”Ḇyuk Samambraḇ faro Snonkaku Ḇemḇrus Sya”

1. Samswen rosai monda kosmana, ḇape rosai ḇefrur Yahwe imarisen ya? (Mam sonin ro randak artikel ine.)

KOKENEM ro ras ḇepupes ine napyan ḇa. Imnis raris naek srar koswar kaku sya sḇekandera kaku snar dafduf ḇemarḇak. Eḇesesya sḇensewar fa sfaduru kina sesya ḇeḇesinan kwar sya. Ḇesesya sḇensewar fa sisewar fandandun ro ras ras faro kina sesya. Ma nkofawi ḇebor rofandu mko sino sisma roi ḇesamswen oser monda ḇa, ḇape samswen ḇebeso ro fafisuya ḇeri. Ine nefandun kaku oras, samambraḇ ma pipi. Ḇape, mkokyar kaku Yahwe nari ifnoḇek mko. Mkofawi snar roi nakam nari napyum syadiwer snar iso roi Allah Ḇyeasas kwarna. Kakyar mkoḇena nari nafrur Yahwe imarisen!

2. Rariso Yesaya 40:29 ḇyuk sneprei ḇeko, ḇape sasar ḇeba rosai bisa kofrurya?

² Fyorno ido, mkoḇaḇir samswen mkosmana napyan ḇe mko ḇa ke? Rarirya ido, mkemir ḇa. Allah manfamyan ḇesouser Ḇyesya ro fafisu iwara sakḇaḇir rarirya kako. (1 Raja-Raja 19:4; Ayub 7:7) Rosai ḇefnoḇek si fa sisamḇraḇ pdef ya? Sikyar samambraḇ ḇerama ro Yahwe I. Refoya ikofen Allah ”ḇyuk samamḇraḇ faro snonkaku ḇemḇrus sya”. (Yesaya 40:29) Fyorno ido, Allah kawasa Ḇyesya skara insama sifrurmnis samswen sena ido, simnai sifarmyan ḇe Yahwe ro fafisu ḇeḇeso resari. Skara sifarmyan ḇe Yahwe ima nun barakas noḇa mboi samswen ya derer. Inja, siwasya Refo ḇa, siso fananjur ma ḇaḇeḇaryas werḇa. Kakuya, nanekam Setan marisen ḇyenairi.

3. (a) Rariso kopampum Setan insama dawyae ko ḇa? (b) Rosai nari kofarkor ro artikel ine?

³ Ibiris imewer kores nako pdef. I kako ifawi na kosambraḇ rofyor komyaren ro fararmyan koḇena ḇe Yahwe I. Inja, rofyor komḇrus ro ḇaken koḇena ḇaido emosi koḇena ido, koḇinkwanbur awer Yahwe I. Iḇye kada kofanam syadi ḇe I. Refo ikofen, ”Ḇyuk samambraḇ ma syoser mko.” (1 Petrus 5:10; Yakobus 4:8) Ro artikel ine, na kofarkor ro Yesaya 40:26-31 kuker Yahwe papoik Ḇyeja fa syambraḇser ko. Ma, nari kofarkor kuker fafisu risuru na nafnai fa kofrur roi nabor ḇa ro fararmyan koḇena faro Yahwe I, ma nari kofarkor rariso kofrur wos farkankin ro Refo, na ḇefnoḇek ko fa kosambraḇ pdef.

”SNONKAKU ḆEKYAR FARO YAHWE NARI SISAMBRAḆ KAḆER”

4. Rosai bisa kofarkor ro Yesaya 40:26?

⁴ Wasya Yesaya 40:26. Snonkaku osoḇaḇeri bisa ḇekor mak ḇero farsyos sya. Ilmuwan sya sikyar snar ro galaksi koḇedi monda mak sya barbor sena imbude milyar ri 400. Yahwe dor maksya sisnosna oser-oser. Rosai kofarkor kuker Yahwe I ro roi nane? Maksya monda Yahwe myamḇir kaku si, inja kwarapan rariso sneḇaḇir Ḇyeja faro Au, ḇefarmyan ḇe I snar saswar ya. (Mazmur 19:1, 3, 14) Kma ḇesaswar koḇedine ifawi rosai riryakame kuker ko. Refo ikofen snar ”snonburyam mkoḇena naser karkor epen” ro I. (Matius 10:30) Yahwe ”ifawi ras-ras ro snonkaku ḇesoasuser sya”. Inja, imarisen kofawina. (Mazmur 37:18) Yahwe ifawi rosai samswen wasmaina, ma bisa ḇyuk samambraḇ wafandunna insama wasambraḇ ro samswen wasmana.

5. Rosai ḇefnai fa kokyar Yahwe na syambraḇser ko?

⁵ Wasya Yesaya 40:28. Yahwe iso Knam ro papoik ḇaido samambraḇ nakam ro supswan ma farsyos. Kokarapan samambraḇ ḇyuk ḇe oriya. Manfasfas sains, David Bodanis ikofen snar ro detik oser oriya ḇyuk samambraḇ imnis raris miliaran bom atom ḇekpefe. Peneliti ḇesesya sikor energi ḇesae ro oriya ro detik oser nari nḇuk energi ḇesrow kaku faro snonkaku ḇero supswan ḇesiper ine ro swaf taun ri 200.000! Kofawi kaku Yahwe iso ḇebuk energi ani ḇe oriya, ine kyurfasna Yahwe na ḇyuk samambraḇ ḇeko fa kores nako pdef rofyor kosmai samswen.

6. Rosai knam ro wos kamnam Yesus ḇyedi nun marisen, ma rariso ine nafnoḇek ko?

⁶ Wasya Yesaya 40:29. Fararmyan ḇe Yahwe nun marisen ḇeba ḇeko. Yesus ikofen faro manfamyan ḇyesi, ”Mkoḇar kamnam Ayedi.” Ma ikofenwer ’Kamnam Ayedi ifrur marisen ma myanan.’ (Matius 11:28-30) Kakuḇae! Fyorno ido, imbude koḇaḇir komḇrus kaku rofyor kora koso fananjur ḇaido koso ro ḇaḇeḇaryas. Ḇape, rosai koḇaḇir ya rofyor koḇur ya? Kosmai sneprei kaku ma bisa kofrur mnis samswen kosmaina. Kakuḇae, kamnam Yesus ḇyedi nun marisen kaku.

7. Fawar pengalaman ḇefasnaḇair snar Matius 11:28-30 ima nkaku.

⁷ Mkorama komam pengalaman ro imbesrar oso kobedi. Iduf dafduf kelelahan kronis baido dafduf marmor kawane, stres, idufker bukor ḇyedi. Snar dafduf ḇyenane, inja fyorno ido samswen ḇe i fa iso ro fananjur ya. Ḇape, ras oso fyor ḇyensewar kaku fa dakso ro fananjur ya, fyas bo doḇe, ”faya ro ras ani dawos kuker sne ḇesanekar. Ro faya ani sawosna kuker sawarwar ma sneḇenaḇye, inja nafrur fa yakanes. Yasma swarapepen snar fananjur ima ḇyefandun kaku.” Imarisen kaku snar ḇyensewar kaku kwar fa dakso ro fananjur ya!

8, 9. Rosai knam ro Paulus wos ḇyena rofyor ikofen, ”Rofyor yasambraḇ ḇa, rofafisu ani yapok kaku”?

⁸ Wasya Yesaya 40:30. Imbude kona ḇaḇekir naḇore, ḇape infa kofrur ḇaḇekir koḇena nari kokyar faro samambraḇ koḇena monda ḇa. Ineiso fandun fa kofarkorna. Paulus nya samambraḇ fa ifrur roi nabore, ḇape jadifa ifrur roi imarisen kamna ḇa. Rofyor ikofenḇair rosai ḇyaḇirna faro Yahwe I, Yahwe ikofen faro i, ”Snar papoik ayena nsambraḇ syadi rofyor awsya rwoi samambraḇ ḇaya.” Paulus ifawi rosai Yahwe ikofen faro i na. Iso ḇefnai fa doḇe, ”Rofyor yasambraḇ ḇa, rofafisu ani yapok kaku.” (2 Korintus 12:7-10) Rosai knam ro wos ḇyenane?

⁹ Paulus ifawi syambraḇ fa ifrur roi nakam ro mankundiḇa. Fyandun fafnoḇek ro Yahwe I, ḇesambraḇ syadi ro i. Allah rur ḇesren Ḇyeja ḇyuk samambraḇ ḇe Paulus rofyor ḇyaḇir syambraḇ ḇa. Ma bisa ifrur roi nabor syadiwer. Allah rur ḇesren Ḇyeja nḇuk samambraḇ ḇe Paulus i fa ifrur roi jadifa ifrur kuker samambraḇ mankun ḇyena. Ko kako bisa kosma fafnoḇek ḇemnis radirya. Rofyor Yahwe ḇyuk rur ḇesren Ḇyedi ḇeko na kosambraḇ kaku!

10. Rariso Yahwe ifnoḇek Daud fa ifrur mnis samswen ḇyena?

¹⁰ Daud, manḇefas mazmur i, myam ro mankundi kwar rariso Allah rur ḇesren Ḇyeja nafnoḇek i fa syambraḇ. Idisen, ”Kuker fafnoḇek Beja, yamun manfansyar sya; ma kuker samambraḇ ro Allah, bisa yoper ro ayar karui.” (Mazmur 18:29) Imnis ayar karui ḇekaki kosambraḇ fa koper ro na ḇa. Rarirya kako, fyorno ido samswen kosmana naḇa kaku, inja kemir kosambraḇ fa kofrur mnisna ḇa. Kofandun Yahwe fafnoḇek Ḇyeja.

11. Rariso rur ḇesren ifnoḇek ko fa kofrur mnis samswen koḇena?

¹¹ Wasya Yesaya 40:31. Mankankan iroḇ ro farsyos kuker samambraḇ mankun ḇyena ḇa. Udara ḇaido wam ḇesam nasya ḇeyuni fa iroḇ ro farsyos. Ine nafnoḇeki fa iroḇ ḇinkwan ma ikram energi. Inja, rofyor wana samswen ḇemarḇak ido, wawasen mura ḇe mankankan ine. Wor Yahwe I fa ḇyuk samambraḇ nabor ḇe Au roro ”rur ḇesren, isoine rur ḇeḇuk snepreiya.” (Yohanes 14:26) Bisa kor Yahwe ḇyuk ḇeko rur ḇesren Ḇyeja ro fafisu sariryakam. Iba syadiwer, fandun fa kor Yahwe ifnoḇek ko rofyor kofamfaḇri kuker min Kristen kobansi. Rosai ḇefnai fa kofamfaḇri kuker naek ma srar sya?

12, 13. (a) Rosai ḇefnai fa famfaḇri nasya ro fandu snonkaku Kristen? (b) Roro rosai Yusuf ismana, rosai kofarkor ro Yahwe I?

¹² Bisa kofamfaḇriyae snar koine snonkaku ḇenapesḇa. Fyorno ido, imbude kofafayaf faro rosai snonkaku sikofen ḇaido sifrurna ḇaido snonkaku ḇesesya sfafayaf faro ko. Ine na nun samswen ḇeko. Ḇape, ine bisa nḇuk swaf ḇeko fa kosouser faro Yahwe I. Rariso nyan ya? Kuker kofararur kayam fnoḇek naek srar koḇesya. Sima snonkaku ḇenapesḇa raryano Yahwe iswar si, inja ko kako komarisen koswar si.

¹³ Yahwe idwarek manfamyan Ḇyesya ḇa rofyor sisma samswen. Kofarkor ro rosai Yusuf ismana. Rofyor Yusuf ḇyeromawa babo kaker, srar pari ḇyesya sifafayaf i. Sḇoḇ i ḇe women ma suni ḇe Masir. (Kejadian 37:28) Yahwe myam kaku rosai ismana ma sneriso kaku snar bati ḇyedi, manfamyan ḇesouser ḇyedi Yusuf i, sifrur mnis i ḇa. Ḇape, idwarek rosai ḇeḇejadi ya ḇa. Ramnai, rofyor siksof imbe denfus Potifar swari ma sisuni ḇe bui, Yahwe fyaspar Yusuf i ḇa. Ine kyurfasna Allah ibur Yusuf i ke? Aroḇa. Refoya ikofen, ”Yahwe ifnoḇek Yusuf ro rosai ifrurnakam, Yahwe ḇyebarakas i.”​—Kejadian 39:21-23.

14. Fainda rosai kosmana rofyor komasasor fasawḇa?

¹⁴ Contoh ḇesena iso Daud i. Snonkaku ḇebor sya sisma roi ḇeḇyeḇa raris Daud i ḇa. Ḇape, Allah bati Ḇyedine imsor ḇa. Fyas, ”Waḇinkwanbur masasor ma wabur rarmomen ya; sne bena nadosam awer fa wafrur roi ḇeḇarḇor.” (Mazmur 37:8) Alasan ḇefandun kaku fa ”koḇinkwanbur” masasor ḇaido komsor ḇa isoine snar komarisen kofarari Yahwe I. ’Ifrur rosai ḇemnis kuker sasar koḇena ḇa’ ḇape ḇyuk ampun ḇeko. (Mazmur 103:10) Fainda ḇese nasya rofyor komasasor fasawḇa. Imnis raris, masasor bisa nafnai tekanan darah neke ma kona samswen ro pernapasan. Bisa nafrur hati ma pankreas koḇena naḇyeḇa, ma kona samswen ro pencernaan. Ma rofyor komsor ido, kakara koḇena namnis ḇa. Nari kokofen ḇaido kofrur roi ḇefrurduf snonkaku ḇesesya, ma bisa nafrur koḇestres kaku. Inja, ipyum ya koḇefasis monda. Refoya ikofen, ”Sne ḇeknon nḇuk kankenem faro baken.” (Amsal 14:30) Inja, rosai kofrurya rofyor snonkaku ḇesesya sifrurduf ko, ma rariso kokenem pyum kuker naek srar koḇesya? Bisa koso mnis anun ḇero Refo.

ROFYOR NAEK SRAR SINO SISYA SIFRUR DOSAM SNE KOḆENA

15, 16. Rosai fandun fa kofrurya rofyor naek ḇaido srar oso ifrur dosam ko?

¹⁵ Wasya Efesus 4:26. Na kokandor ḇa rofyor snonkaku ḇesyom Yahwe ḇa sya sifrur dosam sne koḇena. Ḇape, rofyor naek ḇaido srar Kristen koḇesya ḇaido min ro kina koḇesi sifrur ḇaido sikofen roi ḇefrur dosam sne koḇena ido, na komsor kaku. Rariso rofyor koḇefnder ḇaḇeri rosai sifrur ḇeko na? Nari kokram masasor ani taun ḇe taun ke? Ḇaido na koso ananun ḇero Refo insama kofrur mnis kaḇer famfaḇri naḇeri ke? Kawos fasaw ḇe snonkaku ani ḇa ido, nari samswen ḇeko fa koḇedame kuker snonkaku ani.

¹⁶ Rariso sneḇaḇir koḇedi rofyor naek ḇaido srar oso ifrur dosam ko, ma jadi fa koḇefnder na ḇa? Rosai nari kofrur ya insama koḇedame? Randakya, koḇenadi ḇe Yahwe I. Kor fafnoḇek ro I insama kawos mnis kuker naek ḇaido srar ḇefrur dosam ko ani. Koswarepen naek ḇaido srar ani kako Yahwe bati Ḇyedirya. (Mazmur 25:14) Allah iswari ma fyasna ḇaḇenaḇye faro bati ḇyedine kako, ma imarisen kakfasna roi ḇemnis kako. (Amsal 15:23; Matius 7:12; Kolose 4:6) Ḇesuruya, kokara mnis kaku rosai imbe kokofen ḇe naek ḇaido srar ani. Kokara fasaw awer imbe ifrur dosam ko. Imbude kofawi mnis ḇaim rosai ḇeḇejadiya. Ma komarisen kokofenḇair ko kako kosasar. Imbude kawos kuker i radine, ”Ayama yaḇetersinggung fasawsaw, inja rofyor wawos kuker aya ro mandowindi, yaḇaḇir . . . ” Ḇape rofyor awawos anna nafrur fa koḇedame ḇa ido, koḇensewar pdef ma koḇenadiwareki. Kor Yahwe fa ḇyebarakas i ma ifnoḇek ko fa komam monda faro rari ḇepyum ro naek ḇaido srar ani. Na kokyar kaku Yahwe imarisen faro rosai koḇensewar kwarna insama koḇedame kuker naek srar koḇedi, snar ima oser ro Allah bati Ḇyedi kako.

ROFYOR KOKARA KER SASAR KOḆENA RO FAFISU IWARA

17. Rariso Yahwe ifnoḇek ko fa kofrur mnis kaḇer fasfesepen koḇena kuker I rofyor kofrur sasar, ma rosai ḇefnai fa komarisen kosma fafnoḇek ani?

¹⁷ Snonkaku ḇeḇeso sya skara sisyus fa sifarmyan ḇe Yahwe ḇa snar sifrur sasar ḇeba kwar. Rofyor kokara ker sasar koḇena ido, na kona askiḇa, raryaḇ ma samambraḇ werḇa. Raja Daud i kako ḇyaḇir roi ani rofyor ikofen, ”Fafisu yafasis ido kor yena naryar ḇa snar ras ḇesiperya yakanes sanesoi.” Ḇape, Daud ḇyeḇri fa ifrur rosai Yahwe imarisen manfamyan Ḇyesya sifrurna. Fyas ḇo doḇe ”Na yakofenḇair ḇe Yahwe I sasar ḇarḇor yena. Snar mankundaw ḇebuk ampun faro sasar ayena.” (Mazmur 32:3-5) Rofyor kofrur sasar ḇeba ido, Yahwe imarisen fa ḇyuk ampun ḇeko. Imarisen ifnoḇek ko fa kofrur mnis kaḇer fasfesepen koḇena kuker I. Ḇape, fandun fa wasma fafnoḇek Yahwe ḇyuk ḇe Au roro penatua sya. (Amsal 24:16; Yakobus 5:13-15) Inja wawaf awer boi, wafrurna ḇeri, snar wasma kankenem fyoro rofyor wasouser faro I. Imbude koḇaḇir kosasar kaker rofyor Yahwe ḇyuk ampun faro sasar koḇena kwar. Koḇaḇir rarirya ido, rosai fandun fa kofrur ya?

18. Rariso Paulus contoh ḇyedine nafnoḇek snonkaku ḇeḇaḇir ḇesyus ḇa fa ḇefarmyan ḇe Yahwe I?

¹⁸ Fyorno ido, manwawan Paulus ḇyesanekar snar sasar ḇyena ro fafisu iwara. Ikofen, ”Aya ine Manseren manwawan ḇyedi ḇesma anonef. Aya ine sipok sap aya ḇe manwawanḇa, snar yaḇewayam Allah jemaat ḇyena kwar.” Ḇyaḇir rarirya, mboi ikofenwer, ”Ḇape snar Allah ḇaḇenaḇye ḇyedi aya isya raris moḇ baboine yaraine.” (1 Korintus 15:9, 10) Yahwe ifawi Paulus ima snonkaku ḇesasar kako. Ḇape, imarisen kyaremso Paulus i ma imarisen Paulus ifawi roi ine. Rofyor kombror kaku kwar faro rosai kofrurna, ma kawos ḇe Yahwe kuker roi ani ma ḇe penatua sya ido nari ḇyuk ampun faro ko. Kokyar Yahwe ḇyuk ampun ḇe ko kwar ma komarisen kosma ḇaḇeampun ro I!​—Yesaya 55:6, 7. 

19. Rosai ayat tahunan 2018, ma rosai ḇefnai fa ine fyandun kaku?

¹⁹ Snar kofanam kaku kuker papupes dunya ine, nari kosma samswen nabore. Ḇape, fandun fa koswarepen snar Yahwe, ”Ḇyuk samambraḇ faro snonkaku ḇemḇrus sya ma faro ḇeryarḇa sya,” na ḇyuk rosai monda wafandunna insama wafarmyan ḇe I kuker soasuser. (Yesaya 40:29; Mazmur 55:22; 68:19) Ro swaf taun 2018, nari kona swarapepen kuker napnapes ḇefandun kaku ine rofyor korama ro fananjur ḇero Balai Kerajaan ma komam fas-fas ro ayat tahunan koḇedi, ”Snonkaku ḇekyar faro Yahwe nari sisambraḇ kaḇer.”​—Yesaya 40:31.