sibor sya simgakwarek moḇsa na sisewar anan ma sansun faro kina sesya rai. Kwara wos ro Refo ine, ’Mgomam faro man sya ro farsyos, ḇeyakḇuḇer mor ḇa ma ḇeyakuf ḇa ma ḇeyakryur roḇean ro sayar ḇa, ḇesyaḇo Kma mgoḇedi ro boiyaswa ḇyuk roḇean ḇemnis faro si. Inja mgofawi ḇa ke mgo kada mgosyadi bur ro man sya?’​—⁠Matius 6:​25, 26.

’Mgomamepen mampyoper pampen ro maper, ḇesur ḇoi ḇefararur ḇa ḇape yakofen faro mgo: [Raja] Salomo kuker payamyum ḇyena kako, ḇape daksansuni kuker sansun ḇepyum imnis pampen sya oso ḇa. Inja raris Allah fyamanggor aḇris ro maper, Allah ipok ḇa ke fa fyamanggor mgo syadi wer?’​—⁠Matius 6:​28-​30.

Manseren Allah syambraḇ fa fyasos anan ma sansun faro ko. Inja, na syambraḇ kako fa ifnoḇek ko insama kosmai fandun ḇese koḇena ḇae. Kosewar insama kofrur fa Sinan imarisen ido, na ḇyebarakas ko ro ­sasewar anan ḇaido isaramper ko fa kosmai ­fararur insama kona pipi fa kokowes rosai kofandun na.​—⁠Matius 6:​32, 33.

Fafisu komam ma kokain kokara ori ya, mekem ya, man sya, ma pampen na, nari koswar kaku Manseren Allah. Awawos ḇerama wer ine, na fyasnaiḇair nyan Allah dawos faro snonggaku koine.