Mkokarkar Awer Snaro Sasar Snonkaku Ḇese Sya

1, 2. Rosai Refo ḇyardina kuker barbor ro Saksi Yahwe sya?

RO DUNYA ine, organisasi oso isya kawasa ḇyesi siswar Yahwe I ma simarisen sfarmyan ḇe Yahwe I. Siso Saksi-Saksi Yahwe. Sifrur sasar ma sisma ḇaḇeraryarḇa rariryano, Yahwe fyarkin si pdef kuker rur ḇesren ḇyedi. Mkorama komam barakas rosai monda Allah ḇyuk ḇesi.

² Ro 1914, Yahwe kawasa ḇyesi sibor ḇa. Ḇape Yahwe ḇyebarakas fararur ḇaḇeḇaryas sena. Bonya iso, snonkaku yuta ma yuta sifawi napnapes ya ma sḇe Saksi Ḇyedi. Yahwe ḇyeḇair roi nane kuker ikofen, ”Ḇeborḇa sya nari sḇesyaran, ma ḇekasun sya nari sḇe er ḇesambraḇ kaku. Aya, Yahwe, nari yafrur fasawna ro fafisu ya.” (Yes. 60:22) Kirine, nasnai bos kaku snar ḇardadi ani ndarirya kwar. Kawasa Yahwe ḇyesi sḇe er ḇeba kaku. Ibasyadi wer, ro sup ḇeba ḇebor kawasa sesi sibor ḇa syadi buro barbor ro Saksi Yahwe sya.

3. Rosai ḇefasna kaku ya snar Allah kawasa ḇyesi siswaryaye si?

³ Ro ras-ras ḇepupes, Yahwe ifnoḇek kawasa ḇyesi insama siswaryaye si syadi wer. ”Allah ikada isaswar”, ma sifarari I. (1 Yoh. 4:8) Yesus iwan manfamyan ḇyesi fa ’siswaryaye si’. Ikako ikofen, ”Rofyor mko swar yae mko ido snonkakusya kam nari sifawi mboi manfamyan ayesi mko, rofyor mko swar yae mko kada.” (Yoh. 13:34, 35) Ro fafisu ine, er-er ḇesesya smunyaye si ḇape Yahwe kawasa ḇyesi siswaryaye si. Imnis raris, ro Perang Dunia II, snonkaku yuta ri 55 simar. Ḇape Yahwe kawasa ḇyesi smun snonkaku oso ḇaberi ro mamamun ani. (Wasya Mikha 4:1, 3.) Inja rarirya, ’sisren pdef ro rik snonkaku syakam’.​—Kis. 20:26.

4. Rosai ḇefnai fa na kokofen barbor ro Saksi Yahwe sya nasnaibos kaku?

⁴ Saksi Yahwe sya sna mbroḇ ḇesambraḇ kaku iso Setan, ”ilah ḇeḇarḇor ḇeyuf supswan ine”. Ḇape barbor seja nek pdef. (2 Kor. 4:4) Setan fyara organisasi politik, ma media berita na. Ma, ḇyukna fa nafrur mnai ḇaḇeḇaryas ya. Ḇape, isma bon ḇa. Rariryano, ḇyensewar pdef insama kosyom ḇe Yahwe I werḇa snar ifawi fafisu ḇyedi fyanam kaku kwar.​—Why. 12:12.

NA WASOASUSER PDEF ROFYOR SNONKAKU ḆESE SIFRUR SASAR KE?

5. Rosai ḇefnai fa snonkaku ḇese na sifrur fa kosnesna naduf? (Mam sonin ḇerandak ro artikel ine.)

⁵ Yahwe kawasa ḇyesi sifawi snar siswar Allah ma snonkaku ḇese sya ima roi ḇefandun kaku. Yesus ikofen, ”’Waswar Manseren (Yahwe), Allah ḇedi, kuker snembri ḇesiper ma kuker rur bedi ḇesiper ma kuker karkara ḇena ḇesiper. Ine sasoser ḇepon ma ḇeba syadi. Ma sasoser ḇeḇesuru ḇemnis kuker sasoser ḇepon ani iso ine: Waswar min besi imnis waswar mankundaw.’” (Mat. 22:35-39) Ḇape, Refoya ikofen snar sasar Adam ifrurna, snonkaku syakam sisasar kwar rofyor sḇeaḇen. (Wasya Roma 5:12, 19.) Inja, fafisu oso na sino sikofen ḇaido sifrur roi ḇefrur fa kosnesna nadufe. Rarirya ido, rosai fandun fa kofrur ya? Na koswar Yahwe I pdef ke? Nari kosoasuser pdef ḇe I ma kawasa ḇyesi ke? Refoya naser farfyar kuker manfamyan Allah ḇeḇeso ḇekofen ḇaido ḇefrurduf sne snonkaku ḇese sya. Mkorama kofarkor ro farfyar sena.

6. Rosai ḇefnai fa na kokofen snar Eli ḇyefnder fa ḇyuk disiplin ḇe romawa ḇyesuya?

⁶ Imnis raris, Eli iso imam ḇeba ro Israel, ḇape romawa ḇyesuya susouser sasoser Yahwe ḇyedi ḇa. Refoya ikofen, ”Eli romawa ḇyesuya iso snon ḇekirḇa; susouser Yahwe I ḇa”. (1 Sam. 2:12) Eli ifawi kwar roi ḇeḇyeḇa sufrurna. Ḇape, ḇyuk disiplin ḇe suḇa. Inja, Yahwe ḇyuk samamyai ḇe Eli ma romawa ḇyesuya. Ḇarpurya, Eli kpu ḇyesi pok fa sifarmyan ḇe imam ḇeba werḇa. (1 Sam. 3:10-14) Wawasen kada wakenem ro fafisu ani ma wafawi Eli myam monda romawa ḇyesuya sufrur roi ḇeḇyeḇa. Nari wakarkar snaro rosai sufrurna ke? Na kakyar bedi syambraḇ werḇa isof ro wafarmyan ḇe Yahwe I werḇa ke?

7. Sasar ḇeba kaku rosai Daud ifrur ya, ma rosai Allah ifrur ḇe i na?

⁷ Daud nya rari ḇepyum nabor. Iso ḇefnai fa Yahwe iswar kaku i. (1 Sam. 13:13, 14; Kis. 13:22) Imbape, fafisu oso Daud ifrur sasar ḇeba kaku. Rofyor Uria iso ro mamamun, Daud denef kuker Uria swari, iso Bat-syeba i. Bin ani fyadores. Infa ikram sasar ḇyedi, Daud fyasos insama Uria ibur ḇe rum ḇyedi. Kyara nari Uria denef kuker swari insama smam Uria iso kma ḇekaku ro kapira Bat-syeba dores ya. Ḇape, Uria ibur ḇe rum ḇyedi ḇa. Inja, Daud fyasoswer insama Uria ḇyeḇemun ro mamamun ya. Snaro sasar ḇeba kaku ifrurna, Daud ma kina ḇyesi sismai roi ḇesamswen. (2 Sam. 12:9-12) Rariryano, Yahwe fyasna sawarwar ḇyedi faro Daud i ma ḇyuk ampun ḇe i. Ifawi snar kaku ya Daud ima snonkaku ḇepyum dirya. (1 Raj. 9:4) Wakenem ro fafisu ani ido, na rariso sneḇaḇir bedi rofyor wafawi rosai Daud ifrur ya? Na wamewer wafarmyan ḇe Yahwe I werḇa ke?

8. (a) Sasar rosai monda Petrus ifrur ya? (b) Rosai ḇefnai fa Yahwe ḇyuk fakamaman ḇe i ker?

⁸ Contoh ḇese ro Refoya iso manwawan Petrus i. Yesus kyinfir i fa ḇyemanwawan. Ḇape, fafisu oso Petrus ifrur sasar. Imnis raris, Petrus ikofen snar ḇese sya sibur Yesus i rariryano, nari pok fa ifrur rariryaḇa. (Mrk. 14:27-31, 50) Ḇape rofyor sfor Yesus i, manwawan syakame, Petrus i kako, sifrar siburi. Ramnai ro swaf rikyor, Petrus ikofen snar myambir Yesus i ḇa. (Mrk. 14:53, 54, 66-72) Ḇape, Petrus fyafko kaku faro rosai ifrur kwarna. Inja, Yahwe ḇyuk ampun ḇe i ma ḇyuk fakamaman ḇe i. Fafisu ya awsya ro dia ma wafawi rosai Petrus ifrurna ido, na wakyar kaker ḇe Yahwe I ke?

9. Rosai ḇefnai fa wakyar kaku snar Yahwe ifrur roi oso kuker nanapes ḇesyakwar?

⁹ Contoh nane nkurfasna snar manfamyan Yahwe ḇeḇeso fafisu ono sifrur sasar ma sifrur snonkaku ḇese sya sfafayaf. Roi ine ḇyejadi ro kirine ido, rosai na wafrur ya? Na wamewer waso ro fananjurna wer ke? Nari rwir Yahwe ma kawasa ḇyesi ke? Ḇaido, waḇaḇir Yahwe ima ḇyesawarwar ma iwaf kaker snonkaku ḇefrur sasar sya fa simbror wer ke? Ḇape fafisu ono, snonkaku ḇefrur sasar ḇeba kaku simbror ḇa. Na wakyar kaku snar Yahwe ifawi ma ifrur roi oso ḇesi ro fafisu ḇemnis ke? Fandun ido, na Yahwe iyawbur snonkaku ani ro sidang. Wakyar kaku Yahwe nari ifrur roi oso kuker nanapes ḇesyakwar ke?

WASOASUSER PDEF

10. Yudas Iskariot ma Petrus sufrur Yesus fyafko ḇape rosai Yesus ifrur ya?

¹⁰ Refoya kako naser farfyar kuker snonkaku ḇesoasuser pdef ḇe Yahwe I ma kawasa ḇyesi rofyor sikenem ro ris snonkaku ḇefrur sasar ḇeba kaku. Yesus ḇyuk farari ḇepyum kaku. Rofyor ikinfir manwawan ri 12 ḇaim, ḇyenadi ro roḇya ḇesiper dor farfnoḇek ro Kmari. Ḇape ḇarpurya, oser ro manwawan ḇyesi, iso Yudas Iskariot i, ḇyoḇi. Osower ido, manwawan Petrus fyamyun Yesus i. (Luk. 6:12-16; 22:2-6, 31, 32) Ono sisya sifrur Yesus fyafko rariryano, pok fa ḇyuk sasar ḇa ḇe Yahwe ḇaido manfamyan ḇesesya. Yesus fyanam pdef kuker Yahwe I ma ifarmyan kuker soasuser pdef ḇe I. Bonya, Yahwe ḇyuk barakas ḇe i kuker ḇyawes i ma ḇye i fa ḇye Raja ro Karajan ro nanki.​—Mat. 28:7, 18-20.

11. Rosai Refoya ḇyardi kuker Yahwe kawasa ḇyesi ro fafisu ine?

¹¹ Yesus ḇyuk farari ḇeko fa kosoasuser pdef ḇe Yahwe I ma kawasa ḇyesi. Ma, kona roi ḇepyum ḇeḇewar fa kosoasuser pdef. Kofawi snar Yahwe fyarkin kaker kawasa ḇyesi ro ras-ras ḇepupes ine. Ifnoḇek kawasa ḇyesi fa sḇaryas ro supswan ḇesiper, ma si monda ḇefrur fararur ine. Si kako sḇeoser ma simarisen kaku snar sifrur rosai Yahwe fyarkor kwar ḇesi. Yahwe ḇyeḇairna kuker ikofen, ”Mame! Nari manfamyan ayesi sibras kuker raryaḇ snaro sisma sne ḇepyum.”​—Yes. 65:14.

12. Rariso fandun fa mamam koḇena faro sasar snonkaku ḇese sya?

¹² Koryaḇ kaku snaro Yahwe fyarkin ma ifnoḇek ko fa kofrur roi ḇepyum nabore. Imbape, snonkaku ro dunya Setan sisma askiḇa ma sna saneraro ḇekakuḇa ro fafisu naiwama. Inja, kobinkwanbur Yahwe ma kawasa ḇyesi snar ono sisya sifrur sasar ido, kofasna koḇe snonkaku ḇefawinanem ḇa. Fandun fa kosoasuser pdef faro Yahwe I ma koso mnis farkankin ḇyena. Fandun fa kofarkor nyan rariso komam sasar snonkaku ḇese sya ma rosai na kofrur ya.

ROSAI FANDUN FA WAFRUR YA?

13, 14. (a) Rosai ḇefnai fandun fa kokaḇaḇaḇ faro snonkaku ḇese sya? (b) Asas rosai fandun fa kowasen na?

¹³ Rariso rofyor ono sisya sikofen ḇaido sifrur fa sne bedi iduf? Refoya danun, ”Pok fa rur bedi imsor fasawsaw awer, snaro sne ḇemasasor fasawsaw isya ro anderkor snonkaku ḇeḇarḇor sya.” (Pkh. 7:9) Kokame koḇesnonkaku ḇemnisḇa ma na kofrur sasar. Inja, naek srar koḇesi na sikofen ma sifrur roi ḇenapes ro fafisu nakamḇa. Ipyum syadi kokara ker awer sasar sena. Na nafrur fa koryaḇ werḇa ro fararmyan koḇena ḇe Yahwe I. Ibasyadiwer, kakyar koḇena na nasambraḇ werḇa, ma na kobinkwanbur Yahwe organisasi ḇyedi. Ḇarpurya, kona marasrisen werḇa snaro kofarmyan ḇe Yahwe I werḇa ma saneraro fa kokenem ro dunya babo ya napromes.

¹⁴ Inja, rariso na wafarmyan pdef ḇe Yahwe I kuker aski rofyor ono sisya sifrur fa wakarkar? Wawasen pdef Allah asas ḇyena ḇeyun sneprei ine, ”Mame, yafrur farsyos ḇebabo ma supswan ḇebabo; ma roi ḇebor ḇekwar anna na neḇeswarepen werḇa, ḇaido nasae werḇa ro sne ya.” (Yes. 65:17; 2 Ptr. 3:13) Nari mam kaku asas ani rofyor wasoasuser pdef ḇe Yahwe I.

15. Rosai Yesus ikofen fandun fa kofrur ya rofyor snonkaku ḇese sya sifrur fa kofafayaf?

¹⁵ Koisya ro dunya baboya ḇaime. Inja, ono sisya sifrur fa kofafayaf ido, wawasen kada rosai Yahwe imarisen fa kofrur na. Imnis raris, Yesus ikofen, ”Snar rofyor mkopyos snonkaku sasar sena, Kma mkoḇedi ro boiyaswa Dakpyos sasar mkoḇena kako. Ḇape rofyor mkopyos sasar snonkaku ḇa, Kma mkoḇedi kako Ipok dakpyos sasar mkoḇena ḇa.” Ma rofyor Petrus ifuken fandun fa koḇuk ampun ”isof ḇefikke?”, Yesus kyarem, ”Roḇa! Yakofen faro au: Isof ḇe fikḇa, mḇoi isof samfur rifik ḇe fik.” Yesus fyarkor ko fa komarisen koḇuk ampun ḇe snonkaku ḇese sya ḇesya kwar.​—Mat. 6:14, 15; 18:21, 22.

16. Farkarkor rosai kun ro Yusuf i?

¹⁶ Ko kako na kofarkor ro Yusuf i. Yusuf ma ḇedar ḇyedi iso Yakub ma Rakhel romawa ḇyesuya. Yakub nya romawa ḇese risamfur. Ḇape iswar syadi Yusuf i buro ḇese sya. Yusuf srar ḇyesikam smamḇairi. Snaro sfafayaf kaku i, inja sboḇ Yusuf i. Ḇarpur ya Yusuf ḇyewomen ro sup Masir. Taun ḇe taun ramnai raja Masir ikanow Yusuf i ḇe snonkaku ḇepoik ḇesuru ro sup ani snaro imarisen faro rosai Yusuf ifrur na. Ḇarpur mura snaro ḇasḇiser ya myun, Yusuf srar ḇyesi srama ḇe sup Masir fa sikoḇes roḇean. Rofyor sisrow kuker Yusuf i, smambir i ḇa. Ḇape Yusuf myambir si. Fyor iwara sifrur pyum Yusuf i ḇa, ḇape ḇyuk samamyai ḇesi ḇa. Ḇyensewar kaku fa fyawi sfadwer kenem sena kwar ke roḇa. Rofyor ifawi snar sfadwer kenem sena kwar, i kako fyasnaḇair mankundi ḇesi. Inja, ḇyuk sneprei ḇesi ma ikofen, ”Mkomkak awer. Nari yafasos roḇeanna ḇe mko ma romawa mkoḇesya.”​—Kej. 50:21.

17. Rofyor ono sisya sifrur sasar ido, rosai nari kofrur ya?

¹⁷ Waswarepen kaku snar snonkaku osoḇaḇeri ḇenapes, inja na au kako wafrur fa snonkaku ḇese sya sfafayaf. Rofyor wafrur rairya ḇe snonkaku oso ido, waso rarirya ananun ro Refo kuker wor maf ma wasewar fa wakenem pyum kuker snonkaku ani. (Wasya Matius 5:23, 24.) Komarisen snonkaku ḇese sya sḇuk maf ḇeko. Inja kokako komarisen kofrur rarirya. Kolose 3:13 ikofen, ”Mkokḇaḇyae mko ma mkoḇuk ampunyae rofyor snon oso ikram masasor faro min ḇyedi; imnis raris Manseren ipyos sasar mkoḇena kwar mko kako mkakfrur rarirya kada.” Koswar kaku naek srar koḇesi ido, nari kokram masasor ḇa faro rosai sifrur ya. (1 Kor. 13:5) Ma rofyor koḇuk ampun ḇe min koḇesi, Yahwe ikako nari ḇyuk ampun ḇeko. Inja, rofyor ono sisya sifrur sasar ido, rarirya kada kofasna sawarwar faro si imnis raris Kma koḇedi, Yahwe I, fyasna sawarwar faro ko.​—Wasya Mazmur 103:12-14.